Bir neçə gün əvvəl Ağstafa rayonunun Saloğlu qəsəbəsində baş vermiş dava zamanı xəsarət alan Müdafiə Nazirliyinin N saylı hərbi hissəsinin müddətdən artıq hərbi qulluqçusu əsgər Əlizadə Orxan İlham oğlu vəfat edib.

Publika.az "Qafqazinfo”ya istinadən xəbər verir ki, başından aldığı ağır xəsarətlərlə tibb müəssisəsinə yerləşdirilən hərbçi ötən gün dünyasını dəyişib.

Qeyd edək ki, hadisə O.Əlizadənin dostunun sürdüyü avtomobillə Saloğlu qəsəbə sakini Bukavadze Baloğlan Abdul oğlunun idarə etdiyi maşının bir-birinə yol verməməsi səbəbindən baş verib. Belə ki, yolun ensiz olması səbəbindən Ağstafa rayon Düzqışlaq kənd sakini Şamxal Həmidov Baloğlan Bukavadze ilə mübahisə edib. Mübahisə zəminində B.Bukavadze Şamxalın avtomobilində sərnişin olan və mübahisəyə müdaxilə edən Orxana zərbə endirib. O.Əlizadə yerə yıxılarkən başı qaz borusuna dəyib.

Faktla bağlı cinayət işi açılıb, araşdırmalar davam etdirilir.

İstehlak bazarında meyvə-tərəvəz bolluğu var, amma qiymətləri yüksəkdir.

Publika.az Xezerxeber.az-a istinadən xəbər verir ki, bahaçılıq bazarda alıcılıq qabiliyyətinin aşağı olmasına səbəb olub.

Alıcılar qiymətlərdən, satıcılar isə müştəri azlığından şikayət edirlər.

Məsələn, bazarda lobya 3 manat 50 qəpik, pomidor 3 manat, şaftalı 4 manat, gavalı isə 3 manatdır.

Satıcılar deyirlər ki, hazırda rekord bahalaşma lobyada müşahidə edilir. Bunun isə bir neçə səbəbi var.

Satıcılar qiymətlərin növbəti həftələrdə ucuzlaşa biləcəyini bildirirlər.

Ətraflı süjetdə:

Statistikaya əsasən, son 1 ildə ərzaq məhsulları 30%-dək bahalaşıb.

Qiymət artımı daha çox mal əti, duru yağlar və uşaq qidalarında müşahidə olunub. Müqayisə üçün qeyd edək ki, ötən illə müayisədə bu ilin iyulunda əhali mal ətində 2-3 manata qədər artıq pul xərcləməli olub.

Publika.az xəbər verir ki, sözügedən bahalaşmanın səbəbləri ilə bağlı iqtisadçı-ekspert Natiq Cəfərli Referans.az-a danışıb.

"Qiymətində artım müşahidə olunan məhsulların demək olar ki, əksəriyyəti Azərbaycanda istehsal olunmur. Hətta yerli brend kimi bazarda təqdim edilən duru yağlar ölkədə sadəcə qablaşdırılır. Dünyada baş verən proseslər, Rusiya-Ukrayna münqaişəsi qiymət artımına birbaşa formada təsir göstərir. Xüsusilə Azərbaycanın duru yağlarla bağlı əsas idxalının Ukraynadan olduğunu nəzərə alsaq, biz bunu daha dəqiq əsaslandıra bilərik. Uşaq qidalarına gəldikdə isə, bu növ məhsullar hətta Azərbaycanda qablaşdırılmır və birbaşa xaricdən gətirilir və qiymət dəyişikləri ölkəmizdə də özünü biruzə verir. Məhz uşaq qidaları ilə bağlı dəfələrlə təkliflərimiz olub ki, bu qidalar sosialyönümlü məhsuldur və dünyanın bir çox ölkələrində uşaq qidalarına, geyimlərinə, aksesuarlarına vergi və gömrük güzəştləri tətbiq olunur. Azərbaycanda isə təəssüf ki, bu qayda yoxdur. Əksinə, həm gömrük rüsumu, həm də əlavə dəyər vergisinin tətbiq olunması qiymətlərin daha da artmasına səbəb olan faktorlardan biridir. Ona görə də təklif olunub ki, heç olmasa satışda əlavə dəyər vergisinin 18 faizdən heç olmasa 2 faizə salınmalıdır. Bu növ qidalarda qiymətlərin yüksək olması yeni formalaşan gənc ailələrin büdcəsinə çox pis təsir göstərir. Ona görə bütün sosialyönümlü məhsullarla bağlı gömrükdə və vergidə yeni yanaşmaya ehtiyac var".

Ekspert mal və qoyun ətində olan bahalaşmanın isə örüş sahələrinin azalması və yem qiymətlərinin artımı ilə bağlı olduğunu qeyd edib.

"Əslində ət qiymətlərinin bahalaşması gözlənilən idi, çünki 2015-2016-cı illərdən bəri ölkədə örüş yerləri və yem bazası ilə bağlı ciddi problemlər yaşandı. Texniki bitkilərin əkin sahəsinin kəskin şəkildə artırılması örüş yerlərinin azalmasına və yem bazasına olduqca mənfi təsir göstərdi. Azərbaycanda mal-qara yeminin qiyməti son 6-7 ildə 2 dəfədən çox artıb. Bəzi növlər üzrə hətta 3 dəfə artım müşahidə olunur. Təbii ki, yemin qiyməti artdıqca, ətin qiymətinə təsir göstərir. Digər səbəb isə odur ki, fermerlər və mal-qara saxlayanlar başqa sahələrdə qiymət artımını gördükdən sonra öz ehtiyaclarını ödəmək üçün məhsullarının qiymətini də artırmaq məcburiyyətində qalırlar. Ölkədə 2021-ci ildən bəri ikirəqəmli infikiyasiya müşahidə olunur və bu da ətin qiymətinin artmasına sövq edir. Bütün bu amilləri nəzərə alsaq, təbii ki, mal və qoyun ətinin artması heç də gözlənilməz deyil".

Sosial şəbəkələrdə ucuz qiymətə məktəbli formalarının satışı ilə bağlı məlumatlar yayılıb.

Bu məlumat cəmiyyət arasında birmənalı qarşılanmayıb.

Bəzi şəxslər ucuz məktəbli formalarının daha keyfiyyətsiz olduğunu irəli sürüblər.

Dərzinin sözlərinə görə, ucuz qiymətə satılan məktəb formaları Çin məhsuludur və keyfiyyəti nisbətən daha aşağıdır.

Ətraflı Baku TV-nin süjetində:

Avqust ayında Kliniki Tibbi Mərkəzə zəhərlənmə ilə bağlı 703 nəfər müraciət edib.

Mərkəzin Mətbuat Xidmətindən verilən məlumata görə, onlardan 162 nəfər Toksikologiya şöbəsinə qəbul edilib, digərlərinə isə ilkin tibbi yardım göstərilərək evə buraxılıblar.

Qəbul olunan xəstələrdən 83-ü dərmandan, 37-si sirkə turşusundan, 17-si etanoldan, 2-si dəm qazından biri anaflaksiyadan zəhərlənib. Digərlərindən 4-ü allergik reaksiyadan, biri isə botulizm səbəbindən xəstəxanaya yerləşdirilib.

Həmçinin onlardan 16 nəfəri ilan, birini isə həşərat sancıb.

Həkimlərin səylərinə baxmayaraq, zəhərlənən şəxslərdən 7-si dünyasını dəyişib. Onlardan 6-sı kişi, biri qadın olub. Ölüm halının 6-sı sirkə turşusundan, biri isə dərman zəhərlənməsindən baş verib.

Sentyabrda Yer kürəsini maqnit qasırğaları bürüyəcək.

Bu barədə ABŞ Milli Okeanoqrafiya və Atmosfer Agentliyinin Kosmik Hava Proqnozları Mərkəzi məlumat yayıb.

Məlumata görə, geomaqnit sahəsinin ən yaxın pozulması artıq 6-8 sentyabrda gözlənilir.

Ay ərzində daha üç maqnit qasırğası dalğası müşahidə olunacaq.

"Geomaqnit sahəsinin növbəti daha aktiv həyəcanını sentyabrın 14-də gözləmək lazımdır. Sonrakı günlərdə, yəni sentyabrın 15-dən 17-dək də maqnit qasırğaları mümkündür, lakin daha az intensivlikdə”, - məlumatda deyilir.

Eyni zamanda, bu ayın son maqnit qasırğası sentyabrın 23-də proqnozlaşdırılır.

Kornel Universitetinin tədqiqatçıları müəyyən ediblər ki, xroniki yorğunluq sindromunun səbəbi virus ola bilər.

Xroniki yorğunluq sindromu uzun müddətli yorğunluq və digər təzahürlərlə xarakterizə olunan patoloji vəziyyətdir. Xəstəliyin əlamətləri şiddətli ola və insana normal gündəlik fəaliyyətlərini həyata keçirməkdə əngəl törədə bilər. Üstəlik, belə yorğunluq istirahətdən sonra da davam edir.

Belə vəziyyət aylarla, illərlə uzana, simptomlar bir müddət yox ola, lakin yenidən qayıda bilər.

Mütəxəssislər qeyd ediblər ki, sindrom tez-tez virus infeksiyalarından sonra baş qaldırır. Onların fərziyyələrinə görə, RNT virusları qrupu olan enteroviruslar bu xəstəliyi təhrik edir. Epşteyn-Barr virusu və digər herpes virusları ən çox yayılmış viruslar arasındadır. Bununla belə, mitoxondriya, aşağı tiroid hormon səviyyələri və çoxsaylı genetik variantlar da daxil olmaqla digər mümkün mexanizmlər də nəzərə alınmalıdır.

Gələcək işlərdə müəlliflər təklif olunan fərziyyəni sınaqdan keçirməyi planlaşdırırlar. Bu, sindromun müalicəsini yaratmağa kömək edəcək.

Bərdə şəhərində yerləşən Qarabağ Regional DOST Mərkəzində vətəndaşlara xidmət göstərilməsinə başlanılıb.

Bu barədə Publika.az-a Əmək və Əhalinin Sosial Müdafiəsi Nazirliyinindən (ƏƏSMN) məlumat verilib.

Bildirilib ki, vətəndaşlar həftənin 5 günü saat 9:00-dan 18:00-dək mərkəzin xidmətlərindən yararlana bilərlər.

Qarabağ Regional DOST Mərkəzində məşğulluq, əmək, əlillik və sosial müdafiə sahələrində "bir pəncərə” prinsipi ilə 15 istiqamət üzrə 159 xidmət göstərilir. Bu gün ərzində Qarabağ Regional DOST Mərkəzində 208 nəfər vətəndaşa xidmət göstərilib.

Prezident İlham Əliyevin iştirakı ilə bu günlərdə açılışı olan Mərkəzin dördmərtəbəli binası ən yüksək tələblərə cavab verir. Burada 123 işçi çalışır, "Könüllü DOST” proqramı üzrə 50 könüllü fəaliyyət göstərir. Mərkəzdə gün ərzində orta hesabla 650-700 vətəndaşın qəbulu nəzərdə tutulur.

Qarabağ Regional DOST Mərkəzinin əhatə dairəsinə 9 inzibati rayon daxildir. Burada ümumilikdə 900 mindən çox əhaliyə xidmət göstəriləcək. Onlardan 170 mini bilavasitə sosial müdafiəyə cəlb olunan şəxslərdir.