BTQ ilə Türkiyədən Çinə üçüncü ixrac qatarı yola salınıb
Türkiyənin daha bir ixrac yük qatarı Bakı- Tbilisi – Qars (BTQ) dəmir yolu ilə Çinə göndərilib.
 
Bu barədə "Azərbaycan Dəmir Yolları” QSC-nin (ADY) törəmə müəssisəsi "ADY Konteyner”dən bildirilib.
 
Məlumatda deyilir ki, Kösəköy stansiyasından yola çıxan konteyner blok qatarının son təyinat məntəqəsi Çinin Sian şəhəridir: "Qatar hər biri 40 futluq olmaqla 41 konteynerdən ibarətdir. Yükü isə Türkiyə istehsalı olan elektrik avadanlıqlarıdır. Qatar Bakı- Tbilisi – Qars dəmir yolu ilə hərəkət edərək Bakıya çatdıqdan sonra fider gəmisi vasitəsilə Qazaxıstanın Aktau limanına yola salınacaq. Daha sonra isə yolunu dəmir yolu ilə davam etdirəcək. Bu, qardaş ölkədən dünyanın ən iri iqtisadiyyatlarından biri olan Çinə yola salınan sayca üçüncü ixrac qatarıdır”.
 
Xatırladaq ki, BTQ 30 oktyabr 2017-ci ildə istismara verilib. Dəmir yolu xətti Asiya və Avropanın dəmir yol şəbəkələrinin birləşdirilməsini təmin edir, iki qitə arasında ən qısa yoldur. BTQ yüklərin daşınmasına sərf edilən vaxtı 2 dəfədən çox qısaltmağa imkan verir, Mərkəzi Asiya ölkələrinin – Türkmənistan, Qazaxıstan, Özbəkistan, Qırğızıstan, Tacikistan və Əfqanıstanın Avropa və dünya bazarlarına çıxışını asanlaşdırır.
 
Ümumi uzunluğu 846 kilometr olan dəmir yolu xəttinin 504 kilometri Azərbaycan, 263 kilometri Gürcüstan, 79 kilometri isə Türkiyə ərazisindədir. Bu yol vasitəsilə birinci mərhələdə 5 milyon ton, ondan sonrakı mərhələdə 17 milyon ton, ondan sonra isə daha böyük həcmdə yüklərin daşınması nəzərdə tutulur.
Azərbaycanda iqtisadi artım üzrə İşçi Qrup yaradılıb
Azərbaycanda "2021-2025-ci illərə dair sosial-iqtisadi inkişaf Strategiyası”nın hazırlanması məqsədilə dayanıqlı artan rəqabətqabiliyyətli iqtisadiyyat üzrə alt İşçi Qrup yaradılıb.
 
İşçi Qrupun tərkibi aşağıdakı kimidir:
 
İşçi Qrupun rəhbəri
 
İqtisadiyyat naziri
 
İşçi Qrupun üzvləri:
 
İqtisadiyyat nazirinin müavini
Maliyyə nazirinin müavini
Əmək və Əhalinin Sosial Müdafiəsi nazirinin müavini
Mərkəzi Bankın sədrinin müavini
Kənd Təsərrüfatı nazirinin müavini
Nəqliyyat, Rabitə və Yüksək Texnologiyalar nazirinin müavini
Energetika nazirinin müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
Dövlət Turizm Agentliyi sədrinin müavini
Dövlət Şəhərsalma və Arxitektura Komitəsi sədrinin müavini.
 
Həmçinin strategiyanın hazırlanması məqsədilə makroiqtisadi dayanıqlılıq üzrə alt İşçi Qrup yaradılıb. Onun isə tərkibi aşağıdakı kimidir:
 
İşçi Qrupun rəhbəri
 
Mərkəzi Bankının sədri
 
İşçi Qrupun üzvləri:
 
Maliyyə nazirinin müavini
İqtisadiyyat nazirinin müavini
Əmək və Əhalinin Sosial Müdafiəsi nazirinin müavini
Dövlət Neft Fondunun icraçı direktorunun müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
 
Bundan başqa, aşağıdakı tərkibdə Strategiyanın hazırlanması məqsədilə dayanıqlı dövlət borcu və büdcə sabitliyini təmin edən Makro-Fiskal Çərçivə üzrə alt İşçi Qrup yaradılıb.
 
İşçi Qrupun rəhbəri
 
Maliyyə naziri
 
İşçi Qrupun üzvləri:
 
Maliyyə nazirinin müavini
İqtisadiyyat nazirinin müavini
Əmək və Əhalinin Sosial Müdafiəsi nazirinin müavini
Mərkəzi Bankın sədrinin müavini
Dövlət Neft Fondunun icraçı direktorunun müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
 
Xatırladaq ki, Baş Nazir Əli Əsədov "Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında” ölkə Prezidentinin 2021-ci il 2 fevral tarixli sərəncamı ilə verilmiş tapşırıqların və uyğun olaraq qarşıda duran məsələlərin icrasının təmin edilməsi haqda sərəncam imzalayıb. "2021-2025-ci illərə dair sosial-iqtisadi inkişaf Strategiyası”nın hazırlanması məqsədilə yaradılmış Komissiyanın 5 prioritet istiqamət üzrə fəaliyyət göstərəcək 10 alt işçi qrupu yaradılıb və onlara müvafiq tapşırıqlar verilib.

Kəlbəcərə yeni yolun çəkilişinə nə vaxt başlanılacaq? - AÇIQLAMA
Kəlbəcərə hələ ki Gəncə-Göygöl-Toğana kəndindən keçən yolla getmək mümkündür. 
 
Bunu Azərbaycan Avtomobil Yolları Dövlət Agentliyinin (AAYDA) idarə heyətinin sədri Saleh Məmmədov deyib. 
 
O deyib ki, tarixi Kəlbəcər yolu olan Tərtər-Ağdərə-Kəlbəcər yolundan istifadə edə bilmirik:
 
"O yoldan hələ ki sülhməramlılarla birgə keçə bilirik. Lakin ölkə başçısı Azərbaycan xalqının rahat gediş-gəlişi üçün yeni yolun çəkilməsini tapşırıb. 
 
"Ev yolu” adlandırılan bu yol 3263 metr yüksəklikdə olan Ömər zirvəsindən keçəcək. Yol birinci texniki dərəcəyə uyğun və 4 zolaqlı olacaq. Bu yol üzərində hazırlanan layihə artıq hazırdır. Ölkə başçısına təqdim olunacaq.
 
Yəqin ki, təsdiq olunduqdan və yolun inşasında çalışacaq şirkətlər dəqiqləşdiqdən sonra bu ilin mart ayından Kəlbəcərə yeni yolun çəkilişinə başlanılacaq”.

Azərbaycan ordusunun keçirdiyi uğurlu hərbi əməliyyatlardan sonra bəzi erməni quldurlarının Dağlıq Qarabağda separatçılıq fəaliyyəti ilə məşğul olması narahatlıq yaradır.
 
Bu barədə "Caliber” layihəsinin "Youtube” kanalında yerləşdirilən növbəti videoda qeyd edilir.
 
Videoda bildirilir ki, bəzi nankorlar hətta ordumuzun qazandığı zəfərin nəticələrini şübhə altına almağa çalışırlar.
 
"Caliber” layihəsi belə şəxslərin əsas arqumentlərini və miflərini dağıtmağa çalışıb.
 

 

Özbəkistanda

 2021-ci ilin Azərbaycan Respublikasının Prezidenti İlham Əliyev tərəfindən "Nizami Gəncəvi ili” elan olunması ilə əlaqədar Özbəkistandakı Heydər Əliyev adına Azərbaycan Mədəniyyət Mərkəzi tərəfindən bu ölkədə dahi şairə həsr olunmuş silsilə tədbirlərin keçirilməsi və layihələrin icrası nəzərdə tutulmuşdur.

 

Daşkənddə Azərbaycan Mədəniyyət Mərkəzində keçirilən Özbəkistanda "Nizami Gəncəvi ili”nin açılış mərasimində ölkənin elm, təhsil, mədəniyyət xadimləri, Nizami adına Daşkənd Dövlət Pedaqoji Universitetin müəllim və tələbə heyəti, aparıcı universitetlərin mütəxəssisləri, Özbəkistan Milli Elmlər Akademiyası, Yazıçılar Birliyi, Dostluq Cəmiyyətinin rəhbərliyi, tərcüməçi-alimlər iştirak etmişlər.

Azərbaycan Mədəniyyət Mərkəzinin foyesində Nizami Gəncəvi ilinə həsr olunmuş xüsusi sərgi və kompozisiyanın açılış lenti kəsildikdən sonra, tədbir iştirakçıları dahi şairə həsr olunmuş sərgilərlə tanış olmuşlar, Nizaminin yeddi gözəl əsərindən personajlar, habelə şairin Mədəniyyət Mərkəzinin layihəsi ilə yenicə Özbək dilində çapdan çıxmış əsərləri təqdim edilmişdir. Mərkəzin rəsm dərnəyinin şagirdlərinin rəsmləri, Nizaminin hikmətli sözlərindən ibarət sərgi və miniatürlərin yaradılması üzrə master-klaslar keçirilmişdir.

 

Əlişir Nəvai adına Daşkənd Dövlət Özbək dili və ədəbiyyatı Universitetinin tələbələrinin dahi Nizami Gəncəvinin əsərlərindən hazırladıqları bədii kompozisiya tədbir iştirakçılarına təqdim edilib.

Özbəkistanda "Nizami Gəncəvi ili” ilinin açılış mərasimində giriş sözü ilə çıxış edən Heydər Əliyev adına Azərbaycan Mədəniyyət Mərkəzinin direktoru Samir Abbasov Azərbaycan Respublikası Prezidenti İlham Əliyevin Sərəncamı ilə 2021-ci ildə "Nizami Gəncəvi ili” elan olunması ilə əlaqədar Özbəkistanda da çoxsaylı tədbirlər və layihələrin reallaşdırılacağını qeyd edib. O, Özbəkistan mətbuatı arasında Azərbaycan haqqında elan olunan müsabiqənin bir əsas nominasiyasının "Nizami Gəncəvi – Azərbaycan və dünya poeziyasının dahisidir” mövzusu üzrə elan edildiyini, il ərzində "Nizami Gəncəvinin həyat və yaradıcılığı” mövzusunda türk dünyasının Nizamişünas alimlərin iştirakı ilə Daşkənddə beynəlxalq elmi konfransın, mərkəzi sərgi salonunda Nizaminin əsərlərindən ibarət Özbəkistan, Azərbaycan və Türkiyədə saxlanılan miniatürlərin surətlərinin sərgisinin keçiriləcəyini bildirib.

Diplomat  Nizami Gəncəvinin irsinin dünyada geniş təbliğ edildiyini, dahi şairin Ulu öndər Heydər Əliyevin rəhbərliyi və iştirakı ilə 840 illik yubileyinin, daha sonra Prezident İlham Əliyev göstərişi ilə 2011-ci ildə ədibin 870 illik yubileyinin dövlət səviyyəsində qeyd olunduğunu bildirib. Samir Abbasov Nizami Gəncəvi yaradıcılığı, Nizami və Nəvai arasında ədəbi bağlılıq, dahi şairlərin dünya mədəniyyətinə verdiyi töhvələr barədə məruzə edib.  

Özbəkistan – Azərbaycan Dostluq Cəmiyyətinin icraçı direktoru, Nizami adına Daşkənd Dövlət Pedaqoji Universitetin professoru Erkin Nuriddinov 2021-ci ilin Azərbaycan və Özbək xalqları üçün əlamətdar olduğunu, Nizami Gəncəvinin 880 illik, Əlişir Nəvainin 580 illik yubileylərinin geniş qeyd olunduğunu söyləyib. O, hər iki şəxsiyyətin Türk dünyasının iftixarı olduğunu, onların yaradıcılıqlarının gələcək nəsillərin daha çox öyrənmələrinin vacib olduğunu bildirib. E. Nuriddinov Nizami Gəncəvi şəxsiyyətinin özündən sonrakı şairlərinin yaradıcılığına, Azərbaycan-Özbəkistan dostluğuna təsiri barədə məruzə edib.

 

Azərbaycan Mədəniyyət Nazirliyinin rəsmisi, müşavir Elnur Əliyev tədbirə videomüraciətlə qatılaraq nazir Anar Kərimovun tədbir iştirakçılarına salamlarını çatdırmış, Özbəkistanla əlaqələrə mühüm əhəmiyyət verildiyini, qardaş xalqların tarixi yaxınlığından danışaraq, Nizami Gəncəvinin bütün Türk dünyasının şairi olduğunu qeyd edib.

Elnur Əliyev Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə 2015-ci ildə başlanmış Nizami Gəncəvinin "Xəmsə”sinin Özbək dilinə çevrilməsini tarixi hadisə adlandırmış və yüksək qiymətləndirmişdir. Tədbirin işinə uğurlar arzu edən nazirlik rəsmisi Nizami Gəncəvinin irsinin bütün Türk və İslam dünyası üçün əhəmiyyətli olduğunu və xalqlarımızı bir-birinə daha da yaxınlaşdıracağını qeyd edib.

 

Çıxış edən Özbəkistan Yazıçılar Birliyinin sədr müavini, şair Qayrat Məcid, Milli Elmlər Akademiyasının Ədəbiyyat, Dilçilik, Folklor İnstitutunun direktoru, professor Nizaməddin Maxmudov, Biruni adına Daşkənd Şərqşünaslıq Universitetinin dosenti Atxanbek Olimbekov Nizami əsərlərinin dəfələrlə Özbək dilinə çevrilməsi cəhdinin olduğunu, lakin şairin bütöv irsinin davamlı olaraq Özbək dilinə çevrilməsi və nəşri işinin  məhz, Azərbaycan Mədəniyyət Mərkəzinin sifarişi ilə Özbəkistanın xalq şairi Camal Kamal tərəfindən həyata keçirildiyini qeyd ediblər. Nizami Gəncəvi yaradıcılığına Özbəkistanda böyük maraq olduğunu, Daşkənddə dahi şairin büstünün, onun adını daşıyan Pedaqoji Universitetin fəaliyyət göstərdiyini vurğulayıblar.

Azərbaycanlı türkoloq alim, professor Ramiz Əskər videomüraciətlə tədbirə qoşularaq Nizami Gəncəvi və Əlişir Nəvai yaradıcılıqları, onların ədəbiyyatımıza gətirdiyi töhvələrdən söhbət açıb. O, Şərq dünyasında şeir, poema janrına yeni bir üslub gətirən Nizaminin "Xəmsə”sinin təkrarsız olduğunu, xalqımızın Nizami kimi böyük şəxsiyyətə malik olmasını onun xoşbəxtliyi kimi səciyələndirib.

 

Daha sonra Nizami Gəncəvi ili ilə bağlı hazırlanmış videomaterial nümayiş etdirilib. Video-materialda ulu öndər Heydər Əliyevin dahi şairə həsr olunmuş tədbirlərdə iştirakı, Azərbaycan Respublikasının Prezidenti İlham Əliyev və birinci vitse prezidenti Mehriban Əliyevanın Nizami Gəncəvinin dünyanın aparıcı şəhərlərində heykəllərinin açılışı mərasimlərində iştirakı, Nizami Gəncəvi ili ilə bağlı planlaşdırılan tədbirlər öz əksini tapıb.

 

Özbəkistanın tanınmış makom ustası, deosent Davron Kadırov Nizaminin əsərlərindən ibarət çıxışı iştirakçılar tərəfindən maraqla qarşılanıb.

Bakı-Quba-Rusiya yolunun tərkib hissəsi olan magistralın tikintisi davam etdirilir - FOTO
Bakı-Quba-Rusiya Federasiyası ilə dövlət sərhədi yeni avtomobil yolunun "Yaşma bağları” yaşayış məntəqəsindən başlayan və 150 km uzunluğunda olan 4 hərəkət zolaqlı yeni yol 1b texniki dərəcəyə uyğun olaraq inşa edilir.
 
Agentlikdən bildirilib ki, layihədə tikinti işləri 5 hissə üzrə aparılır.
 
Artıq ödənişli avtomagistralın Xızı rayonunun Yaşma və Giləzi qəsəbələri arasında yerləşən 30 km-lik 1-ci hissəsi üzrə tikinti işləri tamamlanıb.
 
Layihə üzrə 2 yol qovşağı, 1 yol ötürücüsü, 1 kanal körpüsü, 4 düzbucaqlı yeraltı avtomobil keçidi, 33 müxtəlif ölçülərdə düzbucaqlı və dairəvi beton boruların tikintisi, müxtəlif köçürülmə işləri yolun ayırıcı zolağında ümumilikdə cəmi 31 min p/m beton baryerlərin tikintisi icra olunub.
 
Hazırda tikinti işləri yeni magistralın 5-ci, Şabran rayonunun Gəndob kəndi və Qusar rayonunun Samur qəsəbəsi (Rusiya sərhədi) arasında yerləşən hissəsi üzrə sonuncu mərhələdə davam etdirilir. Bu hissədə isə yeni yol yatağı və əsasın tikintisi, süni qurğuların inşası işləri yekunlaşmaq üzrədir. Buna paralel olaraq hazırda sözügedən hissədə asfalt-beton örtüyünün döşənməsi işləri də icra olunur. ​Yeni istiqamət üzrə inşa edilən və mövcud magistral avtomobil yolundan 13 km qısa olan sözügedən hissənin uzunluğu isə 58 km-dir.
 
Qalan 62 km-lik 3 hissə üzrə isə hazırda torpaq yatağının və yol əsasının inşası, qovşaq, yol ötürücüsü, yeraltı keçid, suötürücü boruların tikintisi və müxtəlif köçürülmə işləri davam etdirilir. Ümumilikdə sözügedən hissələrdə tikinti işlərinin növbəti ilin əvvəlinədək yekunlaşdırılması planlaşdırılır.
 
Qeyd edək ki, yeni inşa edilən 150 km-lik yol boyu ümumilikdə 39 qovşaq və yol ötürücü körpünün, 15 hidravlik və kanal körpüsünün, 41 kəndlərarası düzbucaqlı yeraltı keçidin, 514 müxtəlif diametrlərdə dairəvi beton suötürücünün və ehtiyat boruların, 43 düzbucaqlı suötürücü boruların, 20 avtomobil və mal-qara keçidinin tikintisi, həmçinin müxtəlif gərginlikli elektrik-rabitə xətlərinin, su, beynəlxalq əhəmiyyətli qaz və neft xətlərinin köçürülməsi nəzərdə tutulub.
 
Yola hər hansı maneənin çıxmasının qarşısını almaq məqsədilə körpü və birləşmələrin, alt keçid, suötürücü boruların, işıqlandırma işlərinin, ayrıcı zolaqda beton bardyurların quraşdırılması, ekoloji və ətraf mühitin qorunması tədbirlərinin görülməsi və yolun hər iki tərəfdən çəpərlənməsi nəzərdə tutulur.
 
Qeyd edək ki, yeni avtomobil yolunun tikilməsi nəqliyyat xidmətlərini daha da yaxşılaşdırmaqla yanaşı, bölgədə turizmin inkişafına əlavə təkan verəcək, dəhlizlə yük və sərnişin daşımalarında əsas rol oynayaraq, respublikamızın iqtisadi maraqlarına uyğun  yüklərin, o cümlədən tranzit yüklərin daha geniş cəlb olunmasına, yük həcminin çoxalmasına və gəlirlərinin artmasına, ölkəmizin nəqliyyat infrastrukturunun inkişafına, yeni iş yerlərinin açılmasına, bir çox sosial problemlərin həllinə şərait yaradacaq.
 
 
 
 
Azərbaycan iqtisadiyyatının strateji hədəflərinə yönələn vergi siyasəti biznes üçün təşviqedici xarakter daşımalıdır.
 
Bu barədə Azərbaycanın iqtisadiyyat naziri Mikayıl Cabbarov "Twitter" hesabında bildirib.
 
"Kölgə iqtisadiyyatı ilə mübarizə, ədalətli rəqabət mühitinin dəstəklənməsi davam etdirilməlidir. 2020-ci ilin fiskal nəticələri bu tədbirlərin uğurlu olduğunu göstərir", - nazir bildirib.
Azərbaycan neftinin bu günə olan qiyməti
Azərbaycan neftinin qiyməti düşüb.
 
"Azeri Light” markalı neftin bir bareli 0,66 dollar və ya 1,03 faiz ucuzlaşıb.
 
Nəticədə dünya bazarında Azərbaycan neftinin bir barelinin qiyməti 63,68 dollar təşkil edib.
 
Qeyd edək ki, Azərbaycan neftinin bir barelinin qiyməti 2020-ci ilin aprel ayında minimal səviyyədə - 15,81 dollar olub, 2008-ci ilin iyulunda isə maksimum qiymətə - 149,66 dollara satılıb.
Nazir müavini:
Şamaxı və Göygöldə radarların əlverişli yerləşdirilməsi real vaxt rejimində hava üzərində fasiləsiz müşahidələrin aparılmasına imkan verəcək.
 
Bu barədə Azərbaycan Respublikasının Ekologiya və Təbii Sərvətlər Nazirinin müavini Rauf Hacıyev AZƏRTAC-a müsahibəsində deyib. 
 
Onun sözlərinə görə, meteoradarlardan istifadə Azərbaycanın regionlarında hava üzərində fasiləsiz müşahidələrin aparılmasına imkan yaradacaq:
 
"Meteoroloji radarlar vahid milli hidrometeoroloji sistemin qurulmasında əsas mərhələdir. Radarların seçilməsi və onların yerlərinin müəyyənləşdirilməsində Azərbaycanın dağlıq ərazilərə malik olduğu nəzərə alınıb, keyfiyyətli əkslərin alınması üçün daha optimal variantlar tədqiq edilib. Şamaxı və Göygöldə radarların əlverişli yerləşdirilməsi real vaxt rejimində hava üzərində fasiləsiz müşahidələrin aparılmasına imkan verəcək”.
 
Radarların keçirilən açıq tender nəticəsində ABŞ-ın meteoroloji radarların istehsalçısı olan dünya şöhrətli "Baron” şirkətindən seçildiyini vurğulayan nazir müavini bu avadanlıqla işləyə bilən mütəxəssislərin artıq hazırlandığını da bildirib:
 
"Baron”un istehsal etdiyi Gen3 350C DP radarları Lynx təminat proqramları ilə birgə dünya bazarında qabaqcıl texnologiya hesab edilməklə, ABŞ, Kanada və bir sıra digər ölkədə istismar edilir. Təkcə ABŞ-da "Baron” şirkətinin istehsal etdiyi 171 ədəd radar quraşdırılıb.
 
Milli hidrometeorologiya xidmətinin mütəxəssisləri ABŞ-ın Alabama ştatının Xantsvill şəhərindəki istehsalçıların yanında 2 həftəlik təlim keçiblər. Bundan əlavə, bizim mütəxəssislər radarların quraşdırıldığı yerdə və Bakı şəhərində radar məlumatlarının toplanması, emalı və əks olunması üzrə mərkəzi sistemdə 20 günlük təlim keçəcəklər. Təlimlər ABŞ mütəxəssisləri tərəfindən keçiriləcək. Bizim region ölkələrindən heç birində "Baron” şirkətinin istehsal etdiyi radar sistemi yoxdur”.
 
Bu istiqamətdə gələcək planlar barədə isə Rauf Hacıyev bu fikirləri səsləndirib:
 
"İnteqrasiyalı milli hidrometeoroloji sistemin işlənilməsi üçün növbəti addım kimi radiolakasiya məlumatlarından daha yaxşı istifadə etməklə maksimum faydalanmaq və əhali arasında bu məlumatların yayılmasına nail olmaq üçün texnologiyaların alınması və öyrənilməsi növbəti addım hesab edilir. Bu texnologiyalar məlumatlar və proqnozlar mərkəzinin yaradılmasında istifadə olunacaq (Situasiya mərkəzi). Yeni mərkəz müasir avadanlıqlarla təmin olunacaq, gələcəkdə isə yeni radarlardan alınan məlumatlardan maksimum yaralanmaq üçün təhlil sistemləri və proqnozun modelləşdirilməsi ilə məşğul olacaq.
 
Situasiya mərkəzi Milli Hidrometeorologiya Xidmətindən verilən proqnoz və xəbərdarlıqlar barədə məlumatların keyfiyyətini yaxşılaşdıracaq, texniki və proqnoz üzrə personal isə yeni sistemdən müstəqil istifadə və ona xidmət etməyi öyrənəcək”.

Nazir müavini:
Azərbaycan Respublikasının Ekologiya və Təbii Sərvətlər Nazirliyi Milli Hidrometeorologiya Xidmətinin modernləşdirilməsi üzrə mühüm proqramın realizə edilməsi çərçivəsində Şamaxı və Göygöldə radarların o cümlədən Bakı şəhərində radar məlumatlarının toplanması, emalı və əks olunması üzrə mərkəzi sistemin istismara verilməsi ilə bağlı bütün işlər bu ilin mart ayının ortalarına qədər başa çatdırılacaq.
 
Bu barədə Azərbaycan Respublikasının Ekologiya və Təbii Sərvətlər Nazirinin müavini Rauf Hacıyev AZƏRTAC-a müsahibəsində deyib. 
 
O bildirib ki, Milli Hidrometeorologiya Xidmətinin modernləşdirilməsi prosesi dövlət investisiya layihələri çərçivəsində aparılır:
 
"Dövlət investisiya layihələri çərçivəsində bu proqramın ilkin mərhələsində yaradılmaqda olan inteqrə edilmiş milli erkən xəbərdarlıq sisteminin aparıcı bəndini təşkil edən iki yeni dopler meteoradar alınıb. Belə kompleks yanaşma Azərbaycanın iqtisadiyyatının havadan asılı sektorlarının və əhalisinin tələblərinə daha dəqiq cavab vermək imkanını təmin edəcək.
 
Hidrometeoroloji müşahidə şəbəkəsində 40 ildən artıq bir dövrdə Şamaxı, Göygöl, Ağstafa və Şəkidə istismar edilən MRL-5 tipli meteorololoji radiolokatorlar mənəvi və fiziki cəhətdən köhnəlib, bugünkü gün üçün onların texniki resursları tam tükənib. Qeyd etmək lazımdır ki, 1980-ci illərdə Qarabağ ərazisində - Füzuli, Zəngilan, Ağdərə və Xankəndində də MRL-5 tipli radiolokatorlar fəaliyyət göstərirdi.
 
MRL-5-lərin mənəvi cəhətdən köhnəlməsi, onların kütləvi istehsalolunma müddətindən (keçən əsrin 70-ci illərinin sonları) keçən zaman ərzində radiometeoroloji texnologiyaların çox irəli getməsi ilə izah olunur. Qütbləşdirilmiş emal metodlarının tətbiq edilməsi əldə olunan məlumatların siyahısını əhəmiyyətli dərəcədə artırır ki, bu da meteoroloji obyektlərin dinamik xüsusiyyətləri ilə bərabər, həm də mikrofiziki strukturunun xüsusiyyətlərini qiymətləndirməyə imkan verir. Müasir dopler meteoradarları təhlükəli hava hadisələri barədə operativ radiometeoroloji məlumatların alınması üçün nəzərdə tutulub”.
 
Radarların istismara verilməsi üzrə işlərin nə zaman başa çatacağı ilə bağlı sualı isə nazir müavini belə cavablandırıb:
 
"Şamaxı və Göygöldə radarların, o cümlədən Bakı şəhərində radar məlumatlarının toplanması, emalı və əks olunması üzrə mərkəzi sistemin istismara verilməsi ilə bağlı bütün işlər bu ilin mart ayının ortalarına qədər başa çatdırılacaq. Hazırda bütün radarlar quraşdırılmış və indiki dövrdə əsas məsələ Bakı şəhərində radar məlumatlarının toplanması, emalı və əks olunması üzrə mərkəzi sistemin işə salınmasıdır”.
Axtarış
Xəbər lenti
Reklam