Bu gün Azərbaycanın milli valyutası - manatın dövriyyəyə buraxılmasından 28 il keçir.

Ötən əsrin sonunda müstəqillik əldə edən Azərbaycanda milli pul vahidinin yaradılmasının əsası o vaxtkı prezident Əbülfəz Elçibəyin 15 iyul 1992-ci il tarixli "Milli valyutanın dövriyyəyə buraxılması haqqında” fərmanı ilə qoyulub.

1992-ci il avqustun 15-də 1, 10 və 250 manatlıq əskinaslar, noyabrında 5, 10, 20 və 50 qəpiklik sikkələr, dekabrında 5 manatlıq əskinaslar, 1993-cü ilin martında isə 50, 100, 500 və 1 000 manatlıq əskinaslar dövriyyəyə buraxılıb. Azərbaycanın ilk pulları Fransa Mərkəzi Bankında hazırlanıb.1992-ci ilin avqustundan 1994-cü ilin yanvarına qədər Azərbaycan ərazisində 1 manat 10 rubla bərabər olub, yəni hər iki valyutadan istifadə edilib. Prezident Heydər Əliyevin 11 dekabr 1993-cü il tarixli "Milli valyutanın respublika ərazisində yeganə ödəniş vasitəsi elan olunması haqqında” fərmanından sonra Azərbaycan rubl zonasından çıxıb. Bununla da Milli Bank müstəqil pul və məzənnə siyasəti həyata keçirməyə başlayıb. 

Bununla belə, o vaxtı çətin iqtisadi şərait çərçivəsində milli valyutanın məzənnəsini sabit saxlamaq mümkün deyildi. Manat digər xarici valyutalara nisbətdə sürətlə ucuzlaşırdı. Əgər 1994-cü ilin əvvəlində Azərbaycanda 1 ABŞ dolları 118 manata bərabər idisə, bir il sonra bu nisbət 4 182 manata qalxıb. Bu isə dövriyyəyə daha böyük nominallı əskinasların buraxılması hesabına baş verirdi. Belə ki, Milli Bank tərəfindən ölkədə nağd pul dövriyyəsinin nizamlanması, nağd pula olan tələbatın optimallaşdırılması məqsədilə 1994-cü ildə Almaniyanın "Giesecke & Devrient” şirkəti tərəfindən 10 000 manatlıq, 1996-cı ildə isə İngiltərənin "De La Rue” şirkəti tərəfindən 50 000 manatlıq əskinaslar çap edilərək dövriyyəyə buraxılıb. Sonuncu həm də 2001-ci ildə 1 000 manatlıq əskinasın yeni dizaynda hazırlanmasını həyata keçirib.

Ümumilikdə, Milli Bank tərəfindən ölkə iqtisadiyyatının nağd pula olan tələbatının ödənilməsi məqsədilə 1992-2005-ci illər ərzində təxminən 5,239 trln. manatlıq 692,5 mln. ədəd əskinas istehsal olunaraq dövriyyəyə buraxılıb. Köhnə nominallı pul nişanları 2006-cı ilin sonuna qədər tədavüldə olub və denominasiya çərçivəsində dövriyyədən çıxarılıb.

2005-ci il fevralın 7-də Prezident İlham Əliyev "Pul nişanlarının nominal dəyərinin və qiymətlər miqyasının dəyişdirilməsi (denominasiyası) haqqında” fərman imzalayıb. Fərmana uyğun olaraq, 2006-cı il yanvarın 1-dən etibarən Azərbaycan ərazisində yeni manatdan istifadə edilməsinə başlanıb. Bu zaman 1 yeni manat 5 000 köhnə manata bərabər tutulub və bir il hər iki pul qüvvədə olub. 2007-ci il yanvarın 1-dən isə tamamilə yeni manata keçilib. Dövriyyəyə buraxılan yeni manat 1, 5, 10, 20, 50, 100 ekvivalentində olan əskinaslardan və 1, 3, 5, 10, 20, 50 qəpik metal pul nişanlarından ibarətdir. Yeni manatın dizaynı ilə bağı müsabiqənin qalibi Avstriyanın "OeBS” şirkətinin dizayneri, avronun müəllifi Robert Kalina olub. Yeni nəsil pul nişanları isə İsveçrə Milli Bankının texniki dəstəyi ilə hazırlanıb.

Uzun illər Cənubi Qafqazın ən güclü və sabit valyutası olan Azərbaycan manatı 2015-ci il fevralın 21-də, 20 illik fasilədən sonra ilk kəskin məzənnə dəyişikliyinə məruz qalıb. Azərbaycan Mərkəzi Bankı milli valyutanın 34% ucuzlaşdırılmasına qərar verib. Buna səbəb isə 1990-cı illərin sonundan manata dəyər qazandıran neftin dünya bazarında kəskin ucuzlaşması olub. Son nəticədə dolların rəsmi məzənnəsi 0,78 AZN/USD-dən 1,05 AZN/USD-yə qədər artırılıb.

Bununla belə, neftin getdikcə ucuzlaşması və ölkəyə daxil olan dollar kültəsinin azalması fonunda yeni məzənnənin uzun müddət saxlamaq mümkün olmayıb. 2015-ci il dekabrın 21-də Mərkəzi Bank vəziyyətdən çıxış yolu kimi manatı "üzən məzənnə" rejiminə keçirib. Bundan sonra ölkədə rəsmi məzənnə 1,55 AZN/USD-yə bərabər olub. Amma yeni vəziyyətdə manatın məzənnəsini ona tələbatın hansı səviyyədə olması müəyyən etdiyindən dolların və digər xarici valyutaların milli valyutaya nəzərən qiyməti mütəmadi olaraq dəyişib.

Məsələn, 2017-ci il fevralın 1-2-də 1 dollar 1,92 manata bərabər olub ki, bu da "üzən məzənnə" rejiminə keçilməsindən bəri ən yüksək həddir. 2016-cı il mayın 25-26-da isə dolların qiyməti minimum həddə - 1,49 AZN/USD-yə düşüb. Bu günə olan rəsmi məzənnə isə 1,700AZN/USD-yə bərabərdir və bu göstərici 2018-ci il martın 7-dən bəri dəyişməyib. 

 
 


 

"Azərbaycanla İsrailin münasibətləri möhkəm, dayanıqlı və perspektivlidir”.

Trend-in məlumatına görə, bu barədə İqtisadiyyat naziri, Azərbaycan-İsrail hökumətlərarası komissiyasının həmsədri Mikayıl Cabbarovun "The Jerusalem Post” nəşrindəki müəllif yazısında deyilir.

Nazir yazıb ki, bu gün mürəkkəb dövrdür:

"COVID-19 pandemiyası bizim ənənəvi həyat tərzimizi dəyişib. Virus gündəlik olaraq minlərlə ölümə səbəb olur. Bu, beynəlxalq quruluşun iqtisadi və sosial əsaslarını zəiflədir, yoxsulluğu gücləndirir və inkişafı ləngidir”.

M.Cabbarov qeyd edib ki, bu mürəkkəb dövrdə Azərbaycan daha bir təhdidlə üz-üzə qaldı. Ermənistanın Dağlıq Qarabağ və ətraf yeddi rayonun davam edən işğalı fonunda iyulun 12-də bu ölkə Azərbaycana yeni genişmiqyaslı hücum həyata keçirdi. Hücum münaqişə zonasından uzaqda yerləşən Tovuz rayonu istiqamətində baş verdi:

"Maraqlıdır ki, Tovuz rayonu əsas neft və qaz borularının tranzit marşrutu üzərində yerləşir. Beləliklə, Ermənistanın təcavüzkar fəaliyyəti dünya enerji bazarlarının təhlükəsizliyinə və Azərbaycanın enerji ehtiyatlarının istehlakçılarının, o cümlədən, İsrailin enerji təhlükəsizliyinə böyük təhdiddir”.

Müəllif bildirib ki, Ermənistanın bu təxribatçı addımının səbəblərindən biri bilavasitə bu ölkədəki vəziyyətlə bağlıdır:

"Ermənistan iqtisadiyyatı ağır vəziyyətdədir, korrupsiya geniş yayılıb, emiqrasiya artır. Pandemiya ilə vəziyyətə nəzarət çox zəifdir. Siyasi vəziyyət stabil deyil, cəmiyyət parçalanıb, elitalar isə bir-birilə münaqişədədir. Bu şəraitdə Ermənistan hökuməti hərbi əməliyyatlarla insanların diqqətini daxili problemlərdən yayındırmaq üsulunu seçdi”.

Nazir qeyd edib ki, hazırda Ermənistan hətta Azərbaycanla xarici tərəfdaşları, o cümlədən, İsrail arasında münasibətlərlə manipulyasiya etməyə çalışır:

"Erməni KİV-lərində məqalələr dərc etməklə sanksiya, embarqo və boykot yolu ilə Azərbaycanla münasibətlərə son qoymağa çağırır”.

O əlavə edib ki, Ermənistandan fərqli olaraq Azərbaycan öz tərəfdaşlarının gündəmi ilə manipulyasiya etmir:

"İsraillə ikitərəfli münasibətləri inkişaf etdirməklə biz Azərbaycanda bu münasibətləri üçüncü tərəflərə qarşı yönəltmirik. Bizim səylərimiz hər zaman beynəlxalq təhlükəsizliyə, sabitliyə və sülhə mühüm töhfə verməyə yönəlib.

Biz tolerantlıq və qarşılıqlı hörmət mədəniyyətini inkişaf etdirməyə çalışırıq. Biz divarlar əvəzinə körpülər tikməyə kömək göstərmək istəyirik və bizim qurduğumuz münasibətlər artıq dostlarımıza xeyir gətirir”.

 
 


 

Rusiya Çinlə ixracat hesablaşmalarında artıq dollara deyil, avroya üstünlük verir.

Ölkə iqtisadiyyatında "dollarsızlaşdırma”ya yönəlik qurulan strategiyaya uyğun olaraq, habelə sanksiyalardan qaçmaq üçün Kreml bununla bağlı müvafiq qərar qəbul edib.

"Bloomberg” agentliyinin xəbərinə görə, Çin bu ilin birinci rübündə Rusiyadan aldığı əmtəələrin 50%-nin hesabını avro üzərindən həyata keçirib. Qeyd etmək lazımdır ki, yanacaq və ağac məhsulları Rusiyanın Çinə ixracatının əsas məhsulları sayılır.

Rusiya Federasiyasının Avropa Birliyinə ixracatında da avronun payı 38%-dən 43%-ə yüksəlib.

Lakin "Fitch Ratings Inc.” şirkətinin analitiki Dmitri Marinçenkonun fikrincə dollarla hesablaşma avroya nisbətən daha rahat olduğu üçün heç kim bununla bağlı radikal addımlar atacaq dərəcədə riskə getməz.

Rusiyanın bu istiqamətdə yürütdüyü siyasət ABŞ valyutasının dünyanın maliyyə sistemindəki dominant mövqeyini azaltmayıb.

Əksinə, valyuta ticarətində dolların payı 2016-cı ildəki 87,6%-dən, 2019-cu ilə qədər 88,3%-ə qədər yüksəlib.

Rusiya və Çin arasında ticarət dövriyyəsi isə ümumilikdə 109 milyard dollara, qlobal ticarətin həcmi isə 19 trilyon dollara bərabərdir.

 
 


 

"Əvvəl işlədiyim dövrdəki təcrübəmi sizinlə bölüşmək istəyirəm. Əlil arabasının istehsalı çox mürəkkəb prosesdir. Araba komplektləşmiş xeyli hissədən ibarətdir və bunların hərəsi ayrıca istehsaldır".

Bunu açıqlamasında Azərbaycan Milli Paralimpiya Komitəsinin (MPK) prezidenti İlqar Rəhimov ölkədə əlil arabalarının mümkün istehsalı barədə danışarkən deyib.

O bildirib ki, Azərbaycanda bir neçə dəfə buna cəhd olunub: "Təəssüflər olsun ki, proses hələ başlamayıb. Sonuncu dəfə İsmayıllıda velosiped zavodu ilə danışıqlar aparılırdı. Sonunun necə bitdiyini, olub-olmayacağını bilmirəm. Hər halda, bu, böyük bir istehsaldır".

İ.Rəhimovun sözlərinə görə, bəzən lazım olan hansısa əşyanı ölkə xaricindən idxal etmək istehsalından daha ucuz başa gəlir: "Bu, iqtisadi baxımdan təhlil olunmalıdır. Əmək və Əhalinin Sosial Müdafiəsi Nazirliyi bu sahədə elə fəaliyyət göstərib ki, bu gün Azərbaycanda əlil arabası ilə bağlı heç bir problem yoxdur. Ehtiyacı olanların hamısında əlil arabası var. Düzdür, kimisi az istifadə edir, kimisi çox, birinin arabası sınır, digərinin hansısa detalı zədələnir, bunlar dəyişməli olur".

Qurum rəhbərinin fikrincə, indiki məqamda həm Bakıda, həm də digər şəhər və rayonlarda əlil arabalarının təmir emalatxanalarını yaratmaq daha yaxşı olardı: "Çünki gündəlik istifadə olunan vasitədir. Kənd yollarında istifadə olunur, hansısa detalı sınır, zədələnir. İlkin mərhələdə təmir emalatxanalarına daha çox ehtiyac var ki, hansısa əlil arabası dərhal təmir olunsun, sazlansın".

İ.Rəhimov Azərbaycanın gələcəkdə nə vaxtsa əlil arabası istehsal edəcəyini istisna etməyib: "Bunun çeşidləri də çoxdur. Məişət, ev, küçə, idman növləri üçün əlil arabaları var. Bunların hamısının bir yerdə istehsalı qeyri-mümkündür. Arzu edərdik ki, Azərbaycanda istehsal həyata keçsin. Hesab edirəm ki, nə vaxtsa olacaq. Amma yenə deyirəm, hazırda Azərbaycanda əlil arabaları ilə bağlı heç bir problem yaşanmır. Xırdalıqları nəzərə almasaq, qlobal çətinlik yoxdur".

Paralimpiya Komitəsinin prezidenti idmançılar üçün əlil arabalarının müxtəlif şirkətlərdən alındığını qeyd edib: "Onu deyim ki, əlil arabalarını Milli Paralimpiya Komitəsi alsa, buna vəsaitimiz çatmaz. Bu sahədə bizə tərəfdaşlarımız kömək edirlər. Onlar hər bir əlilin müraciətinə baxaraq, bizimlə məsləhətləşirlər və xüsusi idman arabaları alırlar. Heydər Əliyev Fondu bu sahədə çox aktivdir. Bu günədək bir çox insanı əlil arabası ilə təmin edib”.

İ.Rəhimov deyib ki, Azərbaycanda əlil arabalarının alınmasında əsas təminatçı Əmək və Əhalinin Sosial Müdafiəsi Nazirliyidir: "Onlar bu işi çox uğurla həyata keçirirlər. Çində müxtəlif müəssisələr var və keyfiyyətli məhsul istehsal edirlər. İstər Çin, istərsə də Avropa ölkələrindən alınan əlil arabalarına keyfiyyət zəmanəti verilir. Dünyanın ən aparıcı istehsalçı şirkətləri belə, bu gün öz müəssisələrini ucuz işçi qüvvəsinə görə Çində açıblar. Amma təbii ki, öz keyfiyyətilərinə nəzarət edirlər. Bildiyimə görə, Əmək və Əhalinin Sosial Müdafiəsi Nazirliyi əlil arabası alarkən bu şeylərə diqqətlə baxır”.

 
 


 

2020-ci ilin yanvar-iyun aylarında Azərbaycan Respublikasının hüquqi və fiziki şəxsləri dünyanın 167 ölkəsindəki tərəfdaşları ilə ticarət əməliyyatları həyata keçirib, 100 ölkəyə məhsul ixrac olunub, 155 ölkədən idxal olunub.

Bu barədə Dövlət Statistika Komitəsinin yaydığı məlumatda bildirilib.

Gömrük orqanlarında qeydiyyatı aparılmış, lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla 2020-ci ilin yanvar-iyun aylarında ölkənin xarici ticarət dövriyyəsi 11750,2 milyon ABŞ dolları təşkil edib.

Ticarət dövriyyəsinin 6 milyard 670 milyon 700 min dollarını və ya 57,5 faizini ölkədən ixrac olunmuş məhsulların, 4 milyard 989 milyon 500 min dollarını (42,5 faizini) isə idxal məhsullarının dəyəri təşkil edib.

Nəticədə, 1 milyard 771 milyon 200 min dollar məbləğində müsbət saldo yaranıb.

2019-cu ilin yanvar-iyun ayları ilə müqayisədə xarici ticarət dövriyyəsi faktiki qiymətlərlə 30,3 faiz, real ifadədə 20,5 faiz, o cümlədən idxal 42,8 faiz, ixrac isə 4,6 faiz azalıb.

2020-ci ilin yanvar-iyun aylarında qeyri neft-qaz məhsullarının ixracı əvvəlki ilin eyni dövrü ilə müqayisədə faktiki qiymətlərlə 6,9 faiz, real ifadədə isə 14 faiz azalaraq 911,9 milyon dollar təşkil edib.                                                                                                                              

Dövlət Gömrük Komitəsinin məlumatlarına əsasən ixracın 32,0 faizini İtaliyaya, 19,2 faizini Türkiyəyə, 5,0 faizini Rusiyaya, 4,2 faizini İsrailə, 3,7 faizini Hindistana, hər biri 3,2 faiz olmaqla Yunanıstan, Çin və Xorvatiyaya, 3,1 faizini Gürcüstana, 3,0 faizini Ukraynaya, 2,1 faizini Çexiyaya, 1,9 faizini Tunisə, hər biri 1,7 faiz olmaqla Vyetnam, Portuqaliya və İspaniyaya, 11,1 faizini isə digər ölkələrə göndərilmiş məhsulların dəyəri təşkil edib.

Qeyri neft-qaz məhsulları üzrə ixracın dəyərində Rusiyaya (40,6 faiz), Türkiyəyə (19,4 faiz), İsveçrəyə (10,5 faiz), Gürcüstana (8,4 faiz), Çinə (3,1 faiz), Ukraynaya (2,4 faiz), İtaliyaya (2,1 faiz), Qazaxıstana (1,6 faiz), İrana (1,2 faiz), Türkmənistana (1,0 faiz), Belarusa (1,0 faiz), ABŞ-a (0,9 faiz), Almaniyaya (0,9 faiz) göndərilmiş malların payı üstünlük təşkil edib.

Ölkəyə idxal olunmuş məhsulların ümumi dəyərinin 18,3 faizi Rusiya, 14,8 faizi Türkiyə, 13,3 faizi Çin, 8,1 faizi ABŞ, 5,3 faizi Almaniya, 4,3 faizi Ukrayna, 4,1 faizi İtaliya, 2,8 faizi İran, 2,7 faizi Birləşmiş Krallıq, 1,9 faizi Yaponiya, 1,8 faizi Koreya, 1,7 faizi Fransa, 20,9 faizi isə digər ölkələr ilə aparılmış idxal əməliyyatlarının payına düşüb.

2020-ci ilin yanvar-iyun aylarında 2019-cu ilin müvafiq dövrü ilə müqayisədə mühüm məhsul növlərindən təzə tərəvəz ixracı 4,3 faiz, kartof – 32,0 faiz, meyvə və tərəvəz şirələri – 3,8 faiz, bitki yağları – 1,8 dəfə, çay – 0,5 faiz, marqarin, qida üçün yararlı digər qarışıqlar – 52,1 faiz, polietilen – 39,8 faiz, qara metallardan borular – 1,8 dəfə, bentonit gili – 5,2 faiz artmış, təzə meyvə ixracı isə 24,5 faiz, şəkər – 25,9 faiz, tütün – 25,9 faiz, meyvə və tərəvəz konservləri – 0,8 faiz, təbii üzüm şərabları və üzüm suslosu – 52,2 faiz, pambıq lifi – 18,4 faiz, pambıq ipliyi – 22,0 faiz, emal olunmamış alüminium – 5,8 faiz azalıb.

2019-cu ilin yanvar-iyun ayları ilə müqayisədə 2020-ci ilin yanvar-iyun aylarında təzə meyvə idxalı 15,0 faiz, bitki yağları – 10,1 faiz, xam şəkər və şəkər – 11,0 faiz, kərə yağı, digər süd yağları və pastaları – 34,5 faiz, çay – 10,0 faiz, mal əti – 29,4 faiz, quş əti və onun əlavə məhsulları – 2,1 faiz, təzə tərəvəz – 26,4 faiz, minik avtomobilləri – 29,2 faiz, dərman vasitələri – 1,7 dəfə, polad prokatı – 10,5 faiz, qara metallardan çubuqlar – 1,7 dəfə, hesablama maşınları, blok və qurğuları – 23,1 faiz, məişət soyuducuları – 39,2 faiz artmış, buğda idxalı isə 37,8 faiz, kartof – 0,8 faiz, siqaretlər – 80,1 faiz, qara metallardan borular – 13,5 faiz, mineral gübrələr – 3,4 faiz, rezin şinlər – 14,4 faiz, məişət kondisionerləri – 24,7 faiz, mebellər – 23,2 faiz, yük avtomobilləri – 15,6 faiz, polietilen – 14,8 faiz, paltaryuyan maşınlar – 4,8 faiz, qara metallardan künclüklər – 7,0 faiz, avtobuslar – 24,8 faiz, sement və sement klinkerləri – 92,1 faiz azalıb.

 
 


 

Azərbaycanda həyata keçirilən davamlı islahatlar, həmçinin ölkə iqtisadiyyatının pandemiya səbəbilə son dövrlərdə üzləşdiyi proseslər İqtisadiyyat Nazirliyi qarşısında yeni çağırışlar yaradıb. İqtisadi proseslərin yeni prinsiplər əsasında inkişafı idarəetmənin effektivliyinin və çevikliyinin artırılmasını, müasir bilik və menecment bacarıqlarına malik kadrların idarəetməyə cəlb olunmasını tələb edir.

Bu barədə Nazirlikdən bildririlib.

Məlumatda həmçinin qeyd olunur ki, İqtisadiyyat Nazirliyi qarşısında müəyyən edilmiş vəzifələrin operativ və səmərəli şəkildə həyata keçirilməsi və idarəetmə sisteminin peşəkar kadrlarla gücləndirilməsi məqsədilə İqtisadiyyat naziri Mikayıl Cabbarovun əmri ilə Allahverdi Paşayev İqtisadiyyat Nazirliyinin Aparat rəhbərinin müavini təyin edilib.

Allahverdi Paşayev ixtisasca hüquqşünasdır. Əmək fəaliyyətinə 2008-ci ildə İqtisadi İnkişaf Nazirliyində başlayıb, müxtəlif vəzifələrdə çalışıb. 2018-ci ilin may ayından yeni vəzifəyə təyin edilənədək isə "Azərbaycan İnvestisiya Şirkəti” ASC-nin icraçı direktoru olub.

Qeyd edək ki, "Azərbaycan İnvestisiya Şirkəti” ASC-nin icraçı direktoru vəzifəsi isə Ülvi Mansurova həvalə edilib.

Ülvi Mansurov 2012-2015-ci illərdə Britanıyanın Uorvik Universitetində təhsil alıb, "Warwick Business School” proqramının məzunudur. İqtisadiyyat üzrə fəlsəfə doktorudur. O, "Bank Technique” İdarə Heyətinin sədri, Azərbaycan Beynəlxalq Bankının İdarə Heyəti sədr müavini, "Azərpoçt” MMC-nin baş direktoru vəzifələrində çalışıb. Son təyinatına qədər isə İqtisadiyyat Nazirliyi yanında Dövlət Vergi Xidmətinin Rəqəmsal vergi inzibatçılığı Baş İdarəsinin rəisi vəzifəsində fəaliyyət göstərib.


 
 


 

Azərbaycan qazının Avropaya nəqlini nəzərdə tutan Trans-Adriatik qaz boru kəmərinin (TAP) inşasına başlanılandan bəri işlərin 97%-i yekunlaşıb.

TAP konsorsiumundan  verilən məlumata görə, bu, iyulun sonunda qeydə alınan göstəricidir.

Məlumata əsasən, layihənin tikinti mərhələləri müəyyən edilmiş cədvələ uyğun olaraq həyata keçirilir.

Qeyd edək ki, Cənub Qaz Dəhlizi layihəsinin bir hissəsi olan TAP kəməri ilə "Şahdəniz-2" layihəsi çərçivəsində hasil olunan qazın ilkin olaraq ildə 10 mlrd. kubmetrinin Avropaya nəqli nəzərdə tutulur. Bu boru kəməri Yunanıstan, Albaniya və Adriatik dənizindən keçməklə İtaliyanın cənubuna qədər uzanacaq.

Azərbaycan qazının Avropaya 2020-ci ildə çatdırılacağı nəzərdə tutulur.

 
 


 

Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən yanvar-iyul aylarında ümumilikdə 2 milyon 571 min şəxsə pensiya, müavinət, təqaüd, ünvanlı sosial yardım ödənilib.

Bu barədə ƏƏSMN-dən bildirilib. Məlumata görə, bu istiqamətdə ötən ilin eyni dövrünə nisbətən 26,76 faiz çox və ya 707 milyon manat çox olmaqla, 3 mlrd. 349 mln. manat vəsait ödənilib.

 
 


 

Prezident İlham Əliyev əkin sahələrinin suvarma suyu ilə təminatının yaxşılaşdırılmasına və əhalinin içməli suya tələbatının ödənilməsinə dair əlavə tədbirlər haqqında sərəncam imzalayıb.

Sərəncama əsasən, "Azərsu” Açıq Səhmdar Cəmiyyəti və Azərbaycan Respublikasının Dövlət Neft Şirkəti əhalisi 65122 nəfər olan 15 rayonun 24 yaşayış məntəqəsində əkin sahələrinin və əkin üçün istifadə olunan həyətyanı torpaq sahələrinin suvarma suyu ilə təminatının yaxşılaşdırılması, habelə əhalinin içməli suya tələbatının ödənilməsi üçün 24 ədəd subartezian quyusunun qazılmasını təmin etməlidirlər.

Bu Sərəncamın 1-ci hissəsində göstərilən məqsədlər üçün Azərbaycan Respublikasının 2020-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan "Azərsu” Açıq Səhmdar Cəmiyyətinə 756,0 (yeddi yüz əlli altı) min manat ayrılıb.

Maliyyə Nazirliyi müvafiq məbləğdə maliyyələşməni təmin etməlidir.

Nazirlər Kabineti bu sərəncamdan irəli gələn məsələləri həll etməlidir.

 
 


 

"2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı” çərçivəsində ölkədə yeni rəqəmsal ödəniş texnologiyalarının tətbiqi, ödəniş xidmətlərinə əlçatanlığın artırılması məqsədilə Mərkəzi Bank tərəfindən reallaşdırılan Ani Ödənişlər Sistemi (AÖS) pilot rejimində istismara verilib.

Bu barədə Azərbaycan Mərkəzi Bankından bildirilib.

Məlumata görə, bu gün ölkəmizdə mövcud olan, Mərkəzi Bank tərəfindən yaradılmış Milli Ödəniş Sistemi infrastrukturu dünya praktikasında mövcud olan ənənəvi ödəniş sistemləri baxımından ən müasir tələblərə cavab verir və informasiya texnologiyaları sahəsində ən son nailiyyətlərə əsaslanır. Milli Ödəniş Sistemi infrastrukturunun əsas komponentləri dünyada qəbul olunmuş iş prinsiplərinə uyğun olaraq təsdiq edilmiş reqlament çərçivəsində (09:00-17:00 intervalında) fəaliyyət göstərir. Lakin, müasir dövrün əsas çağırışı ödəniş xidmətlərinin hər yerdə, hər zaman əlçatan olması və əməliyyatlar üzrə hesablaşmaların ödənişlərin həyata keçirildiyi anda başa çatdırıla bilməsidir.

AÖS fiziki şəxslər, biznes qurumları və dövlət orqanları arasında ödəniş əməliyyatlarının 24/7/365 rejimində bank hesabları üzərindən sadələşdirilmiş identifikatorlar (FİN kod, VÖEN, mobil nömrə, e-poçt) vasitəsilə aparılmasına və pul vəsaitinin dərhal vəsait alanın bank hesabında əks olunmasına imkan verəcəkdir. AÖS-ün istismara verilməsi rəqəmsal ödənişlərin effektivlik səviyyəsini yüksəldəcək, o cümlədən iştirakçılar üçün likvidliyin dərhal təmin olunmasına şərait yaradacaq.

Hazırda AÖS platformasında 13 bank və Dövlət Xəzinədarlığı Agentliyi üzrə inteqrasiya işləri tam başa çatdırılmış və pilot rejimində "B2B”, "C2C” ("Biznesdən biznesə”, "Müştəridən müştəriyə") tipli ödənişlərin həyata keçirilməsi təmin olunub.

AÖS-ün əhatəliliyinin genişləndirilməsi məqsədilə yeni bankların sistemə inteqrasiyası, eləcə də istifadəçilər üçün mərhələli şəkildə funksionallıqların artırılması istiqamətində işlər davam etdirilir. Cari ilin sonunadək sistemin kiçik təsərrüfat subyektlərinə QR kod, NFC kimi innovativ mobil həllərdən istifadə edərək nağdsız ödənişləri qəbul etmək imkanı verən funksionallıqları təqdim ediləcəkdir. Eyni zamanda, Mərkəzi Bankın operatoru olduğu Hökumət Ödəniş Portalı üzərindən təqdim olunan 600-ə yaxın xidmət üzrə ödənişlərin AÖS vasitəsilə həyata keçirilməsi funksionallığı da cari ilin sonunadək istifadəyə veriləcək.

AÖS üzrə yaradılan imkanlar iqtisadi subyektlər arasında rəqəmsal ödənişlərin genişləndirilməsinə, ölkədə nağd iqtisadiyyatın həcminin əhəmiyyətli azalmasına və yekunda nağdsız cəmiyyətin formalaşdırılmasına təkan verəcək.
Axtarış
Xəbər lenti
Reklam