2020-ci il avqustun 26-da Azərbaycan Dövlət Aqrar Universiteti(ADAU), Aqrar Elm və İnnovasiya Mərkəzi və Aqrar Tədqiqatlar Mərkəzinin birgə təşkilatçılığı, eləcə də respublikamızda Şəmkir, Goranboy və Yalama ərazisində fəaliyyət göstərən Aqroparkların nümayəndələrinin iştirakı ilə "Aqrar təhsilin, elmin və istehsalın inteqrasiyasında aqroparkların rolu” mövzusunda onlayn elmi-praktirk videokonfrans keçirildi.

Tədbiri giriş sözü ilə ADAU-nu elm şöbəsinin müdiri, b.f.d. Aytəkin Əsgərova açaraq bildirib ki, konfransın məqsədinin Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”nın aqrar təhsildə keyfiyyətcə yeni inkişaf mərhələsinə keçidin təmin edilməsi və aqrobiznesin inkişafına dəstək infrastrukturunun formalaşdırılması prioritetlərindən irəli gələn vəzifələrin yerinə yetirilməsi vəziyyətinin müzakirəsi, sahənin inkişafı məqsədilə həyata keçirilən sistemli tədbirlərin qiymətləndirilməsi və elmi cəhətdən əsaslandırılmış təkliflərin verilməsindən ibarət olduğunu diqqətə çatdırdı.

Sonra AEİM-nin direktoru, a.e.f.d. İmran Cümşüdov aqrar sahənin müasir inkişafında və innovasiyaların tətbiqində aqroparkların rolundan danışıb. Aqrar sahə üzrə aparılan elmi-tədqiqat işlərinin aqroparklarda tətbiqi imkanlarına dair fikirlərini söyləyib.

ATM-nin direktoru, i.e.f.d. Firdovsi Fikrətzadə aqrar təhsilin, elmin və istehsalın interqasiyasında beynəlxalq təcrübələr barədə məlumat verdi və aqroparklarda tətbiq olunan texnologiyalar və onların istehsalata transferi mövzusunda aparılan tədqiqatlara dair məruzə edib.

Daha sonra Xatirə Məmmədova ("Region Aqropark” MMC-Goranboy rayonu), Şəlalə Mövlayeva ("Şəmkir Aqropark” MMC-Şəmkir rayonu) və Mirrəhman Ağazadə ("Yalama Aqropark” MMC-Xaçmaz rayonu) təmsil etdikləri aqroparkların kadrlara olan ehtiyacının ödənilmə səviyyəsi və universitet-sənaye əməkdaşlığında Karyera Mərkəzinin rolundan bəhs edən çıxışlar ediblər.

Sonda qarşılıqlı maraq doğuran bir sıra suallar ətrafında geniş müzakirələdən sonra, bu cür konfransların gələcəkdə də təşkil olunmasının vacibliyi qeyd olunub.




 
 


 

Azərbaycan Əmanətlərin Sığortalanması Fondu (ADIF) indiyə qədər ləğvedicisi olduğu "Atabank”, "Amrah Bank”, "AGBank” və "NBC Bank” ASC-lərin 20,5 min qorunan əmanətçisinə 484,3 milyon manat kompensasiya ödəyib.

Bu barədə Fondun açıqlamasında bildirilir.

Məlumatda həmçinin deyilir ki, "Atabank”ın 8,5 min əmanətçisi 193,3 milyon manat, "Amrah Bank”ın 5,3 min əmanətçisi 127,2 milyon manat, "AGBank”ın 3,3 min əmanətçisi 60,3 milyon manat, "NBC Bank”ın isə 3,5 min əmanətçisi 103,5 milyon manat kompensasiya alıb.

"Atabank” və "Amrah Bank”ın əmanətçilərinə kompensasiyaların ödənilməsinə 1 iyun 2020-ci il tarixindən başlanılıb və kompensasiyalar nağdsız qaydada "Kapital Bank” ASC-nin adlı debet kartları və "Xəzri” sürətli pul köçürmə sistemi vasitəsilə 35 filialda ödənilir.

"AGBank” və "NBC Bank”ın əmanətçilərinə kompensasiyaların ödənilməsinə isə 16 iyun 2020-ci il tarixindən başlanılıb və kompensasiyalar nağdsız qaydada "Azərbaycan Beynəlxalq Bankı” ASC-nin adlı debet kartları vasitəsilə 20 filialda ödənilir.

"Əmanətlərin sığortalanması haqqında” qanuna əsasən, ADIF əmanətçilərin ərizələrini kompensasiya ödənişi haqqında bildirişin ilk dəfə dərc edildiyi gündən başlayaraq bir il ərzində qəbul edir.

 
 


 

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin əməkdaşları İSO təşkilatının (Beynəlxalq Standartlaşdırma Təşkilatı) "İSO 37001 standartının (anti-korrupsiya siyasəti və korrupsiyaya qarşı mübarizə idarəetmə sistemi) tətbiqi üzrə mütəxəssis hazırlığı” təlim kursuna cəlb olunublar.

Beynəlxalq təlimçilər tərəfindən online formatda həyata keçirilən təlimi başa vurmuş Xidmət əməkdaşları test imtahanından keçərək "İSO 37001 standartının tətbiqi üzrə mütəxəssis” beynəlxalq sertifikatına yiyələniblər.

İSO 37001 standartı korrupsiyanı aşkarlamaq, qarşısını almaq və aradan qaldırmağa kömək etmək üçün tətbiq edilən bir sıra mexanizmləri əhatə edir. Bu standartı əldə etmək istəyən qurum üçün üç mərhələ nəzərdə tutulub. İlk mərhələ müvafiq təlim kursuna cəlb edilmə, ikinci mərhələ təlimdən keçmiş mütəxəssislər tərəfindən standartın tələblərinə uyğun idarəetmə sisteminin çalışdıqları qurumda tətbiq edilməsidir. Üçüncü və son mərhələ isə qurumda standartın tələblərinə uyğun idarəetmə sisteminin tətbiqinin qiymətləndirilməsidir. Bu qiymətləndirməni müvafiq beynəlxalq akkreditasiyaya malik təşkilat aparır və tətbiq edilmiş idarəetmə sisteminin standartın müddəalarına uyğunluğunu qiymətləndirərək müvafiq sertifikat ilə təsdiq edir.

Dövlət Əmək Müfəttişliyi Xidmətinin əməkdaşları artıq gələn aydan ikinci mərhələ üzrə işləri, yəni İSO 37001 standartının Xidmətdə tətbiqi istiqamətində işləri yerinə yetirməyə başlayacaq.

Gələn ilin ortalarınadək bu prosesin yekunlaşdırılması nəzərdə tutulur.

 
 


 

Nazirlər Kabinetinin fiziki şəxslərin ölkəyə gömrük ödənişi olmadan gətirdikləri mallara tətbiq edilən birdəfəyə limit səviyyəsinin 2-3 dəfə azaldılması müsbət haldır. 

Bu sözləri  Milli Məclisin deputatı Vüqar Bayramov deyib.

Onun sözlərinə görə, şəxsi sifarişlə gələn məhsulların bir qismi satışa çıxarılır və nəticə etibarı ilə həmin məhsulların vergiyə cəlb edilməsi mümkün olmur. 

V.Bayramov bildirib ki, mexanizm olaraq bir çox inkişaf etmiş ölkələrdəki kimi bu istiqamətdə sistemin təkmilləşdirilməsi təklif edilir:

"Xüsusən də gömrükdə qeydiyyatdan keçməyən malların daxili bazarda satışa çıxarılmasının qarşısının alınması əslində məqsədəuyğundur. Bunun üçün təbii ki, belə malların satışının qarşısının alınması, vergidən yayınma halları ilə bağlı cərimələrə yenidən baxılması və məbləğlərin dəyişdirilməsi, eləcə də digər inzibati qaydaların müəyyənləşdirilməsinə ehtiyac var. Bu mexanizmin hazırlanması və tətbiq edilməsi bir qədər zaman alacaq. Bütün hallarda istehlak bazarı ilə idxal daxilolmalarının incələnməsi üçün elektron bazaların da təkmilləşdirilməsinə ehtiyac var”.

V.Bayramov bu istiqamətdə qəbul edilən qərarda limitin bir anda kəskin azaldılmasının isə tərəfdarı olmadığını vurğulayıb:

"Konkret olaraq, qərarda göstərilən kəskin azalmalar məqsədəuyğun deyil. Ölkəyə gömrük rüsumu tətbiq edilməyən malların dəyərində azalmanın nəzərdə tutulması mərhələli şəkildə aparılmalı idi. Poçt vasitəsilə rüsumsuz 1000 dollar (1700 manat) dəyərində mal gətirilməsi ilə bağlı limitin 300 dollara (510 manat) endirilməsi üç dəfəyə qədər azalma deməkdir.

Bir qərarla hər hansı bir limitin üç dəfədən çox azalması heç məqsədəuyğun deyil. 1500 dollarlıq (2550 manat) malların gətirilməsi ilə bağlı limitinin 800 dollara (1360 manat) endirilməsi də kifayət qədər çoxdur. Düşünürəm ki, limitlərə yenidən baxılmasına və mövcud şəraitə uyğunlaşdırılmasına ehtiyac var.

Biz bütün hallarda bu dəyişikliklərdə inkişaf etmiş ölkələrin təcrübəsindən yararlanırıq. Lakin, inkişaf etmiş ölkələrin təcrübəsində gün ərzində hər hansı limitin üç dəfədən artıq azaldılması çox nadir hallarda tətbiq olunur. Odur ki, bu məsələyə yenidən baxılmalıdır. Həm də edilən dəyişikliklərin əsaslandırılması, qiymətləndirilməsi də yenidən həyata keçirilməlidir”.  

Qeyd edək ki, yeni qaydalara əsasən, bugünə qədər vətəndaş şəxsi məqsəd üçün birbaşa özü ay ərzində bir dəfə olmaqla 1500 dollardan (2550 manat) artıq olmayan malları ölkəyə gömrük rüsumundan azad şəkildə gətirə bilirdisə, artıq bu məbləğ 800 dollara (1360 manat) endirildi.

Eyni zamanda eyni fiziki şəxsin adına elektron ticarət - poçt vasitəsilə rüsumsuz 1000 dollarlıq (1700 manat) malın gətirilməsinə icazə var idisə, artıq bu məbləğ də 300 dollara (510 manat) endirildi.

 
 


 

Ölkə başçısı bir müddət əvvəl demişdi ki, icra başçısının fəaliyyətinə həmin rayona qoyulan investisiyaya əsasən qiymət verəcək. İnvestisiyaların qoyulması həm də yeni iş yerlərinin açılması deməkdir. Hesab edirəm ki, bəzi icra başçıları bu işlərin öhdəsindən gələ bilmir.

Bunu  deputat Vahid Əhmədov Prezident İlham Əliyevin avqustun 24-də Faiq Qürbətovu Biləsuvar Rayon İcra Hakimiyyətinin, Elmir Bağırovu isə Saatlı Rayon İcra Hakimiyyətinin başçısı vəzifələrinə təyin olunmaları ilə əlaqədar videoformatda qəbul edən zaman səsləndirdiyi fikirləri şərh edərkən deyib.

Deputat bildirib ki, Prezidentin icra başçılarına tövsiyələri çox önəmlidir:

"Hazırda ölkədə çox ciddi kadr islahatları həyata keçirilir, bir sıra icra başçıları, adı korrupsiya hallarında keçən məmurlar həbs edilir. Ölkə rəhbəri yeni təyin etdiyi icra başçılarına öz tövsiyələrini verib xəbərdarlıq edir ki, təmiz işləyin, sakinlərlə əlaqə saxlayın. Prezident icra başçılarına deyir ki, bütün kəndləri gəzin, əhalinin dərd-sərini öyrənin ki, problem yaranmasın. Bu cür tövsiyələrin verilməsinə əsas səbəb Azərbaycanda yeni bir dönəmin başladılmasıdır. Yəni bunlar rüşvətin, korrupsiyanın kökünü kəsmək üçün atılan addımlardır”.

Deputatın fikrincə, gənc icra başçıları Nazirlər Kabineti və Milli Məclislə birgə işləməlidirlər:

"Düşünürəm ki, onlar rayonlarda əldə etdikləri məlumatları mərkəzi icra orqanlarına çatdırmalıdırlar. Bu, böyük əhəmiyyət kəsb edir və ciddi məsələdir. Ola bilsin ki, gənc kadrların böyük təcrübələri yoxdur, lakin yavaş-yavaş öyrənəcəklər. Əsas odur, ölkə başçısının verdiyi tövsiyələri yerinə yetirsinlər. Yəni rüşvət və korrupsiya ilə məşğul olmasınlar. Daha çox insaların tələblərinə uyğun hərəkət eləsinlər. Artıq Azərbaycanda ciddi kadr dəyişiklikləri gedir, qanunların həyata keçirilməsi üçün mühüm addımlar atılır. İcra başçıları da bu işə öz töhfələrini verə bilərlər”.

 
 


 

Azərbaycan Sahibkarlar Konfederasiyası (ASK) ilə İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidməti (AİBNDX) arasında görüş keçirilib. Görüş Dövlət Xidməti ilə əməkdaşlıq imkanlarının genişləndirilməsi, sahibkarların maarifləndirilməsi və digər məsələlərin müzakirə edilməsi məqsədini daşıyıb.

Video-konfrans formatında keçirilən görüşdə sahibkarları maraqlandıran məsələlərə toxunulub. Dövlət satınalmaları sahəsində şəffaflığın təmin edilməsi, sahibkarlar üçün satınalmalar prosesində bərabər imkanların yaradılması, istehlakçıların hüquqlarının daha etibarlı müdafiəsi, istehlak bazarına nəzarət, süni qiymət artımı ilə mübarizə, haqsız rəqabətin qarşısının alınması, standartlaşdırma, metreologiya və s. istiqamətlərdə qanunvericiliklə müəyyən edilmiş kompleks tədbirlərin görüldüyü vurğulanıb. Bildirilib ki, yeni normativ hüquqi sənədlərin hazırlanması və bəzi qanunların təkmilləşdirilməsi üzərində ciddi işlər aparılır.

Görüşdə qurumlar arasında İkitərəfli Əməkdaşlıq Şurasının yaradılması təklif edilib və bu məsələnin müzakirə edilməsi qərara alınıb.

 

Masallıda suvarma işinin təşkili yüksək səviyyədədir – foto

 

 

Xüsusi olaraq vurğulamaq istəyirəm ki, ulu öndər Heydər Əliyev meliorasiya və suvarma işinə məxsusi həssaslıqla yanaşır, bu sahədə mövcud problemlərin həlli üçün ən kəskin və qətiyyətli addımları atır, bu vacib sahənin əhəmiyyətini hamıya hiss etdirirdi.

Bu sahənin əməkdaşları üçün ikiqat fərəhlidir ki, möhtərəm Prezidentimiz, ulu öndərin layiqli davamçısı İlham Əliyev də suvarmanın əhəmiyyətini önə çəkir və bu sahənin inkişafı üçün hər cür kömək göstərir.Yəqin ki, statistika həvəskarları maraqlansalar, yaxın keçmişə müraciət etsələr, görərlər ki, ulu öndərin 1969-cu ildə hakimiyyətə gəlişindən sonra yüz minlərlə hektar ölü torpaq sahələri yenidən "canlanıb”, yenidən bar-bərəkət yetirən müqəddəs bir nemətə çevrilib.

Masallı əhalisi suvarma işinin nə demək olduğunu digər bölgələrdən, xüsusilə də, təbiəti mülayim bölgələrdən daha yaxşı bilirlər.

Masallı rayonunun özünəməxsus iqlimi var — qışı çox sərt keçməsə də, yayının istisinə, necə deyərlər, sözolabilməz.Həmişə torpaqla "ünsiyyətdə” olan, ruzisini torpaqdan çıxaran masallılılar işin azından, çoxundan, havanın isti-soyuğundan qorxmurlar.Bircə nigarançılıqları əkdikləri sahələrin vaxtında suvarılması sarıdandır.

Məhz Mahir müəllimin Masallı Rayon Suvarma Sistemləri İdarəsinə rəhbərli etdiyi dönəmdən bu yana sakinlər üçün son illər bu barədə də hər şey qaydasındadır.

Bu gün zənnimcə hamı bilir ki, torpaqla bağlı insanların əməklərinin, əziyyətlərinin hədər getməməsi, çəkdikləri zəhmətin bəhrəsini görmələri Mahir müəllimin fəaliyyəti ilə sıx əlaqəlidir.Bu da sözsüz ki, bir rəbər kimi onun məsuliyyətini ikiqat artırır, daha da yaxşı işləməyə sövq edir.

Ulu öndər Heydər Əliyevin məşhur sözü var: "İqtisadiyyatı güclü olan ölkə hər şeyə qadirdir”.Bizdə də belədir – torpağı normal suvarılan fermer, kəndli, bir sözlə, torpaq adamı torpaqdan hər cür nemət, məhsul götürməyə və rəvan həyat qurmağa qadirdir.

Uğurlarınız bol olsun, Mahir müəllim!

 

"aztv.news”

Seymur Məmmədov


 
 


 

Tezliklə Əmək və Əhalinin Sosial Müdafiəsi Nazirliyi və "MTV Azərbaycan”ın birgə təşəbbüsü ilə yeni "Bərabərik” adlı layihəsinə başlanacaq.

Nazirlikdən verilən məlumata görə, layihə "MTV Azərbaycan”da istedadlı və gözəl səsə malik əlilliyi olan şəxslərlə bir sıra tanınmış müğənnilərin birgə ifalarının yer aldığı silsilə verilişləri əhatə edir.

Məqsəd əlilliyi olan şəxslərin timsalında əlilliyin heç də həyat eşqinə, istedad və bacarıqlara, öz arzularına doğru inamla addımlamağa əngəl olmadığını cəmiyyətə aşılamaqdır.

Əlillik onların istedadlarına, yaşayıb-yaratmaq əzminə mane ola bilməyib, əksinə, onları daha da ilhamlandıraraq, bu layihənin ərsəyə gəlməsinə kömək edib.

 
 


 

Bu ilin yanvar-iyul aylarında Azərbaycanda informasiya və rabitə sahəsində fəaliyyət göstərən müəssisələr tərəfindən göstərilmiş xidmətlərin dəyəri real ifadədə ötən ilin eyni dövrü ilə müqayisədə 3% artaraq 1 232,1 milyon manata yüksəlib ki, onun da 72%-i əhali tərəfindən istehlak olunub.

Bu barədə Dövlət Statistika Komitəsinə istinadən xəbər verir.

Məlumata görə, hesabat dövründə bu sahədə əldə edilmiş gəlirin 80,3%-i qeyri-dövlət sektorunun payına düşüb. Xidmətlərdən əldə edilən gəlirin 42%-i və ya 517,3 milyon manatı mobil telefon rabitəsi sahəsində formalaşıb.

 
 


 

Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi və Almaniya Beynəlxalq Əməkdaşlıq Cəmiyyətinin əməkdaşlığı çərçivəsində özünüməşğulluq proqramının Ağdam və Bərdə rayonlarındakı iştirakçıları da Cəmiyyətin təşkil etdiyi texniki təlimlərdə iştirak edə biləcək.

"Qafqazda Aztəminatlı Məcburi Köçkünlərin və Yerli Əhalinin Sosial və İqtisadı İnkişafı” layihəsi çərçivəsində keçiriləcək təlimlərdə heyvandarlıq və quşçuluq təsərrüfatlarının inkişaf etdirilməsinə dair bilik və bacarıqlar aşılanacaq.

Məqsəd iştirakçılara, o cümlədən özünüməşğulluq proqramı çərçivəsində verilmiş aktivlər hesabına heyvandarlıq və quşçuluq təsərrüfatları yaratmış şəxslərə bizneslərini inkişaf etdirməkdə dəstək verməkdir.

İştirakçılara 24 gün nəzəri, 8 gün praktik sahə təlimləri keçiriləcək.

Nəzəri təlimlər onlayn, sahə təlimləri isə karantin qaydalarına (maskalardan və qoruyucu vasitələrdən istifadə, sosial məsafənin saxlanması) əməl olunmaqla təşkil ediləcək.

Təlimlərə qoşulmaq istəyən Ağdam və Bərdə rayonları üzrə özünüməşğulluq proqramı iştirakçıları (proqramın dəstəyi ilə heyvandarlıq və quşçuluq təsərrüfatları yaratmış şəxslər) sentyabrın 1-ə qədər müvafiq Ərazi Məşğulluq Mərkəzinə müraciət edə bilərlər.
Axtarış
Xəbər lenti
Reklam