Səttar Möhbalıyev:


Artıq xəbər verildiyi kimi, yanvarın 14-də Azərbaycan Respublikasının Prezidenti cənab İlham Əliyev, birinci xanım Mehriban Əliyeva və qızları Leyla Əliyeva Azərbaycanın işğaldan azad edilən mədəniyyət paytaxtı Şuşa şəhərinə səfər ediblər. İlk növbədə qeyd olunmalıdır ki, möhtərəm dövlət başçımızın indiyədək işğaldan azad edilmiş dügər rayon və şəhərlərimizə etdiyi səfərləri kimi, Şuşaya bu səfəri də Ali Baş Komandanın ürəyində yaşatdığı sonsuz Vətən sevgisinin və xalqa olan bağlılığının daha bir təcəssümüdür. Eyni zamanda da Ölkə Prezidentinin yanvarın 11-də keçirilmiş məlum Moskva görüşündən dərhal sonra ailəsilə birlikdə Şuşaya səfər etməsi Qarabağın əsl sahibinin kim olduğuna dair bütün dünyaya ünvanlanmış növbəti mesaj kimi qiymətləndirilməlidir.
Otuz il Azərbaycan ərazilərini işğal altında saxlamış erməni qəsbkarları bütün dünyaya Qarabağın, o cümlədən Şuşanın erməni torpaqları olduğuna dair saxta məlumatlar yaymaqla məşğul oldular. Lakin möhtərəm Prezidentimizin də öz çıxışında qeyd etdiyi kimi, onlar bütün bu müddət ərzində bu torpaqlarda bir daşı belə daş üstünə qoymadılar. Əksinə, uzun illər boyunca xalqımızın bu torpaqlarda qurub-yaratdığı evlər, muzeylər, məscidlər, tarixi-mədəni abidələrimiz ermənilər tərəfindən dağıdıldı, viran qoyuldu, talan edildi. Çünki bu yerlərin onlara aid olmadığını və gec-tez buralardan qovulacaqlarını hamıdan yaxşı elə ermənilər özləri bilirdilər. Əlbəttə ki, torpağın əsl sahibi belə etmir. Torpağın əsl sahibi həmin torpaqda yollar çəkir, binalar tikir, qurur, yaradır, layihələr həyata keçirir, insanların firavan gələciyini təmin etmək üçün iş görür. Necə ki, Prezident İlham Əliyev Şuşa şəhərinə səfərindən öncə Əhmədbəyli-Füzuli-Şuşa avtomobil yolunun 27-ci kilometrində Füzuli-Şuşa yolunun, həmçinin Füzuli rayonunda hava limanının təməllərini qoydu. Möhtərəm Prezidentimiz dedi ki, Füzuli-Şuşa yolunun yeni işlənmiş layihəsinə körpü və tunellərin inşası daxildir. Yəni, çətin relyefə malik olan ərazilərdə dolama yolların yerinə körpü və tunellərin tikintisi nəzərdə tutulur. Yeni yol Füzuli hava limanı ilə əlaqələndiriləcək və bu yoldan İsa bulağına yeni yol çəkiləcək.
Budur torpağın əsl sahibinin yanaşma tərzi! Dövlətimizin başçısı sadəcə yol çəkilişi, infrastruktur layihələrinin icrası barədə göstərişlər verməklə kifayətlənmir. Ən xırda məqamlar, ən kiçik incəliklər belə Ölkə Prezidentinin diqqətindən yayınmır.
Vətən müharibəsinin Azərbaycanın tarixi qələbəsilə başa çatmasından cəmi iki ay vaxt keçməsinə baxmayaraq, artıq torpaqlarımıza Böyük qayıdış başlayıb və möhtəşəm quruculuq işlərinə, o cümlədən Ölkə Prezidenti tərəfindən Azərbaycanın mədəniyyət paytaxtı elan edilən Şuşanın bərpası və tarixi simasının özünə qaytarılması istiqamətində işlərə start verilib. Böyük qürur doğuran önəmli məqamlardan biri də budur ki, Şuşanın işğalı zamanı Xurşidbanu Natəvanın, Üzeyir Hacıbəylinin, Bülbülün Şuşadakı erməni vandalları tərəfindən güllələnmiş və sonradan Ulu Öndər Heydər Əliyevin səyləri nəticəsində Bakıya gətirilmiş büstləri də artıq Şuşada yenidən əvvəlki yerlərinə qoyulub. Prezident İlham Əliyev çıxışlarının birində demişdi ki, ərazi bütövlüyümüz bərpa ediləndən sonra Bülbülün, Natəvanın, Üzeyir Hacıbəylinin büstləri yenə də Şuşada qoyulacaq. Dövlətimizin başçısının bu sözləri də artıq reallığa çevrilib.
Ümumiyyətlə Azərbaycanın Vətən müharibəsində əldə etdiyi möhtəşəm qələbə bütün Cənubi Qafqaz regionunda yeni reallıqlar yaratmış oldu. Bu reallıqlardan ən önəmlisi də budur ki, Azərbaycan xalqı artıq öz torpaqlarına qayıdıb və bu qayıdış əbədidir. Bu reallıqla barışmaq istəməyən, hələ də tarixin təkərini geri döndərmək kimi boş ümidlərindən əl çəkməyən ünsürlərə isə ən gözəl cavabı Azərbaycan Respublikasının Prezidenti cənab İlham Əliyev müqəddəs üçrəngli bayrağımızı qaldırdığı Şuşa şəhərində etdiyi çıxışlarında vermişdir: "Bu gün Dağlıq Qarabağda özünü siyasətçi adlandıran bəzi ünsürlər yenə də baş qaldırmağa çalışırlar. Unutmasınlar, bizim səbrimizlə oynamasınlar, 44 günlük müharibə onların yadından çıxmasın. Yoxsa ordu qurub torpaqları geri alacaq? Gəlin, alın. Gəlin bura, siz buradasınız, yaxındasınız. Gəlin alın, görüm necə alırsınız? İti qovan kimi qovmuşuq sizi, rədd etmişik, cəhənnəmə göndərmişik.” "Əgər kimsə revanş haqqında düşünürsə, o, bizim dəmir yumruğumuzu bir daha görəcək. Azərbaycanın dəmir yumruğu düşmənin belini qırıb, lazım olarsa, bir daha qırar.”
Möhtərəm Prezidentimizin dediyi kimi, Azərbaycan xalqı Şuşada bundan sonra əbədi yaşayacaq. Şuşa bizimdir! Qarabağ Azərbaycandır!

Səttar Möhbalıyev
Milli Məclisin deputatı,
Azərbaycan Həmkarlar İttifaqları Konfederasiyasının sədri

 
 


 

Türkiyənin milli hərbi sənayesi dünyanı heyrətə salan daha bir nailiyyətini nümayiş etdirib. İlk dəfə 2019-cu ildə İstanbulda keçirilən hərbi sənaye sərgisində nümayiş etdirilən, ASİSGUARD şirkəti tərəfindən işlənib hazırlanan, iriçaplı pulemyotla təchiz edilmiş "Songar” pulemyotçu-dronu zirehli avtomobilə inteqrasiya edilib. Beləliklə, dünyanın heç bir ölkəsində mövcud olmayan bu pulemyotçu dron xüsusi təyinatlı qüvvələrin silahlanmasına daxil edilib və həm ölkə içərisində, həm xaricdə aparılan əməliyyatlarda tətbiq olunacaq.

"Songar” kvadrokopter-dronu 45 kiloqrama qədər faydalı yük qaldıra bilir və  drona bərkidilmiş iriçaplı pulemyotla kameraları tərəfindən təsbit edilmiş yerüstü hədəflərə sərrast atəş açır. Bundan əlavə, pulemyotçu-dron hədəfə partlayıcı maddə ilə zərbə endirir.

Bu silahlı dron indi "Amazon” adlı zirehli avtomobilə inteqrasiya edilib. Türkiyənin milli hərbi sənayesinin istehsalı olan "Amazon” zirehli maşınlarının özü də pilotsuz idarə oluna bilir, avtonom olaraq sürücüsüz hərəkət edir və lazım olarsa uzaqdan komanda olunur. "Songar” silahlı dronu avtomobilin üstündə quraşdırılmış xüsusi platformada yerləşdirilib və beləliklə də, avtomobilə hərəkət marşrutu boyu hədəfləri əvvəlcədən aşkar edib zərərsizləşdirmək imkanı yaradıb.


Hərbi və təhlükəsizlik məqsədli hər cür əməliyyatlarda iştirak edə bilən, sutkanın istənilən vaxtında uçan "Songar” avtonom eniş-qalxış qabiliyyəti ilə asimmetrik təhdidlərə qarşı hazır vəziyyətdə avtomobilin üzərində gözləyəcək.

"Songar” 3 kilometrə yaxın uçuş radiosunda vəzifələrini icra edə bilir, yəni indiki halda pulemyotçu-dron "Amazon” zirehli maşını üzərindən qalxaraq 3 kilometr radiusda kəşfiyyat və döyüş əməliyyatlarını yerinə yetirə biləcək. Eyni zamanda "Songar” digər pilotsuz uçan aparatlarla qarşılıqlı əlaqədə də fəaliyyət göstərə bilir.


Qeyd edək ki, Türkiyə "Bayraktar TB2” döyüş pilotsuz təyyarəsi ilə artıq dünyanı təəcübləndirə bilib. Bu döyüş PUA-ları Türkiyənin Suriya və Liviyada həyata keçirdiyi hərbi əməliyyatların gedişatını dəyişdirib, qarşı tərəfi atəşkəsə məcbur edib. Habelə 44 günlük Vətən müharibəsi zamanı "Bayraktar TB2” Azərbaycan ordusunun Qarabağda zəfər qazanmasında mühüm rol oynayıb.

Türkiyə 2021-ci ildən etibarən daha yüksək taktiki-texniki göstəricilərə və döyüş qabiliyyətinə malik olan "Aksungur” və "Akıncı” pilotsuz kəşfiyyat-döyüş təyyarələrinin də seriya istehsalına başladığını elan edib. Heç bir şübhə yoxdur ki, Azərbaycan öz qalib ordusunu daha da müasirləşdirmək və onun döyüş qabiliyyətini daha da yüksəltmək üçün qardaş ölkənin milli hərbi sənayesinin bu ən son nailiyyətlərindən də yararlana biləcək.(Virtualaz.org)

 

 


 
 


 

"İşğal altındakı Azərbaycan torpaqlarının geri qaytarılması və azad edilməsini 30 il gözlədilər".

Bunu Ağdamda səfərdə olan Türkdilli dövlətlərin əməkdaşlıq şurasının baş katibi Bağdat Amreyev deyib.

"Bu, yalnız Azərbaycan xalqı üçün deyil, bütün türk ölkələri üçün çox böyük bir qələbədir. Həmin səbəbdən bütün qardaş türk xalqları qələbəni bu cür qəbul etdilər. Bu gün dağılmış Ağdamı ziyarət etdik. Aydın idi ki, bu şəhər öz sahiblərini gözləyir.

Ağdam əvvəllər firavan idi, əminəm ki, torpaqlar azad edildikdən sonra azərbaycanlılar bu yerlərin əvvəlki şöhrətini canlandıraraq buraya qayıdacaqlar. Bu gün burada olduğumuza və bütün bunları öz gözlərimizlə gördüyümüzə görə çox şadıq", - o deyib.

 
 


 

Nazirlər Kabineti yanında Operativ Qərargah məlumat yayıb.

NK-dan daxil olan məlumatda qeyd olunur ki, dünyada, ö cümlədən Azərbaycan ərazisində yeni növ koronavirus (COVID-19) xəstəliyi ilə bağlı mövcud sanitar-epidemioloji vəziyyət təhlil edilmiş, virusun yayılmasının və onun törədə biləcəyi fəsadların qarşısının alınması məqsədi ilə ölkə ərazisində xüsusi karantin rejiminin müddətinin 2021-ci il 1 aprel saat 06:00-dək uzadılmasına qərar verilmişdir.

Eyni zamanda bir sıra ölkələrdə və Azərbaycanda xəstəliyin yayılma dinamikasında müəyyən stabillik müşahidə olunduğundan sərtləşdirilmiş xüsusi karantin rejimi çərçivəsindəki məhdudiyyətlərin bir qisminin 2021-ci il 18 yanvar saat 00:00-dan yumşaldılması qərara alınmışdır.

Azərbaycan Respublikası Nazirlər Kabinetinin müvafiq qərarına əsasən, 2021-ci il 18 yanvar saat 00:00-dan etibarən:

● Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisində, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərində yaşayış yerini və olduğu yeri "SMS” icazə, "icaze.e-gov.az” portalı və xidməti vəsiqə əsasında tərk etmək sistemi ləğv olunur.

2021-ci il 25 yanvar saat 00:00-dan etibarən ölkə ərazisində aşağıdakı iş və xidmətlərin fəaliyyətinə icazə verilir:

● ticarət obyektlərinin fəaliyyəti (ictimai iaşə obyektləri, kafe, çay evləri və bu kimi məkanlarda müştərilərə yerində xidmət və iri ticarət mərkəzlərinin, "Mall”ların fəaliyyəti istisna olmaqla);

● bərbərxanaların, gözəllik salonlarının fəaliyyəti və kosmetik xidmətlər (o cümlədən, bu sahələrdə müştərinin evində və ya digər məkanda xidmət);

● muzey və sərgi zallarının fəaliyyəti;

● şəhərlərarası və rayonlararası hərəkət.

2021-ci il 1 fevral saat 00:00-dan etibarən ölkə ərazisində ictimai iaşə obyektləri, eləcə də restoran, kafe və çay evləri və bu kimi digər məkanlarda müştərilərə saat 06:00-dan 00:00-dək yerində xidmətlər bərpa olunur.

Fəaliyyətinə icazə verilən iş və xidmət sahələrində pandemiya dövrü ilə əlaqədar Azərbaycan Respublikası Nazirlər Kabinetinin müvafiq qərarları ilə müəyyən edilmiş məhdudiyyət və tələblərə ciddi riayət olunmalıdır.

2021-ci il 18 yanvar saat 00:00-dan 25 yanvar saat 00:00-dək Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisinə, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərinin ərazilərinə (kənd və qəsəbələr istisna olmaqla) giriş-çıxışa Azərbaycan Respublikası Nazirlər Kabinetinin müəyyən etdiyi qaydada müvafiq təşkilatların əməkdaşlarına xidməti vəsiqə, ezamiyyə vərəqəsi, diplomatik nümayəndəliklərin və beynəlxalq təşkilatların əməkdaşlarına isə müvafiq akkreditasiya kartları əsasında, habelə Nazirlər Kabinetinin qərarı ilə müəyyən edilən digər şəxslərin qeyd olunan ərazilərə giriş-çıxışına həmin şəxslər barəsində məlumatlar işəgötürən tərəfindən gücləndirilmiş elektron imzadan istifadə edilməklə "icazə.e-gov.az” portalına daxil edildikdən sonra ezamiyyə vərəqəsi əsasında icazə veriləcəkdir. Yaxın qohumunun dəfnində iştirakla əlaqədar Bakı, Sumqayıt, Gəncə, Mingəçevir, Şirvan şəhərləri və Abşeron rayonu, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzləri (kənd və qəsəbələr istisna olmaqla) arasında və onların hüdudlarından kənara hər bir şəxs Azərbaycan Respublikası Daxili İşlər Nazirliyinin Növbətçi Hissələri İdarəetmə Xidmətinin "102” Xidməti – Zəng Mərkəzi vasitəsilə alınmış icazə əsasında hərəkət edə bilər.

2021-ci il 18 yanvar saat 00:00-dan 25 yanvar saat 00:00-dək beynəlxalq və ölkədaxili uçuşlara müvafiq reys üçün bileti olan şəxslərin Bakı, Sumqayıt, Gəncə, Mingəçevir, Şirvan şəhərləri və Abşeron rayonu, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzləri (kənd və qəsəbələr istisna olmaqla) arasında və onların hüdudlarından kənara hərəkətinə onların biletləri əsasında, dövlət sərhədindən müvafiq qaydada ölkəyə daxil olan şəxslərin həmin ərazilərə gəlməsinə isə onların pasportuna vurulmuş ştamp əsasında icazə verilir.

Bakı metropolitenində sərnişindaşımanın fəaliyyətinə tətbiq olunan məhdudiyyət hazırda qüvvədə qalır.

Bütün ölkə ərazisində şənbə və bazar günləri ictimai nəqliyyatın fəaliyyətinə tətbiq olunan məhdudiyyət, eləcə də digər qadağalar isə xüsusi karantin rejiminin sonunadək tətbiq olunacaqdır.

Qeyd edək ki, xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburidir. Həmçinin sosial məsafə, tibbi maska və digər qoruyucu vasitələrdən ictifadə etmək zəruridir.

 
"Ölkə başçısı çox düzgün dedi ki, Allahın evinə donuz salanda bilmirdin ki, bu sənin burnundan gələcək"


 

"Şuşada Heydər Əliyev əlini İlham Əliyevin çiyninə qoyub dedi ki...”

"Rəhmət Heydər Əliyev Mərkəzi Komitədə işləyəndə Şuşaya gedirdi. Bir dəfə yay aylarında Şuşada zona müşavirəsi keçirilirdi və mən də həmin qrupdaydım. Onda möhtərəm prezident İlham Əliyev də ordaydı, səhv etmirəmə o zaman universitetdə oxuyurdu”

Bunu Moderator.az-a açıqlamasında Xalq şairi Vahid Əziz deyib. Xalq şairi ölkə başçısının Şuşa səfərindən qürurlandığını bildirib:

"Ölkə başçımızın digər rayonlarımızdan sonra qışın soyuğunda, qarda Şuşaya getməsi bizi qürurlandırır. Vətənpərvərlik budur. Rəhmət Heydər Əliyev Mərkəzi Komitədə işləyəndə Şuşaya gedirdi. Bir dəfə yay aylarında Şuşada zona müşavirəsi keçirilirdi və mən də həmin qrupdaydım. Onda möhtərəm prezident İlham Əliyev də ordaydı, səhv etmirəmə o zaman universitetdə oxuyurdu. Heydər Əliyev M.P.Vaqifin məqbərəsinin yanında əlini İlham Əliyevin çiyninə qoyub nəsə deyirdi. Bununla bağlı mənim də belə bir şeirim var idi, dedim ki, elə o vaxt Heydər Əliyev İlham Əliyevə deyib ki, sən Şuşanı qorusan, elə bil ki, Azərbaycanı qoruyursan. Mən indi qürur duyuram. Rəhmətlik Heydər Əliyevdən sonra Şuşaya hansı Mərkəzi Komitənin və ya ölkənin rəbəri gedib? Heç biri getməyib. Hətta Mərkəzi Komitənin vaxtında işləyəndə onda Qarabağ Təşkilat Komitəsinin üzvüydüm və heç komitənin üzvü olanlar da Qarabağa getmədi. Amma indi Qarabağ haqqında kitablar yazırlar. Əgər dövlət başçısı bu qışın soyuğunda ailəsiylə birlikdə Şuşaya gedirsə, bu o deməkdir ki, hər kəs ora getməlidir. Ölkə başçısının Şuşaya gedəndə yolda paylaşım etməsi o deməkdir ki, erməni səni iti qovan kimi qovdum, Şuşa mənimdir, indi də ora gedirəm və əgər hünərin varsa, çıx qarşıma. Biz təmiz xalqıq və ona görə Allah bizi qoruyur. Bizim millətimiz heç vaxt erməni kilsəsinə heyvan salmaz. Çünki bizim ağlımız, ləyaqətimiz var. Ölkə başçısı çox düzgün vurğuladı və dedi ki, Allahın evinə donuz salanda bilmirdin ki, bu sənin burnundan gələcək. Ermənilərin çoxallahlılıq dövründə Allahları "Anaik” olub, bu da fahişəlik ilahəsidir və onun da heykəlini qoyublar”. 

 
 


 

"Ankara Bayden dönəminə hazırlaşır. Ümid edirəm ki, Tramp dönəmindən qalan PKK/PYD kimi problemlər Bayden dönəmində həllini tapar”.

APA-nın yerli bürosunun xəbərinə görə, bunu Türkiyənin xarici işlər naziri Mövlud Çavuşoğlu Pakistandan qayıdan zaman jurnalistlərin suallarını cavablandırarkən deyib.

M. Cavuşoğlu ABŞ-ın yeni Prezidenti Co Bayden dövründə Türkiyə-ABŞ münasibətlərinin müsbət istiqamətə yön alması üçün yol xəritəsinin hazırlandığını bildirib: "Biz qərəzli deyilik, amma həqiqətlər nədir, onlardan da xəbərdarıq. ABŞ-la əlaqələrimizə ən pis təsir edən məsələ terror təşkilatı PKK/YPG-yə verilən dəstəkdir. Onların da S-400-lə bağlı bizimlə problemi var. Prezident Tramp vəzifəsindən getmədən öncə sanksiya qərarı verdi. Baxacağıq görək proses necə davam edəcək. "İşçi qrupu yaradıb, NATO ilə işləyək” təklifimizi də yeniləməyi nəzərdə tuturuq”.

XİN başçısı qeyd edib ki, Co Bayden vəzifəsinin icrasına başladıqdan sonra Türkiyə Prezidenti zəng edərək amerikalı həmkarını təbrik edəcək.

Musa Urud: "Bu, həm də qədim mədəniyyət mərkəzimizə qayıdışımızın fərəhli başlanğıcıdır”

 


 

Xəbər verdiyimiz kimi, prezident İlham Əliyev və I vitse-prezident Mehriban Əliyeva Şuşa şəhərinə səfər edib. Səfər əsnasında daha Üzeyir Hacıbəyovun, Bülbülün, Xurşidbanu Natəvanın "güllələnmiş heykəlləri” də Şuşaya gətirilib, öz əzəli məkanında yerləşdirilib. Şuşadakı tarixi binaları ziyarət edən ölkə başçısı, Şuşanın və bütövlükdə Qarabağın gələcəyi ilə bağlı mühüm mesajlar səsləndirib.

 

Moderator.az-a açıqlamasında ölkə başçısının Şuşa səfərini şərh edən millət vəkili Musa Urud, bu səfərin mühüm əhəmiyyətə malik olduğunu vurğulayıb:

 

"Bu gün Azərbaycan Respublikasının prezidenti, o cümlədən I vitse-prezident Şuşanı ziyarət etdi. Cənab prezident səfər əsnasında bizim qədim mədəniyyət mərkəzimizdə müqəddəs yerlərə - Şuşa məscidinə, Vaqifin məqbərəsinə, Bülbülün ev muzeyinin qalıqları olan həyətə baş çəkdi. Cənab prezident həmçinin, Cıdır düzünə getdi, xalqa müraciət ünvanladı.

Ölkə başçısının Şuşa səfəri, məlum səfər əsnasında "güllələnmiş heykəllər”in Şuşaya qaytarılması tarixi ədalətin bərpası demək idi. Cənab prezidentin söylədiyi kimi, biz artıq Şuşaya qayıtdıq və Şuşanı dünyanın ən gözəl şəhərlərindən birinə çevirəcəyik. Ermənilər tərəfindən güllələnmiş heykəllərin - sadəcə Azərbaycan mədəniyyətinə deyil, ümumilikdə dünya mədəniyyətinə böyük töhfələr verən Üzeyir bəyin, Bülbülün büstlərinin Şuşaya qaytarılması çox böyük tarixi-mədəni bir hadisədir.

 

Cənab prezident Şuşadan bütün dünyaya bəyan etdi ki, biz Şuşanı dirçəldəcəyik, onu bərpa edəcəyik. Onu dünyanın incisinə çevirəcəyik.

 

Bu səfərin həm böyük tarixi, həm siyasi, həm də mənəvi əhəmiyyəti var. Biz Şuşaya artıq həsrətlə baxmırıq. Ölkə başçısı bildirdi ki, biz Şuşaya daha rahat gedib-gələcəyik.

Cənab prezidentin gecəni Şuşada qalmasının da böyük rəmzi mənası var. Azərbaycanın Ali Baş Komandanının, Azərbaycan xalqının liderinin Şuşada qalması, səhər günəşi məhz Şuşadan salamlaması tariximizə, mədəniyyətimizə, Şuşa uğrunda döyüşlərdə şəhid olan qəhrəmanlarımıza olan sevgi və ehtiramın təzahürüdür.

 

Cənab prezident Şuşada ciddi siyasi əhəmiyyət daşıyan mesajlar da verdi, yaxın tarixdəki bir sıra olaylara diqqət çəkdi. Müstəqilliyimizin ilk illərində AXC-Müsavat cütlüyünün yarıtmaz fəaliyyəti, Şuşa kimi gözəl bir şəhərin yaramaz insanlar tərəfindən ermənilərə təslim edilməsi acı bir tarixdir. Bu tarixi gərək heç vaxt unutmayaq.

Cənab prezidentin səsləndirdiyi fikirlərdən biri də bu oldu ki, lideri güclü olan xalq həmşə qalib xalqdır. Lideri öz xalqına güvənən xalq hər zaman qalibdir. Xalqda nə qədər birlik, həmrəylik olarsa, xalq bir o qədər yenilməz olar. Ölkə başçısı vurğuladı ki, "dəmir yumruq” həm birliyimizin, həm də gücümüzün rəmzidir.

 

Bir sözlə, ölkə başçısının Şuşa səfəri bizim qədim mədəniyyət mərkəzimizə qayıdışımızın fərəhli başlanğıcıdır”.


 
AHİK 20 Yanvar şəhidlərinin ailələrinə maddi yardımlar göndərdi




1990-cı ilin 20 yanvarında törədilmiş qanlı hadisələrdən 31 il keçsə də, Azərbaycan xalqı öz fədakar oğul və qızlarını heç zaman unutmur.

Həmin tarixdə keçmiş SSRİ rəhbərliyinin göstərişi ilə sovet ordusu respublikamızın paytaxtına daxil olaraq dinc əhaliyə divan tutmuş, müstəqillik uğrunda mübarizəyə qalxan, vətəni yadların tapdağından qurtarmağa çalışan yüzlərlə həmvətənlərimiz vəhşicəsinə qətlə yetirilmişdi. Xalqımız 20 Yanvar şəhidlərinin xatirəsini həmişə əziz tutur. Onların xatirəsi həmkarlar ittifaqları təşkilatları tərəfindən də hər il yad edilir.

Azərbaycan Həmkarlar İttifaqları Konfederasiyası hər il olduğu kimi, 15 yanvar 2021-ci il tarixdə İcraiyyə Komitəsinin 13.01.2021-ci il tarixli qərarına əsasən 20 yanvar şəhidlərinin ailələrinin (102 ailə) hər birinə 200 (iki yüz) manat məbləğində, ümumilikdə 20400 (iyirmi min dörd yüz) manat yardımı poçt vasitəsilə ünvanlarına göndərmişdir.

Eyni zamanda AHİK-in üzv təşkilatları tərəfindən şəhid ailələrinə yardım göstərilməsi, pulsuz yollayışlarla təmin olunması, onlarla görüşlərin və digər tədbirlərin keçirilməsi nəzərdə tutulmuşdur.

 
Ermənistan rəhbərliyi yaranmış reallığı adekvat qiymətləndirə bilmir




Bu il yanvarın 11-də Rusiya Prezidenti Vladimir Putin, Azərbaycan Prezidenti İlham Əliyev və Ermənistanın Baş naziri Nikol Paşinyan arasında Moskvada keçirilən üçtərəfli görüşdə birgə Bəyanatın imzalanması Azərbaycanın növbəti diplomatik qələbəsi kimi qiymətləndirilməlidir. 2020-ci il 10 noyabr üçtərəfli bəyanatının videoformat şəklində imzalandığını və bununla bağlı təmasların telefon danışıqları ilə baş tutduğunu nəzərə alsaq, bu, Vətən Müharibəsində Azərbaycanın tarixi zəfəri və Ermənistanın hərbi kapitulyasiyasından sonra üç ölkə liderinin ilk birbaşa danışıqları idi.

Məlum olduğu kimi, görüşün məqsədi Dağlıq Qarabağa dair imzalanmış üçtərəfli bəyanatın reallaşdırılmasının gedişini, mövcud problemlərin aradan qaldırılmasına və regionda dinc həyatın qaydaya salınmasına dair sonrakı addımları birlikdə müzakirə etmək idi.

Görüşün gündəliyi əvvəlcədən təxmin edilsə də, Ermənistanda, eləcə də təəssüf ki, Azərbaycanda bəzi qüvvələr bu tədbirin keçirilməsi faktından öz məqsədləri üçün manipulyasiya etməyə çalışırdılar. Erməni tərəfi görüşün N.Paşinyan üçün ölüm-dirim xarakteri daşıdığını daim vurğulayır və onun Moskvadan əliboş qayıdacağının fəlakət olacağı fikirlərini daim ictimailəşdirərək danışıqlar prosesinə təsir göstərməyə çalışırdı.

Azərbaycanda isə radikal müxalifət bu görüşün ölkəmizin guya güzəştlərə məcbur ediləcəyi barədə "dərin mənalı” öncəgörmələr tirajlayırdı.

Nəticə göz qabağındadır. Dörd saata yaxın davam edən görüşün təfərrüatı tam açıqlanmasa da, bu görüş nəticəsində imzalanmış sənəd – üçtərəfli bəyanat ortadadır. Bəyanat, gözlədiyimiz kimi, tam olaraq 10 noyabr Bəyanaməsinin 9-cu maddəsinin icrasına, regionda iqtisadi və nəqliyyat əlaqələrinin bərpasına və bütün bu işlərin həyata keçirilməsi üçün işlək mexanizmin yaradılmasına xidmət edir.

Başqa sözlə, söhbət Naxçıvanla Azərbaycanın digər ərazilərini birləşdirəcək Zəngəzur dəhlizindən gedir. Əslində, Paşinyan həm 10 noyabr, həm də 11 yanvar sənədlərinə imza atmaqla sübut elədi ki, Ermənistanın yaranmış şəraitdə heç bir alternativ çıxış yolu qalmamışdır. Elementar məntiq qanunları da göstərir ki, hərbi, iqtisadi və xüsusilə psixoloji durumu bərbad vəziyyətdə olan Ermənistanın bu gün yeganə çıxış yolu qonşu ölkələrlə və ilk növbədə Azərbaycanla normal münasibətlər qurmaqdır.

Azərbaycan bu görüşdən nə qazandı? Tərəflər 10 noyabr bəyanatının regiondakı bütün iqtisadi və nəqliyyat kommunikasiyalarının açılmasını nəzərdə tutan 9-cu bəndinin həyata keçirilməsinə dair üçtərəfli işçi qrupun yaradılması barədə razılıq əldə ediblər.

Əldə edilmiş razılaşmaya əsasən, Azərbaycan, Ermənistan və Rusiyanın baş nazir müavinlərinin rəhbərlik edəcəyi işçi qrup yanvarın 30-dək ilk iclasını keçirəcək, fəaliyyət istiqamətləri üzrə ekspert alt qrupları yaradacaqlar. Dövlət orqanlarının səlahiyyətli nümayəndələrindən təyin olunacaq ekspert alt qrupları bir ay ərzində layihələri, eləcə də onların icrası üçün lazımi resurs və tədbirlərin siyahılarını təqdim edəcəklər.

İmzalanan bəyanatdan da göründüyü kimi, görüş Azərbaycanın maraqları çərçivəsindən kənara çıxmayıb. Azərbaycan hərb meydanında olduğu kimi, diplomatik arenada da, müzakirələrdə də üstün mövqedədir və bu qalibiyyəti güzəştə getmək niyyəti yoxdur.

Bu qənaəti Azərbaycan Respublikasının Prezidenti İlham Əliyev həm üçtərəfli görüş zamanı və həm də görüşün yekunlarına dair fikir bildirərkən xüsusi şəkildə vurğuladı. Dövlətimizin başçısı bəyan etdi ki, kommunikasiyaların bərpası Azərbaycan, Ermənistan, Rusiya və digər region dövlətlərinin maraqlarına cavab verir və bu proses regionun inkişafında dinamizm yaratmaqla bərabər, həm də etibarlı təhlükəsizliyə xidmət edəcəkdir. Prezidentimiz xüsusi olaraq qeyd etdi ki,

Dağlıq Qarabağ konflikti keçmişdə qalıb və indi gələcək haqqında düşünmək lazımdır.

Prezident İlham Əliyev bu görüşə yüksək qiymət verərək bildirdi ki, regionun bundan sonrakı davamlı və təhlükəsiz inkişafını təmin etmək üçün görüş çox vacib idi. Qonşu ölkələr də regionda nəqliyyat dəhlizlərinin və nəqliyyat arteriyalarının şaxələndirilmiş şəbəkəsinin yaradılmasına fəal qoşulacaqlar. ”Biz nəticə əldə etmək, sentyabrda - noyabrda baş vermiş hadisələrə yekun vurmaq əzmindəyik”.

Tam inamla demək olar ki, Azərbaycan tərəfi qapalı görüşdə istədiyinə nail olmuşdur və əldə edilən razılıq birmənalı şəkildə onun mənafeyinə uyğundur. Ortaq bəyanatın mətni – humanitar və kommunikasiya məsələləri ilə bağlı üçtərəfli işçi qrupunun yaradılması da bunu təsdiqləyir: Bakının şərtləri qəbul edilməsəydi, şübhəsiz ki, üçtərəfli əməkdaşlıq formatı da olmayacaqdı.

Azərbaycan tərəfinin görüşdən əvvəl irəli sürdüyü və yeni bəyanatla təsbit olunmuş tələbləri birmənalı şəkildə regional sabitliyin və təhlükəsizliyin möhkəmlənməsinə xidmət edir. Bu, faktiki olaraq "Mehri dəhlizinin” - Naxçıvana, daha sonra Türkiyəyə dəmir yolunun açılması üzrə işlərin başlanılması deməkdir.

Yeni açılacaq kommunikasiya xətləri "Şərq-Qərb” nəqliyyat dəhlizinin tərkib hissəi olacaqdır.

Azərbaycanın öz eksklavı olan Naxçıvan Muxtar Respublikası ilə, Tükiyə ilə, eləcə də bütün dünya ilə iqtisadi, nəqliyyat-logistik əlaqələri genişlənəcək, ölkəmizin geoiqtsadi əhəmiyyəti durmadan artacaqdır.

Prezident açılacaq kommunikasiya xətlərinin region ölkələrinin hamısı üçün əhəmiyyətini vurğulamaqla irəli sürdüyü altıtərəfli əməkdaşlıq formatı təklifinin də qüvvədə olduğunu bir daha xatırlatmış oldu.

Növbəti dəfə fiaskoya uğrayacağını hiss edən Paşinyan hökuməti isə erməni cəmiyyətində itmiş nüfuzunu bərpa etmək üçün Moskva danışıqlarında maksimum nəticə əldə etmək, bu, mümkün olmadıqda danışıqları pozmaq istəyirdi.

Erməni diplomatiyası Minsk qrupu formatında danışıqların bərpasında maraqlıdır, lakin heç bir ölkə, hətta Fransa belə bu məsələdə onu dəstəkləməyə cəsarət etmir. Ona görə də bu məsələyə haqlı olaraq əhəmiyyət və fikir belə verilmədi.

Paşinyan administrasiyası məntiqsiz bir şəkildə kommunikasiya xətləri ilə bağlı Azərbaycanın təşəbbüsünün qarşısını almağa can atır, bunun əvəzində 10 noyabrdan sonra ələ keçirilmiş erməni diversantlarının-terrorçularının azad olunması məsələsini qabardırdı.

Lakin bu cəhdlər də heç bir səmərə vermədi, Azərbaycan diplomatik danışıqlarda da bir daha üstünlük qazandı, danışıqların məcrasını öz istədiyi istiqamətə yönəltdi. Azərbaycan hərb meydanında qazandığı zəfəri diplomatik masada, danışıqlar prosesində davam etdirir.

Qeyd etdiyimiz kimi, Paşinyanın iddiaları fonunda Moskva görüşünü Ermənistan üçün növbəti fiasko saymaq olar. O, mətbuata açıqlamasında erməni diversantlarını-terrorçularını azad etmək mümkün olmadığından görüşün nəticələrindən məyus olduğunu gizlətməyib. Qarabağ problemi hərbi yolla həllini tapdıqdan sonra artıq rollar dəyişib - Ermənistan özü üçün uğursuz və nəticəsiz danışıqlarda iştirak etməyə məcburdur.

Ermənistanın hərbi-siyasi rəhbərliyi bilməlidir ki, bu gün yeganə çıxış yolu qonşu ölkələrlə və ilk növbədə Azərbaycanla normal münasibətlər qurmaqdır.

Lakin bu üçtərəfli görüşün sonunda dövlət başçılarının keçirdiyi mətbuat konfransında Paşinyan dövlət başçısına yaraşmayan çıxışı ilə göstərdi ki, sanki o, yaranmış reallığı axıra qədər adekvat qiymətləndirə bilmir. Belə ki, həmin mətbuat konfransında həm Rusiya prezidentinin, həm də cənab İlham Əliyevin yüksək siyasi etika və diplomatik mədəniyyət nümayiş etdirərək görüşün gedişi haqqında verdikləri ümumi məlumata baxmayaraq, Paşinyan yenə də keçmiş Dağlıq Qarabağın "statusundan”, guya hərbi əsir olan erməni terrorçularının azad olunması məsələsindən danışdı, özünü gülünc vəziyyətdə qoydu və Ermənistana qayıtdıqdan sonra isə etiraf etdi ki, hər iki məsələdə onun dediklərinə əhəmiyyət verən olmayıb.

Vacib bir məqamı qeyd etmək istərdim. Özünün ermənipərəst mövqeyinə baxmayaraq, rus mediası Azərbaycan tərəfinin öz milli maraqlarını sonacan müdafiə etdiyini, 10 noyabr razılaşmasının ruhuna zidd heç bir şərti qəbul etmədiyini təsdiqlədi. Hətta bəzi media strukturları bu görüşdən yalnız Azərbaycanın maksimum səmərə ilə ayrıldığını xüsusi qeyd etdilər...

Kamaləddin QAFAROV,
Azərbaycan Respublikası Milli Məclisinin deputatı


 
 


 

"Birgə bəyanat Minsk prosesi çərçivəsində illər ərzində hazırlanan fikir və prinsipləri böyük ölçüdə ehtiva edir. Lazım olsa ATƏT-in Minsk Qrupu yenə də rol oynaya bilər”.

APA-nın "Anadolu” agentliyinə istinadən verdiyi xəbərə görə, bunu Türkiyənin xarici işlər naziri Mövlud Çavuşoğlu "Kürəsəl Media” jurnalına müsahibəsində Dağlıq Qarabağla bağlı suala cavabında deyib.

O qeyd edib ki, həmsədrlər konstruktiv olmalı və keçmişdə baş verənlərdən dərs almalıdırlar.
Axtarış
Xəbər lenti
Reklam