Rusiya hərbçiləri Ukraynanın Donetsk vilayətinin Pokrovsk şəhərinin mərkəzində yaşayış binalarına iki raket zərbəsi endiriblər.

Publika.az xəbər verir ki,bu barədə vilayət administrasiyasının rəhbəri Pavel Kirilenko bildirib.

Onun sözlərinə görə, zərbələr bir neçə dəqiqəlik fasilələrlə endirilib. Hücum nəticəsində doqquz və beşmərtəbəli binalara, həmçinin digər yaşayış evlərinə, hotelə, mağazalara və inzibati binalara ziyan dəyib.

Ukrayna Prezident Aparatının rəhbəri Andrey Yermak iki nəfərin həlak olduğunu bildirib. Onun sözlərinə görə, daha dörd yaralı təcili yardım maşını ilə xəstəxanaya aparılıb.

"Rusiya terrorunu dayandırmaq lazımdır. Ukraynanın azadlığı uğrunda mübarizə aparan hər kəs insanların həyatını xilas edir. Dünyada bizimlə birlikdə Ukraynaya kömək edən hər kəs terrorçuları məğlub edəcək. Rusiya bu dəhşətli müharibədə etdiyi hər şeyə görə cavabdeh olacaq”, - Ukrayna Prezidenti Volodimir Zelenski sosial şəbəkədə hadisəni şərh edərək yazıb.

"Hazırda Bakıya bizimlə valideynləri cəbhədə olan və həlak olmuş hərbçilərinin uşaqları gəliblər”.

Oxu.Az-ın məlumatına görə, bunu uşaqlarla Bakıya gələn Ukrayna nümayəndəsi Olya Melnik jurnalistlərə açıqlamasında bildirib.

Onun sözlərinə görə, Kiyevdən Bakıya 30 uşaq gəlib:

"İki həftə ərzində onları zəngin istirahət proqramı, ölkə ilə tanışlıq, maraqlı ekskursiyalar və psixoloji reabilitasiya gözləyir”.

O qeyd edib ki, eyni zamanda, gələnlər arasında ailəsi əsirlikdə olan və itkin düşən uşaqlar da var. Həmin uşaqlar Azərbaycanda reabilitasiya keçəcəklər:

"Kiyev vilayəti elə bir bölgədir ki, çox atəşə tutulur və bundan uşaqlar əziyyət çəkir. Uşaqlarımıza dincəlmək və ölkəmizdə baş verən olaylardan uzaqlaşmaq imkanı verən bütün təşkilatçılara çox minnətdaram. Çünki bunlar artıq valideynlərini itirmiş və ya hər an itirmək stresi ilə yaşayan uşaqlardır. Əziz dostlar, dəstəyə görə çox sağ olun”.

Rusiyanın Ukraynada başlatdığı müharibə öz ərazisinə keçməyə başlayır. Bu təbii və qaçılmaz bir prosesdir.

Bunu Ukrayna Prezident Volodimir Zelenski öz videomüraciətində deyib.

Dövlət başçısı bəyan edib ki, Ukraynadakı döyüş meydanında Rusiyanın təcavüzü iflasa uğrayıb.

"Bu gün 522-ci gündür ki, Rusiya rəhbərliyinin bir-iki həftəyə sona çatacağına ümid etdiyi "xüsusi hərbi əməliyyat” adlanan əməliyyatı davam edir. Ukrayna güclənir. Tədricən müharibə yenidən Rusiya ərazisinə qayıdır. Bu, qaçılmaz, təbii və tamamilə ədalətli prosesdir”, - Ukrayna Prezidenti vurğulayıb.

Eyni zamanda Zelenski xəbərdarlıq edib ki, rusiyalılar qışda yenidən enerji terroruna əl ata bilərlər.

"Biz bilməliyik ki, həm keçən il, həm də bu qış Rusiya terrorçuları bizim enerji sektorumuzu və kritik obyektləri vura bilərlər”, - prezident əlavə edib.

Xatırladaq ki, bu gün naməlum pilotsuz təyyarələr Moskvanın mərkəzinə hücum edib. Xüsusilə, dronlardan biri Rusiya Federasiyasının bir sıra nazirliklərinin ofislərinin yerləşdiyi "Moskva Siti” kompleksinin qülləsinə düşüb.

ABŞ-ın dövlət katibi Entoni Blinken Prezident İlham Əliyevlə telefon danışığında "Laçın yolundan tranzitin açılmasına ehtiyac olduğunu və humanitar yükləri Qarabağdakı əhaliyə çatdırmaq üçün alternativ marşrutlar üzrə razılaşmaların zəruriliyini” vurğulayıb.

Vaşinqton Laçın postunun açılmasını istəyir, amma həm də humanitar yüklərin daşınması üzrə alternativ marşrutları da dəstəkləyir.

Rəsmi Bakı erməni əhalisinin keçidi və BQXK-nın xəstələrin daşınması üçün Laçın postunu açıq saxlayır. Bu, Vaşinqtonun Laçın postu ilə bağlı istəyinə uyğundur, yaxud ABŞ-ın belə bir istəyinə qarşı yolun açıq olduğunu təqdim edir. Eyni zamanda, yüklərin daşınması üçün alternativ marşrut olaraq Ağdam yolunu təklif edir. Bu kontekstdə Blinkenin açıqlamasını ABŞ-ın Ağdam-Xankəndi marşrutunu dəstəkləməsi kimi qəbul edə bilərik.

Avropa İttifaqı Şurasının prezidenti Şarl Mişel də Ağdam marşrutunu dəstəkləmişdi. Lakin Ermənistanın sərhəddə "humanitar şousu”ndan sonra Aİ-nin xarici əlaqələr və təhlükəsizlik siyasəti üzrə ali nümayəndəsi Jozef Borrel İrəvanın mövqeyini müdafiə edən məntiqsiz açıqlama verdi. Bu, rəsmi Brüsselin mövqeyində dəyişiklik kimi görünsə də, həlledici və əsas deyil, istisna deyil ki, Borrel həm də balans yaratmaq məqsədilə bu mövqeyi sərgilədi. Aİ rəhbəri Şarl Mişelin mövqeyi isə dəyişməyib və Ağdam marşrutuna Brüsselin dəstəyindən sonra ABŞ-dan da dəstək gəlməsi rəsmi Bakının əlinin güclənməsi baxımından əhəmiyyətlidir. Bu həm də ümumilikdə Qərb cəbhəsinin mövqeyinə təsir edə biləcək amildir.

Buna paralel olaraq, Rusiyanın da mövqeyi təhlükəli deyil. Ermənistanın sərhəddəki şousuna Moskva ciddi reaksiya verməyib, həmçinin, xarici işlər nazirlərinin üçtərəfli görüşündən sonra Lavrovun reinteqrasiyanın dəstəklənməsinə yaxın mövqe sərgiləməsi diqqətdən yayınmadı.

Beləliklə, danışıqların aparıldığı hər üç platformada – ABŞ, Aİ və Rusiya – Xankəndiyə ərzağın Ağdam yolundan daşınması qəbul edilir.

Moskvanın üç hava limanında 32 reys təxirə salınıb.

Məlumata görə, Vnukovo hava limanında dörd təyyarənin uçuşu gecikib, bir reys ləğv edilib. Domodedovo hava limanında 19 reys təxirə salınıb, Şeremetyevo hava limanında beş reys təxirə salınıb və daha üç reys ləğv olunub.

Jukovski hava limanında dəyişikliklərlə bağlı xəbər yoxdur.

Qeyd edək ki, paytaxtın hava limanlarında təyyarələrin uçuş vaxtının kütləvi şəkildə dəyişdirilməsinin səbəbi məlum deyil.

Rusiyanın Orlov vilayətində Ukrayna silahlı qüvvələrinin tərkibində döyüşmək istəyən sakin saxlanılıb.

Publika.az axar.az-a istinadən xəbər verir ki, bu barədə Rusiya Federal Təhlükəsizlik Xidməti məlumat yayıb.

Məlumata görə, saxlanılan şəxs 39 yaşlı milliyyətcə azərbaycanlı Ramil Əziz oğlu Dəmirovdur. Onun Türkiyə üzərindən Ukraynaya getməyi planlaşdırdığı və fəal şəkildə Ukrayna hərbi birliyinin nümayəndələri ilə əlaqə qurduğu bildirilir. Həmçinin, Dəmirovun Ukraynanın Təhlükəsizlik Xidmətinə, Dövlət Sərhəd Xidmətinə, Dövlət Miqrasiya Xidmətinə və Xarici İşlər Nazirliyinə müraciət edərək ölkədən çıxış qaydası ilə bağlı məlumatlar əldə edib.

Saxlanılan şəxsə qarşı Rusiya Cinayət Məcəlləsinin 30 (cinayətə hazırlıq) və 205.5 (terror təşkilatının fəaliyyətində iştirak) maddəsi ilə cinayət işi başladılıb.

Ukrayna Silahlı Qüvvələrinin döyüşçüləri Donetsk vilayətinin Volnovaxsk rayonunun Staromayorski kəndini Rusiya ordusundan azad edib.

Publika.az xəbər verir ki, bu barədə Ukrayna Prezidenti Volodimir Zelenski teleqramdakı kanalında bildirib.

Dövlət başçısı Ukrayna Silahlı Qüvvələrinin döyüşçülərinin ölkənin cənubundakı Staromayorsku azad etdiyini əks etdirən video yayımlayıb.

"Bizim cənub! Bizim oğlanlar! Yaşasın Ukrayna", - Zelenski yazıb.

Öz növbəsində Ukrayna müdafiə nazirinin müavini Anna Malyar kəndin təmizlənməsi barədə məlumat verib.

"İndi müdafiəçilərimiz kəndi təmizləməyə davam edirlər", - o, teleqram kanalında yazıb.