17 yaşlı oğlan özünü qıza görə öldürüb?

İmişli rayonunda intihar hadisəsi baş verib.

"Qafqazinfo” xəbər verir ki, rayonun Cəfərli kənd sakini, 2005-ci il təvəllüdlü Ə.Quliyev özünü yaşadığı evin həyətindəki yardımçı tikilidən asıb. Onun asılı vəziyyətdə qalmış meyitini səhər saatlarında ailə üzvləri aşkar ediblər.

İlkin araşdırmalardan sonra 17 yaşlı oğlanın sevdiyi qızla münasibətinin pozulmasına görə həyatına qəsd etməsi ehtimal edilir. 

Faktla bağlı araşdırmalar davam etdirilir.

Psixotrop maddə istifadə edənlər yalan danışmağa meyilli olurlar - AÇIQLAMA

"Daha çox boşanmış ailələrdə və yeniyetmələr arasında psixotrop maddələrdən istifadə halları var. Psixotrop maddə istifadə edən şəxslər ilk növbədə yalan danışmağa meyilli olurlar”.

Bu barədə Respublika Narkoloji Mərkəzinin baş direktoru Orxan Cəfərov deyib.

O bildirib ki, psixotrop maddə istifadə edən şəxslər bir müddət sonra halsız olurlar:

"Yeniyetmələrdə davranış pozuntusu müşahidə edilir. Orta məktəbdə oxuyan uşaqlar sinif yoldaşları ilə dalaşır, ailədə valideynlərə cavab qaytarırlar. Dərslərdən qaçırlar. Eyni zamanda qəbul etdikləri psixotrop maddələrin təsiri onların fiziki görünüşünə də təsir edir. Əzgin, halsız, yuxulu bir vəziyyətdə olurlar, eyni zamanda xəstəhal görünürlər. Bu kimi nüanslar müşahidə edən valideynlər ehtiyatlı olmalıdırlar. Dərhal ixtisaslı həkimlərə müraciət etməlidirlər”.

“YAŞAT” Fonduna daxil olan vəsaitdən nə qədəri xərclənib?

Bu günə qədər "YAŞAT” Fonduna daxil olan vəsaitdən 61 114 757,86 manatdan çoxu xərclənib.

"Report” xəbər verir ki, bunu "YAŞAT” Fondunun rəhbəri, Qarabağ qazisi Elvin Hüseynov deyib.

Onun sözlərinə görə, ümumilikdə bu günə qədər Fonda 73 781 435,79 manat vəsait daxil olub:

"Xərclənən vəsaitdən savayı 12 milyon manatdan çoxu Fondun balansında qalıb. Xərclənən vəsaitdən 36 892 200 manatı məişət şəraitinin yaxşılaşdırılması istiqamətinə, 546 346,40 manatı təhsil, peşə hazırlığı və yaradıcı potensialın inkişafına, 6 336 540,51 manatı istehlak kreditləri və digər borc öhdəliklərinin qarşılanmasına, 17 339 670.95 manatı isə müalicə və psixoloji dəstək xərclərinin ödənilməsinə sərf olunub”.

E.Hüseynov bildirib ki, ölkə ərazisində 2 927 şəhidin ailə üzvləri, habelə 5 599 yaralı olmaqla ümumilikdə 16 966 şəxslə görüş keçirilib, ehtiyacları qeydə alınıb (yashat.gov.az saytında) və 12 526 şəxsin 26 616 müraciəti icra üçün öhdəliyə götürülüb: "Reallaşmış ödəniş sayı 21 848-dir”.

Dönərxanalarda nöqsanlar aşkarlandı, doqquz müəssisə cərimələndi

Qida Təhlükəsizliyi Agentliyi dönər istehsalı və satışı ilə məşğul olan müəssisələrdə yoxlama həyata keçirib.

Qurumdan verilən xəbərə görə, ölkədə qida təhlükəsizliyinin təmin edilməsi üzrə aparılan nəzarət tədbirlərini davam etdirir.

Həmin tədbirlər çərçivəsində Agentlik tərəfindən 1 may - 22 iyun tarixlərində ümumilikdə dönər istehsalı və satışı ilə məşğul olan 9 müəssisədə yoxlama həyata keçirilib.

Yoxlamalar zamanı sahibkarlar tərəfindən qida təhlükəsizliyi sahəsində texniki normativ hüquqi aktların tələblərinə riayət olunmadığı müəyyən edilib. Belə ki, 9 müəssisədə sanitariya-gigiyena norma və qaydalarına əməl edilməməsi, 3 müəssisədə məhsulların saxlanması zamanı mal qonşuluğu qaydalarının və temperatur rejiminin pozulması, 1 müəssisədə isə məhsulun etiketlənməsinə dair tələblərə riayət olunmaması faktı aşkarlanıb.

Aşkar edilmiş nöqsanlarla əlaqədar sahibkar barəsində İnzibati Xətalar Məcəlləsinin müvafiq maddəsinə əsasən, inzibati xəta haqqında protokol tərtib olunmaqla cərimə tətbiq edilib.

Bakıda memarlıq abidəsi olan yaşayış binası dağıdılıb: Sakindən redaksiyaya ŞİKAYƏT - FOTO

"Bizim tarixi evimizi barbarcasına dağıtdılar və hələ də buna görə maddi kompensasiya ödənilməyib”.

Bu şikayətlə Media.az redaksiyasına Bakı sakini, Dilarə Əliyeva küçəsi, 141 ünvanındakı mənzildə yaşayan Bikə Həsənova müraciət edib.

Qadının sözlərinə görə, 2017-ci ilin oktyabr ayında "FF” mənzil-tikinti kooperativi tərəfindən çoxmənzilli binanın bünövrəsinin qəsdən sarsıdılması nəticəsində onun künc tərəfi uçub.

"Evin 100 ildən çox yaşı var, amma çox davamlıdır. Binada 18 ailə yaşayırdı, amma həyasızcasına aparılan qazıntıdan sonra cəmi 15-i qalıb. Məsələn, ulu babası tarixi binanın inşaatçılarından olan 89 yaşlı nənənin mənzili dağıdılıb. İndi qadın qohumlarının evində yaşayır. Divarlarımız çatladı, amma biz qaldıq”, - deyə qadın bildirib.

B.Həsənova iddia edir ki, ev sakinləri "FF” mənzil-tikinti kooperativini, daha doğrusu, onun sahibi Tamilla İbrahimovanı məhkəməyə veriblər:

"Rayon, Ali və Apellyasiya Məhkəmələri bizim xeyrimizə qərar çıxarıb. Biz bu işi qazandıq. Məhkəmə qərar verdi ki, T.İbrahimova bizə maddi təzminat ödəməlidir. Ancaq o, hələ də bunu etməyib və etməyəcəyini də açıq şəkildə bəyan edir”, - deyə Bikə Həsənova qeyd edib.

Qeyd edək ki, bu hal mediada geniş şəkildə işıqlandırılıb. T.İbrahimova D.Əliyeva küçəsi, 141 ünvanında yerləşən tarixi yaşayış binasının sökülməsinə və yerində çoxmərtəbəli binaların tikintisinə Bakı Şəhər İcra Hakimiyyətindən icazə aldığını bildirib.

Nəticədə Bakı Şəhər İcra Hakimiyyətinin Başçısı Aparatının keçmiş rəhbəri Rasim Quliyev Azərbaycan Cinayət Məcəlləsinin 308.2-ci (vəzifə səlahiyyətlərindən sui-istifadə ağır nəticələrə səbəb olduqda) və 314-2.3-cü (torpaq sahələrinin ayrılması və ya qanunla müəyyən edilmiş qaydaları pozmaqla tikinti və ya quraşdırma işlərinin aparılmasına icazənin verilməsi) maddələri ilə ittiham olunub. O, üç il müddətinə azadlıqdan məhrum edilib, lakin bu il azadlığa çıxıb.

"Günahsız bir insanı dəmir barmaqlıqlar arxasına saldılar. Tikintiyə icazəni keçmiş icra hakimiyyətinin başçısı Hacıbala Abutalıbov verib. Məhkəmə zalında Tamilla İbrahimova müvafiq sənədləri əldə etmək üçün ona külli miqdarda rüşvət verdiyini bildirib. Yalnız biz elan edəndə ki, evimiz yerli əhəmiyyətli mədəniyyət abidəsi olduğundan dövlət himayəsindədir, problemimizə diqqət yetirdilər”.

Fəaliyyəti "dondurulmuş” "FF” şirkətinin sahibindən təzminat ödənilməsi ilə bağlı artıq məhkəmə qərarı olsa da, prokurorluqda istintaq hələ də davam edir”, - deyə Bikə Həsənova davam edir.

Bu işin araşdırılması ilə prokurorluğun müstəntiqi İlqar Səfərov məşğul olurdu. Qadının sözlərinə görə, o, evlərinin bərpa olunacağına söz verib, lakin bir müddət sonra telefonlara cavab verməməyə başlayıb.

Media.Az İlqar Səfərovla əlaqə saxlayıb. Həmin şəxs bu işin artıq onun səlahiyyətlərinə aid olmadığını bildirib və şərh almaq üçün Azərbaycan Respublikası Baş Prokurorluğunun mətbuat xidməti ilə əlaqə saxlamağı tövsiyə edib.

Baş Prokurorluğun mətbuat xidmətindən bildirilib ki, məhkəmə istintaqı yekunlaşıb və qərar çıxarılıbsa, deməli, istintaq çoxdan başa çatıb. Məsələ ondadır ki, istintaq məhkəmənin yekun qərarına qədər davam edir.

Lakin mətbuat xidmətindən hazırda bu problemlə bağlı kimin məsuliyyətli olduğunu və təzminat ödəməyən "FF” MTK sahibinə qarşı niyə tədbir görülmədiyini açıqlamayıblar.

"Məhkəmə qərarı icra olunmazsa, Ədliyyə Nazirliyinin İcra Baş İdarəsinə müraciət edə bilərsiniz”, - deyə mətbuat xidmətindən bildirilib.

Media.Az-ın Tamilla İbrahimova ilə əlaqə saxlamaq cəhdləri baş tutmayıb.

Buna baxmayaraq, redaksiya ona və bu işə cavabdeh olan müvafiq dövlət qurumlarının nümayəndələrinə sözlərini demək imkanı verməyə hazırdır.

 


Bakıda 33 dərəcə isti olacaq, bəzi rayonlara yağış yağacaq - Şənbə gününün HAVASI

Azərbaycan ərazisində iyunun 25-də gözlənilən hava şəraiti haqda proqnoz açıqlanıb.

Bu barədə Ekologiya və Təbii Sərvətlər Nazirliyinin Milli Hidrometeorologiya Xidməti məlumat yayıb.

Bildirilib ki, Bakıda və Abşeron yarımadasında hava şəraiti əsasən yağmursuz keçəcək.

Cənub küləyi axşam şimal-qərb küləyi ilə əvəz olunacaq.

Havanın temperaturu gecə 20-23, gündüz 30-34, Bakıda gecə 21-23, gündüz 31-33° isti olacaq.

Atmosfer təzyiqi normadan aşağı 755 mm civə sütunu təşkil edəcək. Nisbi rütubət 50-60% olacaq.

Əksər rayonlarda isə əsasən yağmursuz hava olacaq. Lakin bəzi şimal və qərb rayonlarında şimşək çaxacağı, arabir yağış yağacağı gözlənilir. Mülayim şərq küləyi əsəcək.

Havanın temperaturu gecə 17-22, gündüz 32-37, dağlarda gecə 7-12, gündüz 17-22° isti olacaq.

Dövlət Dəniz və Liman Agentliyində “Dənizçi günü” peşə bayramı münasibətilə tədbir keçirilib - FOTO

Azərbaycan Respublikasının Prezidentinin 2014-cü il tarixli sərəncamı ilə hər il 25 iyun ölkəmizdə "Dənizçi günü” peşə bayramı kimi qeyd olunur.

Bu əlamətdar gün münasibətilə Rəqəmsal İnkişaf və Nəqliyyat Nazirliyinin tabeliyində fəaliyyət göstərən Dövlət Dəniz və Liman Agentliyinin, "Azərbaycan Xəzər Dəniz Gəmiçiliyi” Qapalı Səhmdar Cəmiyyətinin kollektivi Fəxri xiyabana gələrək Ümummilli Liderin xatirəsini dərin ehtiramla yad edib, məzarı önünə əklil və gül dəstələri qoyublar. 

Sonra Şəhidlər xiyabanına gələn ziyarətçilər Azərbaycanın müstəqilliyi və ərazi bütövlüyü uğrunda mübarizədə canlarından keçən qəhrəman Vətən övladlarının xatirəsini ehtiramla yad edib, məzarları üzərinə gül dəstələri düzüblər.

Daha sonra Dövlət Dəniz və Liman Agentliyinin inzibati binasında "Dənizçi günü”nə həsr olunan tədbir keçirilib.

Dövlət himni səsləndirildikdən, Azərbaycanın müstəqilliyi və ərazi bütövlüyü uğrunda şəhid olmuş qəhrəman Vətən övladlarının əziz xatirəsi bir dəqiqəlik sükutla yad edildikdən sonra tədbiri giriş sözü ilə açan agentliyin İdarə Heyətinin sədri Arif Məmmədov ilk olaraq həyatlarını çətin, şərəfli peşəyə həsr edən dənizçilərimizi təbrik edib və onlara məsuliyyətli işlərində uğurlar arzulayıb. Azərbaycanda dənizçilik sahəsinin şanlı tarixə sahib olduğu və bu tarixin yazılmasında ulu öndərin əvəzsiz xidmətlərindən danışıb. Agentlik sədri bildirib ki, Azərbaycanda dənizçiliyin inkişafına birbaşa və həlledici təsirləri olan "Əsrin müqaviləsi” neft sazişi, Böyük İpək Yolunun bərpası və Beynəlxalq Dəniz Təşkilatına üzvlüyümüz ümummilli liderin adı ilə bağlıdır.

İdarə Heyətinin sədri vurğulayıb ki, bu gün dənizçilik sahəsi yeni inkişaf mərhələsindədir. Bu baxımdan 2013-cü ildən bu günə kimi Xəzər Dəniz Donanmasına 20-dən çox yeni gəminin alınması, müasir gəmilər inşa edən Bakı Gəmiqayırma Zavodunun inşası, Xəzər dənizində ən böyük liman olan Bakı Beynəlxalq Dəniz Ticarət Limanının salınması bu mərhələnin bariz nümunələri kimi göstərilib.

Agentliyin İdarə Heyətinin sədri dəniz nəqliyyatı sektorunun rəqabətədavamlı şəkildə inkişafı məqsədilə 2021-ci ilin oktyabr ayında Prezidentin müvafiq Fərmanı ilə Dövlət Dəniz və Liman Agentliyi yaradıldıqdan sonra həyata keçirilən mühüm islahatlardan da danışıb.

Dövlət Dəniz və Liman Agentliyinin dənizçilərin hazırlığı sistemində atdığı addımlar, xüsusilə dənizçilərə diplomların (sertifikatlar) verilməsi prosesinin sadələşdirilməsi, qurumun Beynəlxalq Dəniz Təşkilatının 2022-ci il auditindən uğurla keçməsi və dənizçilərin hazırlığı sisteminin Beynəlxalq Dəniz Təşkilatının "Ağ siyahı”sında yer alması və bunun Azərbaycan dənizçiləri üçün faydaları xüsusilə vurğulanıb.

Arif Məmmədov çıxışının sonunda Dövlət Dəniz və Liman Agentliyinin bundan sonra da dəniz nəqliyyatı sahəsində idarəetmə, tənzimləmə, nəzarət mexanizmlərinin təkmilləşdirilməsi, bu sahədə dövlət tənzimlənməsi istiqamətində həyata keçirilən işin optimallaşdırılması və rəqabətədavamlı dəniz nəqliyyatı sahəsinin formalaşdırılması məqsədilə əzmlə çalışacağını qeyd edib.

Tədbirin sonunda "Dənizçi günü” münasibətilə Azərbaycanda dəniz nəqliyyatının inkişafında xidmətlərinə görə bir qrup dənizçi "Donanmanın fəxri işçisi” və "Uzaq səfərlər kapitanı” döş nişanları ilə təltif olunub.

 

 

Goranboyda 23 yaşlı kişiyə kəsici alətlə xəsarət yetirilib
 
 
 

Goranboyda yerli sakinə kəsici alətlə xəsarət alıb.

"Report” xəbər verir ki, Yuxarı Ağcakənd qəsəbəsində qeydə alınıb.

Rayon sakini, 23 yaşlı T.Cavadov sol qoltuq altı nahiyəsindən kəsici alətlə xəsarət alıb.

O, xəstəxanaya aparılıb.

Hadisənin hansı şəraitdə və kim tərəfindən törədildiyi hələ məlum deyil.

Faktla bağlı araşdırmalara başlanılıb.

Azərbaycanda şəkər tozunun qiyməti artdı
 
 
 

Azərbaycanda şəkər tozunun topdansatış qiymətində artım qeydə alınıb.

"Unikal”ın məlumatına görə, Bakıda şəkər tozunun 50 kiloqramlıq bir kisəsinin qiyməti 75 manata təklif olunur. İndiyədək həmin məhsul 67 manata satılırdı.

Bölgələrdə isə 50 kiloqramlıq şəkər tozunun bir kisəsinin qiyməti 50-75 manat arasında dəyişir.

Universitetlərin az bal toplayan tələbələrdən ikibaşlı qazancı - RƏY

"Universitetlərin tələsinə baxın! Bütün qruplarda 150 ballıq ixtisaslar var. Həmin ixtisasların illik təhsil haqqı ən prestijli ixtisasların bir çoxunun illik təhsil haqqından daha bahadır. Çünki, universitetlər bilir ki, 150-200 bal aralığı yığanlar əlacsızlıqdan "təki qəbul olum” prinsipilə məhz həmin ixtisasları yazacaqlar və nəticədə universitet qazanacaq”.

Bu sözləri təhsil eksperti Elçin Əfəndi "Facebook” hesabında qeyd edib.

Onun sözlərinə görə universitetlər bilir ki, 150 ballıq ixtisasa 150-200 bal aralığı nəticə əsasında qəbul olan tələbənin potensialı zəifdir və o, 100% semestr imtahanlarında kəsiləcək:

"Nəticədə fənn üzrə kredit ödəyəcək. O kredit də yenə universitetin büdcəsinə gedir. Beləliklə, hər iki halda qazanan universitetdir. IV kursa kimi birtəhər gələn tələbəni dövlət imtahanında 3-5 min almaqla keçirirsiniz.

Bir də illik təhsil haqları, kəsrlərlə tələbələri vurmayın! Türkiyədə elə universitetlər var ki, təhsil keyfiyyətinə bizim bir çox universitet yaxın gedə bilməz, amma həmin universitetin illik təhsil haqqı 300-700 manat aralığındadı. Bir sözlə bizim bəzi universitetlərin 1 illik təhsil haqqı ilə Türkiyədə 4 illik təhsil haqqını bağlamaq olar. Ona görə də vətəndaş Türkiyə və başqa ölkələrin universitetlərinə üz tutur”.

Axtarış
Xəbər lenti
Reklam