Türkiyə dünya miqyasında güc mərkəzi kimi, bütün bölgələrdə, o cümlədən bölgəmizdə çox müsbət rol oynayır


Azərbaycanla Türkiyə dövlətləri arasında dostluq və qardaşlıq əlaqələri qədim tarixə malikdir. Əsrlər boyu Azərbaycan və türk xalqları hər zaman bir - birinə təsdət olmuş, sıx əməkdaşlıq bağlarını ta qədimdən bu günə kimi qoruyub saxlamışlar. Ulu öndərimiz Heydər Əliyevin hər bir Azərbaycan vətəndaşının hafizəsinə hopmuş, müdrikcəsinə dediyi kimi "bir millət, iki dövlət” olmuşuq. Türk dünyasının müdrik şəxsiyyəti Mustafa Kamal Atatürk Azərbaycanın kədərinin özlərinin kədəri, sevincini isə öz sevincləri adlandırması təsadüfi deyilmiş. Kəlamlar deyil. Türk dünyasının hər iki lider şəxsiyyətlərinin dediyi bu müdrik kəlamlar gələcək nəsillərə əbədi bir mesajdır. Türkiyə Azərbaycan arasındakı dostluq – qardaşlıq münasibətləri əbədi və sarsılmazdır.

Hər iki qardaş ölkənin prezidentlərinin qarşılıqlı rəsmi səfərləri hər iki ölkədə təntənə ilə qeyd edilməsi, toy – bayrama çevrilməsi bu dostuluğun, qardaşlığın bariz nümunəsi olduğunu sübut etdi. Qarabağ döyüşlərində türk qardaşlarımızın yanımızda olması, çıxışlarında qanımız bir, canımız bir, şairimiz, Bəxtiyarımız bir elimiz bir deyərək dünyaya mesaj göndərən, Azərbaycanın döyüş meydanında tək olmadığını, türkiyə kimi böyük qardaşının olduğunu və bu cür qardaşı olan ölkənin heç bir savaşdan qorxmayacağın dünya ölkələrinə bəyan etdi.
44 günlük müharibə dövründə də qardaş Türkiyə bizim – yəni haqqın tərəfində olduğunu bütün dünyaya bir daha sübut etdi.

Türkiyə bu gün dünya miqyasında güc mərkəzi kimi, bütün bölgələrdə, o cümlədən bölgəmizdə çox müsbət rol oynayır və bu, bölgənin sabitliyi üçün çox önəmlidir.Türkiyə Müdafiə Nazirliyindən 100-dən çox mütəxəssis Azərbaycana ezam edilib. Türkiyə, İran, gələcəkdə belə bir istək olarsa, Gürcüstan ümumi platformaya qoşula bilər,bu isə regionda sülh və asayişin təminatı deməkdir.

Keçən il 10 noyabr tarixli Bəyanatın bir bəndi Ermənistan ərazisində Azərbaycanı onun Naxçıvan Muxtar Respublikası ilə birləşdirən, həmçinin Azərbaycanı Türkiyə ilə və eyni zamanda, Rusiyanı Türkiyə ilə birləşdirən dəhliz açılması barədə idi. Buna görə də böyük planlar var və onlar reallaşacaq. Bu layihələrin reallaşması tək ölkəmiz və ya Türkiyə Respublikasına deyil, bütövlükdə region və Avropa ölkələrinə öz töhfəsini verəcəkdir.

Əminliklə deyə bilərik ki, yaxın gələcəkdə Azərbaycan – Türkiyə qardaşlığı bütün sahələrdə olduğu kimi, Qarabağımızdakı quruculuq sahəsində də öz sözünü deyəcəkdir.

Asiya Qəniyeva,
Salyan şəhər 4 saylı tam orta məktəbin tarix müəllimi
aia.az

 
Aqiyə Naxçıvanlı:

"Hələ də bəzi xarici jurnalistlər tərəfindən Azərbaycan Prezidentinə ünvanlanan suallarda işğaldan azad edilmiş ərazilərdə bundan sonra azərbaycanlıların və ermənilərin bir yerdə necə yaşaya biləcəklərinə dair müəyyən şübhələr yer alır. Halbuki, Prezident İlham Əliyevin dəyərli tövsiyyələri əsasında sadəcə Azərbaycanda yaşayan ermənilər deyil, hətta Ermənistanın özü də özünə normal bir gələcək qura bilər. 4 saat ərzində, 4 dildə təxminən 50 suala ətraflı cavab verən Azərbaycan Prezidenti dünyanın aparıcı informasiya vasitələrinin nümayəndələrinə təkcə ölkəmizin deyil, ümumilikdə Cənubi Qafqaz regionunun perspektiv inkişaf planlarına dair dolğun məlumatlar təqdim etdi.” Bu sözləri mətbuata verdiyi açıqlamasında Azərbaycan Respublikası Milli Məclisinin deputatı, professor Aqiyə Naxçıvanlı deyib.
Millət vəkilinin sözlərinə görə dövlət başçısına ünvanlanan suallar arasında postmüharibə dövründə Ermənistan tərəfindən 10 noyabr Bəyanatının icrasından boyun qaçırmaq kimi halların yer alıb-almadığına dair sualların tez-tez səslənməsi də təbii haldır. Aqiyə Naxçıvanlı bu vəziyyəti Ermənistanın artıq beynəlxalq ictimaiyyət tərəfindən də öz öhdəliklərinə əməl etməyə biləcək qədər etibarsız dövlət kimi tanındığı ilə izah edib: "Təbii ki, ölkələrimizin beynəlxalq nüfuzu və etibarlılığı baxımından Azərbaycan və Ermənistan qətiyyən müqayisə edilə biləcək dövlətlər deyillər. Ümumiyyətlə Ermənistan heç bir müstəvidə Azərbaycanla müqayisə edilə biləcək bir durumda deyil. 10 noyabr Üçtərəfli Bəyanatından irəli gələn öhdəliklərin icrasına gəlincə isə, Ermənistan bunu etməyə sadəcə məcburdur. Azərbaycan Prezidenti cənab İlham Əliyevin dediyi kimi, Ermənistanda hakimiyyətdə kimin olmasından asılı olmayaraq, 10 noyabr Bəyanatının icrasına mane olmaq cəhdləri bu ölkə üçün çox zərərverici olacaqdır. Bu, onlar üçün sui-qəsd olacaqdır, vəziyyət bundan da qat-qat pis olacaqdır. Ona görə bu gün Ermənistanda anlamalıdırlar ki, bu vəziyyət Azərbaycana qarşı işğalçılıq siyasətinin bilavasitə nəticəsidir. Bu, son iki ildə baş verən və ya bir neçə ayın nəticəsində baş verən hadisə deyil, bunun birbaşa səbəbi işğaldır. Bu gün Azərbaycan öz ərazi bütövlüyünü bərpa etdikdən sonra artıq bütün Cənubi Qafqaz regionunda yeni reallıqlar yaratmışdır. Bu yeni reallıqların münbit fonunda açılan imkanlardan bütün region dövlətləri və qonşu ölkələr öz firavan gələcəklərini qurmaq və iqtisadiyyatlarını daha da inkişaf etdirmək üçün yararlana bilərlər. Lakin bunun üçün ilk növbədə düşmənçilik, ərazi iddiaları, revanşist xülyalar kimi zərərli ideyalardan imtina edilməlidir. Çünki bu gün artıq Azərbaycanla nəinki Ermənistan, hətta dünyanın ən güclü ölkələri belə başqa tərzdə danışa bilməzlər.”
Aqiyə Naxçıvanlı keçirilən mətbuat konfransında Xocalı soyqırımı ilə bağlı Ölkə Prezidenti tərəfindən jurnalistlərə ətraflı məlumatların verildiyini qeyd edərək məhz bu baxımdan da tədbirin müstəsna əhəmiyyət kəsb etdiyini vurğuladı: "Azərbaycan Vətən müharibəsində əldə etdiyi tarixi qələbə ilə bütün şəhidlərinin, o cümlədən Xocalı qurbanlarının qanını düşməndən döyüş meydanında aldı. Lakin bununla belə, Xocalı qətliamı bizim sağalmaz yaramızdır. Azərbaycan Respublikasının Prezidenti cənab İlham Əliyevin səyləri nəticəsində son illər Xocalı həqiqətlərinin dünyaya tanıdılması, erməni terrorçularının həyata keçirdiyi insanlıq əleyhinə cinayətlərin beynəlxalq miqyasda ifşası istiqamətində xeyli iş görülüb. Bu işlərin nəticəsidir ki, artıq İslam Əməkdaşlıq Təşkilatı , Meksika, Pakistan, Çexiya, Peru, Kolumbiya, Panama, Honduras, Sudan, Qvatemala və Cibuti parlamentlərinin müvafiq sənədlərində Xocalıda törədilmiş kütləvi qətllərin soyqırımı aktı olması öz təsdiqini tapıb. Həmçinin Rumıniya, Bosniya və Herseqovina, Serbiya, İordaniya, Sloveniya, Şotlandiya parlamentləri, ABŞ-ın 22 ştatının icra və qanunvericilik orqanları Xocalı soyqırımını qətliam kimi qiymətləndirərək qətiyyətlə pisləyiblər. Lakin keçirdiyi mətbuat konfransında media nümayəndələrinə müraciət edən Prezident İlham Əliyev erməni faşizminin bariz təzahürü olan bu faciə haqqında bir daha ətraflı məlumat verməklə Azərbaycanın bu istiqamətdə bundan sonra hələ çox iş aparmalı olduğunu vurğuladı.”
Həmçinin millət vəkili Prezident İlham Əliyevin keçirdiyi mətbuat konfransında Azərbaycan-Türkiyə dostluq və qardaşlıq münasibətlərinin bundan sonra daha da inkişaf edəcəyinə dair bəzi qüvvələrə aşkar mesajlar ötürdüyünü də diqqət mərkəzinə çəkdi: "Etiraf olunmalıdır ki, bu gün Azərbaycan - Türkiyə dostluğu dünyada bir çox qüvvələri narahat edir. Məhz bu səbəbdən də həmin qüvvələr tərəfindən iki qardaş ölkə arasında tərəfdaşlıq və müttəfiqliyin yalnız müharibə dövrünə hesablandığına və müharibədən sonra bu münasibətlərin pozulacağına dair şayiələr hazırlanıb yayımlanır. Lakin Azərbaycan Prezidenti öz açıqlamaları ilə bu gümanda olanların dərindən yanıldıqlarını da sübut etdi. "Türkiyə müharibənin ilk günlərindən çox müsbət davranış göstərib. Sülhə, sabitliyə hesablanmış davranış. Eyni zamanda, ilk günlərdən Azərbaycanın haqq işinə Türkiyə öz dəstəyini göstərmişdir. Əziz qardaşım hörmətli Prezident ilk günlərdən çox dəqiq açıqlamalar vermişdir... Türkiyə bu gün dünya miqyasında güc mərkəzi kimi, bütün bölgələrdə, o cümlədən bizim bölgəmizdə çox müsbət rol oynayır və bu, bölgənin sabitliyi üçün çox önəmlidir” – deyən Prezident İlham Əliyev bir daha Azərbaycan-Türkiyə qardaşlığının əbədi olduğunu təsdiqlədi.”

Abbas Abbasov
AİA.Az

Mübariz Qurbanlı:
"Ordumuz ermənilər üzərində şanlı qələbə qazanıb və qarşı tərəf bunu həzm edə bilmir. Bir qrup terrorçunun Azərbaycan tərəfindən vuruşması yalanını yaymaqla regionda bəzi dövlətlərdən dəstək alaraq ölkəmizə qarşı müəyyən qabaqlayıcı tədbirlərin görülməsini istəyirdilər”.
 
Bunu YAP icra katibinin müavini Mübariz Qurbanlı "Yeni TV"də çıxışı zamanı deyib.
 
Onun sözlərinə görə, bununla erməni xalqını məğlubiyyətə uğradıqlarından yayındırmağa çalışırdılar: "Əsas gətirmək istəyirdilər ki, guya məğlubiyyətləri Azərbaycana gətirilən muzdlu döyüşçülər səbəbindən olub. Kənardan gələn vardısa, onları kim görüb? Azərbaycanın buna ehtiyacı da yoxdur. Çünki ölkəmizin kifayət qədər ordusu var. Əksinə, ermənilər kənardan döyüşçülər gətirib və bu faktlar da var. Fakt yoxdursa, hər hansı şayiə və söz-söhbət salmaq mənasızdır”.

 
Səttar Möhbalıyev:

"Biz hamımız 44 günlük Vətən müharibəsi dövründə Ölkə Prezidenti cənab İlham Əliyevin dünyanın ən aparıcı media qurumlarına hər gün müsahibələr verdiyinin, Azərbaycanın haqlı mövqeyini dünyaya necə böyük məharətlə qəbul etdirdiyinin şahidi olduq. Həmin müsahibələrdə Azərbaycan Prezidenti hətta qərəzli, bəzən isə açıq-aşkar düşmən mövqelərdən çıxış edən jurnalistlərə qarşı peşəkar siyasətçiyə, dünya səviyyəli liderə məxsus böyük səbr, qətiyyət, soyuqqanlılıq nümayiş etdirərək, onlara tarix, beynəlxalq hüquq dərsi keçirdi. Fevralın 26-da Azərbaycan Respublikasının Prezidenti cənab İlham Əliyevin yerli və xarici media nümayəndələri üçün keçirdiyi mətbuat konfransında isə dünya Azərbaycan həqiqətlərini artıq birbaşa qalib ölkənin Birinci şəxsinin dilindən eşitmiş oldu. 4 saat ərzində, 4 xarici dildə təxminən 50 sualı tutarlı dəlillərlə, əsaslı şəkildə cavablandıran Azərbaycan Prezidenti ölkəmizin beynəlxalq aləmdə mövqeylərini daha da gücləndirdi.” Mətbuata verdiyi açıqlamasında bu sözləri Milli Məclisin deputatı, Azərbaycan Həmkarlar İttifaqları Konfederasiyasının sədri Səttar Möhbalıyev deyib. Millət vəkili bildirib ki, əslində bu mətbuat konfransı həm də Ermənistanın hələ də revanşist xülyalara dalan bəzi dairələrinə və onların dünyada olan havadarlarına ünvanlanmış ciddi xəbərdarlıq oldu. Digər tərəfdən isə AHİK sədrinin sözlərinə görə, xarici jurnalistlər tərəfindən verilən sualların həm qoyuluşunda, həm də mahiyyətində artıq dünya ictimaiyyətinin Azərbaycanı bir qalib ölkə və dünya siyasətinə təsir edə biləcək gücə sahib olan bir dövlət kimi qəbul etdiyini təsdiqləyən aşkar notlar yer almışdı: "Prezident İlham Əliyevin keçirdiyi bu mətbuat konfransı da Azərbaycan liderinin jurnalistlərlə keçirdiyi bütün digər görüşləri kimi dolğunluğu, əhatəliliyi və məzmun dərinliyi ilə yadda qaldı. Təbii ki, verilən suallar arasında Qarabağ mövzusu, eləcə də Azərbaycanla Ermənistan arasında münasibətlərin inkişaf perspektivlərinə dair suallar üstünlük təşkil edirdi. Məlumdur ki, Ermənistan hazırda dərin iqtisadi və siyasi böhran içərisindədir. Bəzi revanşist qüvvələr vəziyyətdən yararlanaraq hakimiyyətə gəlməyə calışırlar. Təbii ki, onların arasında öz məqsədləri naminə erməni xalqınım heysiyyatı ilə oynayaraq Qarabağı yenidən Ermənistana birləşdirmək kimi absurd və gülünc vədlər verənlər də var. Lakin reallıqlara bu baxış prizması, belə yanaşma tərzi erməni xalqına yeni bədbəxtliklərdən başqa heç nə gətirə bilməz. Reallıq isə budur ki, Azərbaycan Vətən müharibəsində qalib gələrək öz ərazi bütövlüyünü təmin etdi. Bu gün artıq Qarabağda və işğaldan azad edilmiş digər ərazilərimizdə bərpa və quruculuq işləri getdikcə artan vüsətlə davam edir. Ölkə Prezidenti cənab İlham Əliyevin dediyi kimi, müharibənin nəticələri dəyişməz olaraq qalır və qalacaq. Noyabrın 10-da imzalanmış Bəyanat icra edilir və tam icra edilməlidir. Hətta bu gün Ermənistanda yaranmış vəziyyətə baxmayaraq, noyabrın 10-da imzalanmış Bəyanatın icrasında hər hansı əskiklik olarsa, Ermənistan daha da ağır duruma düşəcək. Azərbaycan Prezidenti mətbuat konfransının gedişində ona verilən sualları cavablandırarkən bu məqama tam aydınlıq gətirməklə ölkəmizin mövqeylərini daha da möhkəmləndirmiş və artıq hər kəsin Azərbaycanı qalib ölkə olaraq qəbul etmək məcburiyyətində olduğunu vurğulamışdır. Yeri gəlmişkən, bir çox xarici jurnalistlərin öz suallarını səsləndirməkdən öncə Prezident İlham Əliyevə etdikləri müraciətlərində ifadə olunan fikirlər onların və təmsil etdikləri qurumların Cənubi Qafqazda yaranmış yeni reallıqları düzgün qiymətləndirdiklərindən və olduğu kimi qəbul etdiklərindən xəbər verirdi.”

Daha sonra Səttar Möhbalıyev keçirilən mətbuat konfransının Azərbaycan həqiqətlərinin və xüsusilə Xocalı soyqırımı ilə bağlı həqiqətlərin dünyaya çatdırılması baxımından da müstəsna əhəmiyyət kəsb etdiyini vurğuladı: "Əlbəttə ki, Ölkə Prezidenti cənab İlham Əliyevin keçirdiyi bu mətbuat konfransının məhz fevralın 26-da, Xocalı faciəsinin 29-cu ildönümü günündə baş tutması da təsadüfi deyildi. Giriş sözü ilə iştirakçılara müraciət edən Prezident İlham Əliyev erməni faşizminin bariz təzahürü olan bu qətliam haqqında bir daha ətraflı məlumat verdi. Vurğulamaq lazımdır ki, Azərbaycan həqiqətlərinin, o cümlədən Xocalı qətliamı ilə bağlı həqiqətlərin bütün ölkələr tərəfindən birmənalı olaraq qəbul edilməsi gələcəkdə dünyanın heç bir yerində belə hadisələrin təkrar olunmaması üçün zəruri şərtlərdən biridir. Ölkə Prezidentinin dediyi kimi, bu gün artıq Xocalı soyqırımı dünya ictimaiyyəti tərəfindən tanınır, 10-dan çox ölkə bu hadisəni rəsmən soyqırımı kimi tanımış, təsdiq etmişdir və bu proses davam etdirilir. Azərbaycan dövləti, eyni zamanda, ölkəmizin ictimai təşkilatları bu sahədə böyük fəallıq göstərirlər və bu gün dünyada Xocalı soyqırımı haqqında kifayət qədər dolğun məlumat vardır. Ermənistan dövlətinin hərbi cinayətləri sənədləşdirilib, video, foto materiallar kifayət qədər geniş auditoriyaya təqdim edilibdir. İndi bütün dünya görür və bilir ki, Azərbaycan xalqı XX əsrin sonunda soyqırımına məruz qalmışdır.”

Sonda Səttar Möhbalıyev Rusiyanın "Bolşaya Aziya” mediaholdinqinin təmsilçisi tərəfindən verilən sualı xatırladaraq Azərbaycanın ədalətli mövqeyinin burada da öz yüksək qiymətini aldığını vurğuladı: "Rusiya Silahlı Qüvvələrinin "Zvezda” mediaholdinqini və "Bolşaya Aziya” mediaholdinqini təmsil edən jurnalistin sualı mənim diqqətimi xüsusi olaraq cəlb etdi. O, dedi: "Cənab Prezident, Siz bütün dünyanın gözü qarşısında nadir presedent yaratdınız. Çünki Siz Qarabağ müharibəsi zamanı mütləq mənada sülhməramlı kimi çıxış etdiniz. Siz 23 dəfə sülh haqqında danışdınız, halbuki digər tərəf bir dəfə də olsun, bu cür bəyanat vermədi...” Etiraf olunmalıdır ki, Rusiya tarixən Ermənistana dəstək verən, onu himayə edən, hətta daha dəqiq desək bu dövləti vaxtilə quran və bu günədək yaşadan ölkədir. Düşünürəm ki, bütün bu münasibətlərə rəğmən Rusiyalı hərbi jurnalistin Azərbaycan Prezidentinə xitabən ifadə etdiyi sözlər əsil etiraf kimi qəbul edilməlidir. Azərbaycanın təkcə hərbi deyil, həm də mənəvi qələbəsinin etirafı kimi.

Bəli, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev son 17 ildə bir deyil, sonsuz sayda presedentlər yaradıb, möhtəşəm ilklərə imza atıb. Azərbaycanın Vətən müharibəsində əldə etdiyi tarixi zəfər də bu günədək xalqımızın, dövlətimizin tarixində yer almış ən möhtəşəm qələbə kimi daha bir ilk oldu. Bundan sonra da Azərbaycanın yeni qələbələrinin, tarixi nailiyyətlərinin davamı gələcək və ölkəmiz dünyanın ən qüdrətli dövlətləri sırasında öz layiqli yerini tutacaq.”


"Baykar" kompaniyasının baş direktoru Rusiya REM vasitələrinin türk "Bayraktar TB2" pilotsuz vasitələrinə müqavimət göstərməyə qadir olmadığını açıqlayıb.

Bu barədə o, Twitch-də jurnalist İbrahim Haskologluya bildirib.  

"Rusiya radioelektron mübarizə sistemləri "Bayraktar TB2"-ni bir saat belə dayandıra bilmədilər",-deyə o bildirib.

"Baykar" rəhbəri şirkətin pilotsuz uçan aparat üçün REM-ə qarşı qorunma inkişaf etdirdiyini, buna görə "onun hər zaman havada olacağını" əlavə edib.

Tofiq Abbasov: "Bütün dünya "erməni terroru” fenomenininin mövcudluğunu bilir, amma çoxu bu barədə susur”

 

Azərbaycanın uzun illərdir ki, erməni terroruna qarşı mübarizə aaprdığını, ordumuzun 8 noyabr zəfəri ilə terrorçu qüvvələr, işğalçı ordu üzərində parlaq zəfər çaldığı hər kəsə məlumdur. Lakin təəssüflər olsun ki, bu gün də bəzi qüvvələr müxtəlif yollarla məğlub Ermənistan ordusunu dirçəltməyə, onu müasirləşdirməyə çalışır, erməni terrorunun ifşası istiqamətində atılan addımları dəstəkləmirlər.

 

Moderator.az-a açıqlamasında bu məqama diqqət çəkən politoloq Tofiq Abbasov, əslində bütün dünyanın erməni terrorunun mövcudluğuna, onun qanlı simasına yaxşı bələd olduğunu, lakin əksər dövlətlərin bu haqda susmağa üstünlük verdiyini qınadı:

 

"Azərbaycan uzun illərdir ki, erməni terroruna qarşı mübarizə aparır. Lakin dünyanın aparıcı dövlətləri, böyük gücləri səslərini belə çıxarmırrlar. Söznən də olsa bildirmirlər ki, bu düzgündür, ya düzgün deyil. Halbuki, Azərbaycanın erməni terroruna qarşı apardığı mübarizə bütövlükdə dünyada sülhün, təhlükəsizliyin möhkəmlənməsi baxımından vacib addımlardır.

 

"Erməni terroru” termini ABŞ-da 1980-ci il illərdə  dərc edilən jurnallarında işlədilib. Bu ifadəni ABŞ mütəxəssisləri, ekspertləri işlədiblər. Deməli, onlar bu fenomenin olmasını danmırlar, amma terrora qarşı aparılan mübarizəni qəribçiliyə salmaq istəyirlər. Belə bir mövqe ədalətli sayılmadığı kimi, Azərbaycanın terrora qarşı apardığı mübarizədən də çəkindirə bilməz. Azərbaycan terrora qarşı hər zaman qətiyyətlə mübarizə aparıb və bundan sonra da bu məsələdə daim ciddi prinsipiallıq sərgiləyəcək”.


Qarabağda Rusiya sülhməramlıları üçün daha 4 şəhərcik salındı
Dağlıq Qarabağda rus sülhməramlıları üçün daha 4 yeni modul tipli şəhərcik tikilib.
 
Modern.az xəbər verir ki, bu barədə bazar ertəsi Rusiya Müdafiə Nazirliyinin mətbuat xidmətindən bildirilib.
 
Yeni modul tipli qəsəbələrin Xankəndi və Xocavənddə istifadəyə verildiyi qeyd olunur.
 
Beləliklə, bu günə qədər sülhməramlı kontingentin hərbi heyəti üçün 8 qəsəbə inşa edilib.
 
"Modul qəsəbələrin inşası sülhməramlı heyət üçün rahat yaşayış şəraiti yaratmağa, qida, hamam və çamaşır məsələlərini yaxşılaşdırmağa imkan verib", - deyə məlumatda bildirilib.
 
Bu şəhərciklər enerji təchizatı, isitmə, hamam otaqları, su, kanalizasiya, mebel və məişət texnikası - bütün zəruri komponentlərlə təchiz olunmuş obyektlər sayılır.
 
Hər şəhərciyin ərazisində süni örtüklü idman zalı, tibb məntəqəsi, istirahət məkanı, ofis, anbar otağı, yeməkxana və dükan var.
 
Xatırladaq ki, Rusiya, Azərbaycan və Ermənistan liderləri - Vladimir Putin, İlham Əliyev və Nikol Paşinyan 10 noyabr 2020-ci il tarixində Qarabağda atəşkəsə dair birgə bəyanat qəbul ediblər.
 
Rusiya Federasiyasının sülhməramlı kontingenti atəşkəsə nəzarət etmək üçün 1960 nəfərlik hərbi heyət, 90 zirehli texnika, 380 ədəd avtomobil və xüsusi texnika ilə Dağlıq Qarabağda yerləşdirilib.

 
Azərbaycan diplomatiyasının növbəti qələbəsi

"Dörd saat ərzində, dörd dildə, təxminən 50 sualı heç bir şübhə və tərəddüd üçün yer qoymadan cavablandıran Azərbaycan Prezidenti İlham Əliyev dünyanın aparıcı informasiya vasitələrinin nümayəndələri və yerli jurnalistlər qarşısında Dağlıq Qarabağla bağlı qəti mövqeyini bir daha ortaya qoymaqla Azərbaycanın Cənubi Qafqazda artıq yeni reallıqlar yaratdığına və hər kəsin də bu reallıqları qəbul etmək məcburiyyətində olduğuna dair növbəti dəfə bütün dünyaya aşkar mesaj ünvanlamış oldu” . Bu sözləri mətbuata verdiyi açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Millət vəkilinin sözlərinə görə, dövlət başçısına ünvanlanan suallar arasında Qarabağla bağlı, xüsusilə də bölgədə mövcud olan hazırkı vəziyyət və gələcək planlara dair sualların üstünlük təşkil etməsi dünya ictimaiyyətinin ölkəmizə və regionda gedən proseslərə olan böyük marağından xəbər verir: "Təbii ki, Azərbaycanın tarixi qələbəsilə başa çatmış Vətən müharibəsinin nəticələri və bölgənin, eləcə də ümumilikdə Cənubi Qafqazın bundan sonrakı inkişaf perspektivləri ilə bağlı bir çox suallar, hazırda aparıcı dünya dövlətlərinin rəhbərləri ilə yanaşı, dünya ictimaiyyətini də son dərəcə maraqlandıran məsələlərdəndir. Nəzərə alsaq ki, Azərbaycan artıq uzun müddətdir ki, regionun lider dövləti kimi çıxış edir və öz ərazi bütövlüyünü təmin etdikdən sonra, həm də məhz öz gücünə qalib gəldiyi müharibənin nəticəsi olaraq təmin etdikdən sonra bu mövqeyini daha da möhkəmləndirib, o zaman bu marağın əsassız olmadığını anlamaq çətin deyildir. Digər tərəfdən isə, bu gün ölkəmizin Avropanın enerji təhlükəsizliyinin təmin edilməsində oynadığı rolun önəmi dəfələrlə artıb. Artıq Azərbaycanla hesablaşmaq, Azərbaycanı dinləmək və eşitmək vaxtı olduğunu dünyanın bir çox inkişaf etmiş aparıcı ölkələri qəbul edirlər. Yeri gəlmişkən, mətbuat konfransında dövlətimizin başçısına ünvanlanan suallardan bu da məlum olurdu ki, xarici jurnalistləri Azərbaycan Prezidenti cənab İlham Əliyevin ölkəmizin daxili məsələləri ilə bərabər, həm də regional və dünya miqyaslı problemlərə dair fikir və rəyləri, gedən proseslərə münasibəti də maraqlandırırdı. Başqa sözlə desək, Prezident İlham Əliyevin dünyanın siyasi elitasının nüfuzlu nümayəndələrindən biri kimi qəbul edildiyi bu mətbuat konfransında bir daha öz təsdiqini tapmış oldu.”

Kamaləddin Qafarov keçirilən mətbuat konfransının həmçinin Azərbaycan həqiqətlərinin, o cümlədən Xocalı soyqırımı ilə bağlı həqiqətlərin dünyaya çatdırılması baxımından da xüsusi əhəmiyyət kəsb etdiyini vurğuladı: "Ölkə Prezidentinin keçirdiyi mətbuat konfransı üçün məhz 26 fevral tarixinin, Xocalı soyqırımının 29-cu ildönümü gününün seçilməsi də, əlbəttə ki, təsadüfi deyildi. Media nümayəndələrinə müraciət edən Prezident İlham Əliyev erməni faşizminin törətdiyi bu qanlı soyqırımı haqqında daha ətraflı məlumat verməklə Azərbaycan həqiqətlərinin bizimlə tərəfdaş olmaq, əməkdaşlıq etmək istəyən bütün ölkələr tərəfindən birmənalı olaraq qəbul edilməsinin zəruriliyini vurğulamış oldu. "Xocalı soyqırımını törədənlər hərbi cinayətkarlardır. Onların bir çoxu İkinci Qarabağ müharibəsində Azərbaycan Ordusu tərəfindən məhv edilmişdir”- deyən dövlət başçısı ölkəmizin öz problemlərini özü həll etmək iqtidarında olduğunu qeyd edərək, eyni zamanda da beynəlxalq ictimaiyyətin, dünya ölkələrinin bu məsələyə münasibətinin bizim üçün əhəmiyyətli olduğunu bildirdi. Qeyd edildi ki, Xocalı soyqırımı artıq dünya ictimaiyyəti tərəfindən tanınır, 10-dan çox ölkə bu hadisəni rəsmən soyqırımı kimi tanımış, təsdiq etmişdir və bu proses davam etdirilir. Bu məsələ ilə bağlı diqqəti çəkən məqamlardan biri də bu oldu ki, bir çox xarici jurnalistlər Xocalı hadisələrini məhz soyqırımı kimi qəbul etdiklərini birmənalı şəkildə ifadə etdilər. O cümlədən Böyük Britaniyanın "Teleqraf” qəzetinin təmsilçisinin Azərbaycan Prezidentinə müraciət edərək: "Bu qorxunc soyqırımını anım günündə bizimlə görüşdüyünüzə görə təşəkkür edirəm”- deyə sözə başlaması da jurnalistin və onun təmsil etdiyi media qurumunun bu məsələyə münasibətindən xəbər verir.”

Millət vəkili Dağlıq Qarabağın statusu ilə bağlı verilən suala cavab olaraq Prezident İlham Əliyevin öz qəti mövqeyini ortaya qoymasını Azərbaycanın Cənubi Qafqazda yeni reallıqlar yaratdığına və bu reallıqların bütün dünya tərəfindən qeyd-şərtsiz qəbul ediləcəyinə dair növbəti mesaj kimi qiymətləndirdiyini bildirdi: "Etiraf edim ki, jurnalistlərdən biri tərəfindən verilən, statusla bağlı sual məni bir qədər təəccübləndirdi. Daha dəqiq desəm, sualın qoyuluşu. Əgər diqqət etdinizsə həmin sualda belə bir ifadə yer almışdı: "...Siz dediyiniz kimi, beynəlxalq ictimaiyyətin ciddi əleyhinə olduğu 44 günlük Vətən müharibəsini Müzəffər Ali Baş Komandan kimi uğurla yekunlaşdırdınız. ... Amma beynəlxalq ictimaiyyətdə belə bir qənaət var - Dağlıq Qarabağın statusu tam olaraq müəyyənləşmədən bu müharibə heç vaxt bitməz...” Artıq sualın özündə yer almış ziddiyyət də açıq-aydın göstərir ki, beynəlxalq ictimaiyyətin rəyi heç də həmişə alternativsiz həqiqət kimi qəbul edilə bilməz. Bəli, 30 il ərzində bir çox beynəlxalq qurum və təşkilatlar bu müharibənin əleyhinə çıxış etdilər, bizi və bütün dünyanı münaqişənin hərbi yolla həllinin olmadığına inandırmağa çalışdılar. Bu qüvvələr sadəcə olaraq ölkəmizin ərazi bütövlüyünün bərpa olunmamasını və torpaqlarımızda ikinci erməni dövlətinin yaradılmasını istəyirdilər. Prezident İlham Əliyev hər zaman bunun əksini söylədi və tarix də məhz Azərbaycan Prezidentinin haqlı olduğunu təsdiqlədi. Əminəm ki, bu gün də beynəlxalq ictimaiyyətdə "Dağlıq Qarabağın statusu tam olaraq müəyyənləşmədən bu müharibə heç vaxt bitməz” kimi əsassız və tamamilə yanlış rəy formalaşdırmaq istəyənlər məhz həmin qüvvələrdir. Dövlət başçısının bu suala verdiyi qəti cavab isə həmin qüvvələrə ünvanlanmış net bir mesaj kimi qiymətləndirilə bilər: "Mən bu haqda artıq demişəm, bir daha demək istəyirəm ki, Dağlıq Qarabağ münaqişəsi başa çatıb. Azərbaycan bu münaqişənin bir tərəfi idi. Biz bu fikri açıq-aydın ifadə edirik ki, Dağlıq Qarabağ münaqişəsi artıq həll olunub. ...O ki qaldı, statusa, mən öz çıxışlarımda statusun ünvanını göstərdim. Bir daha o məsələyə qayıtmaq istəmirəm. Status haradadır, onu hər kəs bilir. Hesab edirəm ki, Ermənistan və erməni xalqı üçün bu məsələ nə qədər az dilə gətirilərsə, o qədər də yaxşı olar.” Bu o deməkdir ki, artıq Dağlıq Qarabağın hər hansı bir statusu barədə xəyallar qurmağın deyil, Azərbaycanla gələcək əməkdaşlıq barədə düşünməyin vaxtıdır. Bunun üçün isə Azərbaycanı qalib ölkə və Cənubi Qafqazda yaranmış yeni reallıqların müəllifi kimi qəbul etmək və bizimlə bütün münasibətləri də məhz bu yanaşma nöqtəsindən qurmağa cəhd etmək lazımdır”.
Azərbaycanda iqtisadi artım üzrə İşçi Qrup yaradılıb
Azərbaycanda "2021-2025-ci illərə dair sosial-iqtisadi inkişaf Strategiyası”nın hazırlanması məqsədilə dayanıqlı artan rəqabətqabiliyyətli iqtisadiyyat üzrə alt İşçi Qrup yaradılıb.
 
İşçi Qrupun tərkibi aşağıdakı kimidir:
 
İşçi Qrupun rəhbəri
 
İqtisadiyyat naziri
 
İşçi Qrupun üzvləri:
 
İqtisadiyyat nazirinin müavini
Maliyyə nazirinin müavini
Əmək və Əhalinin Sosial Müdafiəsi nazirinin müavini
Mərkəzi Bankın sədrinin müavini
Kənd Təsərrüfatı nazirinin müavini
Nəqliyyat, Rabitə və Yüksək Texnologiyalar nazirinin müavini
Energetika nazirinin müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
Dövlət Turizm Agentliyi sədrinin müavini
Dövlət Şəhərsalma və Arxitektura Komitəsi sədrinin müavini.
 
Həmçinin strategiyanın hazırlanması məqsədilə makroiqtisadi dayanıqlılıq üzrə alt İşçi Qrup yaradılıb. Onun isə tərkibi aşağıdakı kimidir:
 
İşçi Qrupun rəhbəri
 
Mərkəzi Bankının sədri
 
İşçi Qrupun üzvləri:
 
Maliyyə nazirinin müavini
İqtisadiyyat nazirinin müavini
Əmək və Əhalinin Sosial Müdafiəsi nazirinin müavini
Dövlət Neft Fondunun icraçı direktorunun müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
 
Bundan başqa, aşağıdakı tərkibdə Strategiyanın hazırlanması məqsədilə dayanıqlı dövlət borcu və büdcə sabitliyini təmin edən Makro-Fiskal Çərçivə üzrə alt İşçi Qrup yaradılıb.
 
İşçi Qrupun rəhbəri
 
Maliyyə naziri
 
İşçi Qrupun üzvləri:
 
Maliyyə nazirinin müavini
İqtisadiyyat nazirinin müavini
Əmək və Əhalinin Sosial Müdafiəsi nazirinin müavini
Mərkəzi Bankın sədrinin müavini
Dövlət Neft Fondunun icraçı direktorunun müavini
Dövlət Gömrük Komitəsi sədrinin müavini
Dövlət Statistika Komitəsi sədrinin müavini
 
Xatırladaq ki, Baş Nazir Əli Əsədov "Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında” ölkə Prezidentinin 2021-ci il 2 fevral tarixli sərəncamı ilə verilmiş tapşırıqların və uyğun olaraq qarşıda duran məsələlərin icrasının təmin edilməsi haqda sərəncam imzalayıb. "2021-2025-ci illərə dair sosial-iqtisadi inkişaf Strategiyası”nın hazırlanması məqsədilə yaradılmış Komissiyanın 5 prioritet istiqamət üzrə fəaliyyət göstərəcək 10 alt işçi qrupu yaradılıb və onlara müvafiq tapşırıqlar verilib.

Prezident
Prezident İlham Əliyev "Dövlət rüsumu haqqında” qanuna dəyişikliyi təsdiqləyib.
 
Dəyişikliklə Azərbaycanda sənədlərin surətinin notarial təsdiqi üçün rüsumun miqdarı azaldılaraq 1,5 manat müəyyən edilib.
 
Notariat xidmətlərinin göstərilməsi sahəsində vətəndaş məmnunluğunun artırılması məqsədilə edilən dəyişikliklə sənədlərin surətinin təsdiqi üçün rüsumun miqdarı azaldılaraq 1,5 manat müəyyən edilib. Sənəddə göstərilən bir sıra hallarda notariat hərəkətləri ilə əlaqədar xidmətə görə haqq tutulmayacaq.
 
Qeyd edək ki, hazırda sənədlərin notarial təsdiqinə görə rüsumun məbləği 5 manatdır.
 
Bu Qanun 2021-ci il martın 1-dən qüvvəyə minir.
Axtarış
Xəbər lenti
Reklam