Qurban Qurbanov: “Baş məşqçi dəyişikliyi məni ən çox narahat edən məqamlardan biridir”
"Bu matçda futbolçuların üzərinə çox böyük məsuliyyət və güc düşəcək”.

"Report”un məlumatına görə, bunu "Qarabağ”ın baş məşqçisi Qurban Qurbanov "Olimpiakos”a qarşı UEFA Avropa Liqasının qrup mərhələsinin III tur oyunu üçün Yunanıstana səfər öncəsi Heydər Əliyev Beynəlxalq Aeroportunda jurnalistlərə açıqlamasında deyib.

50 yaşlı mütəxəssis Afinadakı görüşdə qələbə qazanmaq istədiklərini bildirib:

"Amma hər şeyi nəzərə almaq lazımdır. Rəqib komandada qrupdakı iki məğlubiyyətdən sonra dərhal baş məşqçi dəyişikliyi baş verib. İddialarının çox olduğu görünür. Bu matça da ciddi hazırlaşıblar. Baş məşqçi dəyişikliyi məni ən çox narahat edən məqamlardan biridir. Dəfələrlə belə hallar yaşanıb. Hər şeyin qaydasında olmasını istəyirik. Rəqib bizi daha yaxşı tanıyır. Hər halda, bütün bunlar bizə təcrübə verir. Daha diqqətli və istəkli olmağa çalışacağıq. Belə qarşılaşmalarda bəzi detallara diqqət ayırmalıyıq. Hansı ki hazırda bunları bilmirik və oyun vaxtı görəcəyik”.

Təcrübəli baş məşqçi səfərə bir gün əvvəl yollanmalarına da aydınlıq gətirib:

"Bəzən proqramda dəyişiklik olur. Hazırlaşmaq üçün vaxtımız az idi. Buna görə əsas məşqlərimizi Bakıda etmək istədik. Hazırlıqlar pis keçməyib, futbolçuların durumu da əvvəlki günlərə nisbətən daha yaxşıdır. "Olimpiakos”a yeni rəqib deyə bilərəm. Çünki son qarşılaşmada yeni baş məşqçinin rəhbərliyi altında fərqli oyun sərgilədilər. Onlarla yaxından tanış olduq. Yunanıstana yaxşı oyun göstərmək üçün gedirik. Komandada da hər şey qaydasındadır”.

Qurbanov zədəli Marko Yankoviçin durumu barədə də danışıb:

"Neftçi” ilə matçdan sonra durumu bir az ağır oldu. Amma dünən fərdi qaydada məşq etdi. Bu gün klinikadan birbaşa hava limanına gəlib. Hər şey yaxşılığa doğru gedir. Sabahadək vaxtımız var. Onunla bağlı qərarı oyun günü verəcəyik. Digər oyunçularda isə hər şey qaydasındadır”.

Qeyd edək ki, oktyabrın 6-da "Georgios Karaiskakis” stadionunda keçiriləcək "Olimpiakos” - "Qarabağ” görüşü Bakı vaxtı ilə saat 23:00-da başlayacaq.
Avropa Kuboku: Azərbaycan komandaları növbəti qələbələrini qazandılar
 
 
 
 

Kişilərdən ibarət "Vüqar Həşimov” və qadınlardan ibarət "Odlar Yurdu” komandası Avstriyanın Mayrhofen şəhərində keçirilən Avropa Şahmat Klub Kubokunda növbəti oyunlarını keçirib.

"Report”un məlumatına görə, "Vüqar Həşimov” II turda İsveçin "Stockholms” kollektivini sınağa çəkib.

Görüş Azərbaycan təmsilçisinin 4,5:1,5 hesablı qələbəsi ilə başa çatıb.

"Odlar Yurdu” isə Ukraynanın "Blue & Yellow” klubu ilə üz-üzə gəlib və rəqibini 3:1 hesabı ilə məğlub edib.

Kişilər

II tur

"Vüqar Həşimov” - "Stockholms” - 4,5:1,5

Kiril Şevçenko - Lars Hauge - 1:0

Misrətdin İskəndərov - Can Ertan - 0,5:0,5

Vüqar Əsədli - Erik Torn - 0:1

Əhməd Əhmədzadə - Karl Sederstam - 1:0

Ülvi Sadıxov - Nils-Qustam Rehman - 1:0

Xəzər Babazadə - Felik Tuomainen - 1:0

Qadınlar

"Blue & Yellow” - "Odlar Yurdu” - 1:3

Natalya Buksa - Günay Məmmədzadə - 0,5:0,5

İnna Qaponenko - Ülviyyə Fətəliyeva - 0:1

Yevgeni Doluxanova - Xanım Balacayeva - 0,5:0,5

Diana Tarleva - Gövhər Beydullayeva - 0:1

Qeyd edək ki, "Vüqar Həşimov” komandası ilk turda İngiltərə "Şarks”ını, "Odlar Yurdu” isə Fransa "Filidor”unu məğlub edib.

Avropa Liqasının oyunları bir dəqiqəlik sükutla başlayacaq


Bu həftə UEFA Avropa Liqasının qrup mərhələsinin bütün oyunları bir dəqiqəlik sükutla başlayacaq.

Məlumatı UEFA-nın rəsmi saytı dərc edib.

Qeyd olunur ki, İndoneziya çempionatında "Arema”-"Persebaya” klubları arasında baş tutan (2:3) oyundan sonra baş verən iğtişaşlar nəticəsində dünyasını dəyişənlərin xatirəsinə ehtiram əlaməti olaraq matçlar bir dəqiqəlik sükutla başlayacaq.

Xatırladaq ki, Ağdamın "Qarabağ” klubu bu həftənin cümə axşamı UEFA Avropa Liqasının qrup mərhələsi çərçivəsində Yunanıstanda "Olimpiakos” klubunun qonağı olacaq. Görüş Bakı vaxtı ilə saat 23:00-da başlayacaq.
Şəhriyar Məmmədyarova texniki qələbə verilib



Azərbaycan şahmatçısı Şəhriyar Məmmədyarov ABŞ-ın Sent Luis şəhərindəki "Grand Chess Tour”un sonuncu mərhələsi olan "Sinkfild Kuboku”nda ilk qələbəsini qazanıb.

"Report”un məlumatına görə, 37 yaşlı qrossmeyster 4-cü turda norveçli Maqnus Karlsenlə üz-üzə gəlməli idi. Lakin dünya çempionu turnirdən imtina etdiyi üçün görüş baş tutmayıb. Nəticədə Məmmədyarova texniki qələbə verilib.

Karlsenin əvvəlki turlardakı nəticələri ləğv olunacaq.

Qeyd edək ki, hazırda 2 xalla turnir cədvəlinin 4-cü pilləsində qərarlaşıb.
Azərbaycanlı karateçi Bakıdakı yarışda çəki probleminə görə iştirak edə bilməyib



Azərbaycanlı karateçi Fəridə Əliyevanın Bakıda keçirilmiş Premyer Liqa yarışında iştirak etməməsinin səbəbi bilinib.

"Report”un xəbərinə görə, 68 kiloqramdan yuxarı çəkidə çıxış etməli olan idmançının çəkisi qaydasında olmayıb.

İdmançı yarışdan əvvəl xəstələndiyindən, çəkisi 68 kiloqramdan aşağı olub. WKF (Ümumdünya Karate Federasiyası) isə onun yarışda iştirak etməsinə icazə verməyib.

Qeyd edək ki, bu çəkidə Ayaka Saito (Yaponiya) Anastasiya Stepaşkoya (Ukrayna) 4:1 hesabı ilə qalib gələrək, karyerasında ilk dəfə Premyer Liqa titulunu qazanıb.

Xatırladaq ki, ilk dəfə Bakıda keçirilmiş Premyer Liqa yarışında Azərbaycan tarixi nailiyyətə imza atıb. 3 qızıl və 3 bürünc medal qazanan Azərbaycan medal sıralamasında yalnız karatenin yaradıcısı Yaponiyadan geri qalıb.


"Mançester Yunayted” hücumçusu Kriştianu Ronaldunun maaşını 25% azaldıb.

Bildirilir ki, klub 2022/23 mövsümündə Çempionlar Liqasına vəsiqə qazana bilmədiyi üçün bu addımı atıb. Portuqaliyalının müqaviləsində müvafiq variant nəzərə alınıb.

Futbolçu isə "Mançester Yunayted”in bu qərarından son dərəcə narazı qalıb, çünki o, ötən mövsüm komandanın çıxışına ciddi töhfə verdiyini düşünür və 18 qol vurduğunu deyir.

Xatırladaq ki, bundan əvvəl Ronaldunun agenti Xorxe Mendeşin müştərisini "Napoli”yə transfer etməyə çalışdığı barədə məlumatlar yayılmışdı. Bildirilirdi ki, bu müqavilənin bir hissəsi olaraq, nigeriyalı hücumçu Viktor Osimhen əks istiqamətdə hərəkət edə bilər. Lakin "Napoli”də açıq şəkildə bildirildi ki, Osimheni ingilis klubuna yalnız "qırmızı şeytanlar”ın 100 milyon avro ödəyəcəyi və Ronaldunu icarəyə verəcəyi təqdirdə buraxacaqlar. Eyni zamanda mankunianlılar 37 yaşlı portuqaliyalının maaşının böyük hissəsini ödəməlidirlər.




Bu gün adını tarixə qızıl hərflərlə yazdıran cüdoçu Nazim Hüseynovun ad günüdür
 
 
 
 

Bu gün ölkəmizi beynəlxalq miqyasda layiqincə təmsil edərək adını tarixə qızıl hərflərlə yazdıran cüdoçu Nazim Hüseynovun ad günüdür.

N.Hüseynov 1969-cu ilin 2 avqust tarixində Bakı şəhərində anadan olub. 

Hələ uşaq yaşlarından idmana maraq göstərən Nazim bir neçə dəfə SSRİ birinciliyində çempion olmaqla yanaşı bir neçə dəfə də mükafatçılar siyahısında olub.

Dünya cüdo arenasında ilk dəfə 1991-ci ildə Budapeştdə keçirilən super dünya kubokunda fəxri kürsünün ən yüksək pilləsinə qalxıb.

N.Hüseynov 1992-ci ildə Barselonada keçirilən XXV Yay Oyunlarında qızıl medala sahib olaraq müstəqil Azərbaycanın ilk Olimpiya Çempionu kimi tarixə düşüb.

Qeyd edək ki, bu il həmin qələbənin üzərindən 30 il ötür.

“Qarabağ”ın İsveçrəyə səfər proqramı açıqlanıb

UEFA Çempionlar Liqasının II təsnifat mərhələsinin cavab oyununda "Sürix”lə üz-üzə gələcək "Qarabağ”ın İsveçrəyə səfər proqramı açıqlanıb.

"Report”un məlumatına görə, "köhlən atlar” iyulun 27-də İsveçrəyə yollanacaq.

Komandanı Sürix şəhərinə aparacaq təyyarə saat 17:30-da Heydər Əliyev Beynəlxalq Hava Limanından yola düşəcək.

İyulun 26-da Bakı vaxtı ilə saat 20:40-da baş məşqçi Qurban Qurbanovun mətbuat konfransı, saat 21:00-da komandanın açıq məşqi olacaq.

Qeyd edək ki, iyulun 27-də keçiriləcək qarşılaşma Bakı vaxtı ilə saat 21:00-da start götürəcək. İlk matçda Azərbaycan təmsilçisi 3:2 hesabı ilə qalib gəlib.

“Aris”-“Neftçi” qarşılaşması start götürdü
UEFA Konfrans Liqasında daha bir Azərbaycan təmsilçisi mübarizəyə başlayıb.

"Neftçi” komandası II təsnifat mərhələsinin ilk oyununda Kiprin "Aris” kollektivinin qonağıdır.
Teymur Rəcəbov Azərbaycan millisi ilə Olimpiadada iştirakdan imtina etdi - FOTO
Azərbaycanlı qrosmeyster Teymur Rəcəbov 44-cü Ümumdünya Şahmat Olimpiadasında millinin heyətində iştirakdan imtina edib.

Məlumata görə, bu barədə onun komanda yoldaşı Vasif Durarbəyli "Facebook” hesabında paylaşım edib.

O, Rəcəbovu bu addımına görə qınayıb:

"Komanda yoldaşı ilə problem olmaması üçün uzun müddətdir bu mövzuda fikir yazmaqdan yayınırdım. Birdən Teymur Rəcəbov fikrini dəyişər və millidə oynayar, amma bu baş vermədi. Adının nə qoyulacağını tezliklə bilərik”.

Durarbəylinin sözlərinə görə, Teymurun Hindistana yollanmaması yığmamızın medal qazanmaq şansını azaldacaq:

"Bu dəfə Azərbaycanın ilk olimpiya medalı qazanmaq üçün tarixi şansı yaranmışdı. Prinsipcə, hələ də itməyib, lakin açıq danışmaq lazımdırsa, Azərbaycanda Rəcəbovu əvəzləyəcək şahmatçı yoxdur və onun getməməsi medal şansını xeyli azaldır. Bu məqamda xatırlatmaq yerinə düşər ki, Rəcəbovun bu mövqeyə çatması üçün dövlət milyonlar xərcləyib. Təbii ki, belə borcu ödəmək mümkünsüzdür. Fəqət, ən azı, şəxsi şahmata davam edilən müddətdə yığmada oynamaq şərtdir. Şəxsi turnirlərdə hər kəs sırf öz mənfəəti, yığmada isə ümumi xeyir üçün iştirak edir”.

Millinin üzvü komanda yoldaşının geridə qalan müddət ərzində buna bənzər addımlara tez-tez əl atdığını da xatırladıb:

"Kimisi Məmməd Arazın "Vətən mənə oğul desə, nə dərdim, mamır olub, qayasında bitərdim” kəlamını əyani həyatımızda nümayiş etdirir. Kimisi də Rəcəbov kimi, milyonlarla yatırım alır, amma sonsuz mənəvi məsuliyyətinin olduğunu, görünür, dərk etmir. 2019-cu ildə son anda yorğunluğu bəhanə edib komandanı yarıyolda qoymaq, 2021-ci ildə səkkiz oyun mübarizəsiz heç-heçələr, indiki imtina və hələ bildiyim, amma bölüşmədiyim bir çox qeyri-ictimai məlumatlar mənə bunu deməyə əsas verir. Qısası, məncə, Rəcəbov iki əli qanda olsa belə, özünü bu Olimpiadaya yetirməli idi! Etmədiyinə görə də onu qınayıram”.

Qeyd edək ki, Rəcəbovu Olimpiadada əvəzləyəcək şahmatçı da artıq bəlli olub. Bu, 35 yaşlı qrosmeysterin əvəzinə Hindistana kapitan kimi getməli olan Nicat Abasovdur. Komandada onunla yanaşı, Şəhriyar Məmmədyarov, Rauf Məmmədov, Qədir Hüseynov və Vasif Durarbəyli yer alacaqlar.
Axtarış
Xəbər lenti
Reklam