Azərbaycan Fransada beynəlxalq festivalda təmsil olunacaq
Azərbaycan Fransada beynəlxalq festivalda təmsil olunacaq.

"Report” xəbər verir ki, "Dünya ətrafında” adlanan festival 24-27 yanvar tarixlərində Fransanın Lil şəhərində baş tutacaq.

Festivalda Azərbaycanı tanınmış caz ustası Etibar Əsədli təmsil edəcək.

Tədbir zamanı filmlər də nümayiş olunacaq, görüş və debatlar təşkil olunacaq.
Xalq artisti Elza İbrahimovanın anadan olmasından 85 il ötür


Bu gün Azərbaycanın və Dağıstanın Xalq artisti, bəstəkar Elza İbrahimovanın doğum günüdür.

E.İbrahimova 1938-ci ildə Hacıqabul şəhərində anadan olub. Bakıda 8 saylı musiqi məktəbini, 1957-ci ildə A.Zeynallı adına orta ixtisas musiqi məktəbinin bəstəkarlıq sinfini, 1964-cü ildə Ü.Hacıbəyov adına Azərbaycan Dövlət Konservatoriyasının (indiki Bakı Musiqi Akademiyası) bəstəkarlıq şöbəsini bitirib. Hələ uşaq yaşlarından musiqiyə olan böyük məhəbbəti valideynləri tərəfindən dəyərləndirilir və o, musiqi məktəbinə yazılır.

Elza İbrahimova 1969-cu ildə ilk mahnısını bəstələyir. Məmməd Rahimin sözlərinə bəstələnmiş "Yalan ha deyil” mahnısının ilk ifaçısı Şövkət Ələkbərova olur. Azərbaycanda tanqo ritmini estradaya gətirən ilk bəstəkarlardan biri olan Elza İbrahimovanın Rəfiq Zəkanın sözlərinə bəstələdiyi "Qurban verərdim” əsəri sovet dövründə bədii şura tərəfindən o qədər də yaxşı qarşılanmır. Çünki tanqonun burjua ahənginin sovet ruhuna uyğun gəlmədiyi bildirilir.

Amma sonradan "Qurban verərdim”lə bərabər "Sən mənə lazımsan” (söz. Əliağa Kürçaylı), "Bağçadan keçmisən” (söz. Ə.Əlibəyli) və sair tanqo ritmində yazılmış musiqilər bəstəkarın sevilən mahnıları siyahısına qoşulur.

Yaradıcılığı təkcə estrada janrı ilə kifayətlənməyən bəstəkar diplom işi üçün yazdığı fortepiano və orkestr üçün üçhissəli konsert, "Afət”, "Şeyx Şamil” və "Yanan laylalar” operalarının, həmçinin Azərbaycanda neft sənayesinin 130 illiyi münasibəti ilə neftçilərə həsr olunmuş himnin də müəllifidir.

Yaradıcılığında bir-birindən maraqlı, orijinal mahnılarla bərabər romanslar, sonatalar, kvartetlər də bəstələyib. Bəstəkarın Rəşid Behbudovun ifasında səslənən "Ey vətən” əsəri bütün dünyada Azərbaycanı tərənnüm edən mahnılardan biri olub. Azərbaycan şairlərinin yüzlərlə şeirlərinə və rus dillərində onlarla poetik nümunəyə musiqi yazıb.

1992-ci ildə Azərbaycan Respublikasının Əməkdar incəsənət xadimi adına layiq görülüb.

2008-ci ildə Azərbaycan Respublikasının Xalq artisti adına sahib olub.

Uzun sürən xəstəlikdən sonra 11 fevral 2012-ci ildə 74 yaşında vəfat edib.

Bəstəkar İkinci Fəxri xiyabanda dəfn olunub.

Bakıda “I Turan Kitab Festivalı” keçiriləcək

 

 
 

Bakıda "I Turan Kitab Festivalı” keçiriləcək.

"Report”un məlumatına görə, festival 11-15 yanvar 2023-cü il tarixlərində "Çapar yayınları”nın təşkilatçılığı, Elm və Təhsil Nazirliyinin, DOST Agentliyinin, Yunus Əmrə İnstitutunun Bakı mərkəzinin təşkilati dəstəyi ilə baş tutacaq.

Festivalda ölkənin 40-a yaxın nəşriyyatı, 20-yə yaxın kitab mağazası iştirak edəcək. 

"I Turan Kitab Festivalı”nda kitab təqdimatları, imza saatları, qiraət saatları, mühazirələr olacaq, müəlliflərlə görüşlər keçiriləcək.

Qeyd edək ki, "Pasaj-1901” sərgi salonunda olacaq festivala giriş sərbəstdir.

“Şuşa ili”nə həsr olunan “270-ci səhifə” adlı sənədli film çəkilib




"Azərbaycan Jurnalistlər Şəbəkəsi” İctimai Birliyi Qeyri-Hökumət Təşkilatlarına Dövlət Dəstəyi Agentliyinin dəstəyi ilə "Şuşa ili”nə həsr olunan "270-ci səhifə” adlı sənədli filmi ərsəyə gətirib.

"Report” xəbər verir ki, əsas məqsədi işğal dövründə Şuşanın maddi-mədəni irsinə vurulmuş zərəri göstərmək olan sənədli filmdə Şuşada işğal vaxtı ermənilər tərəfindən dağıdılmış mədəniyyət abidələri, məktəblər və tədris mərkəzləri, eləcə də bu şəhərdə mövcud olmuş mədəni mühit və milli irsimiz barəsində ətraflı söz açılır.

Filmin adı Qarabağımızın mirvarisi Şuşa şəhəri bu il 270 yaşını qeyd etdiyinə görə rəmzi olaraq "270-ci səhifə" adlanır. Azərbaycanın müxtəlif tarixi dövrlərini yaşamış Şuşa şəhəri həm də bir tarix kitabıdır. Yaradıcı heyət film boyu sanki bu kitabı vərəqləyir.

Müzəffər Ali Baş Komandanın rəhbərlik etdiyi Azərbaycan Ordusu 2020-ci il noyabrın 8-də Şuşa şəhərini işğaldan azad edir. Filmdə azad olunandan sonra gözəl Şuşanın artıq dirçəldilməsindən də bəhs olunur.

Ekran əsərinin ərsəyə gəlməsində Müsəllim Həsənov (araşdırmaçı), Zəka Quluyev (rejissor), Kəmalə Cahidqızı (prodüser), Emin Hüseynov (quruluşçu operator), Soltan İbrahimov (operator), Arzum Nuruşzadə (montaj) və Ayaz Mirzəyevdən (ssenari müəllifi) ibarət yaradıcı komanda birgə fəaliyyət göstərib.

Məlumat üçün bildirək ki, "Azərbaycan Jurnalistlər Şəbəkəsi” İctimai Birliyinin "Erməni işğalı nəticəsində Şuşanın maddi-mədəni irsinin talanması və təhsil ocaqlarının dağıdılması” adlı layihəsi bu il Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin "Şuşa İli”nə həsr olunmuş xüsusi müsabiqənin qalibi olub. "270-ci səhifə" adlı film bu layihə çərçivəsində hazırlanıb. Filmin tezliklə həm yerli ictimaiyyətə, həm də xarici dillərdə beynəlxalq auditoriyaya təqdimatı nəzərdə tutulur.

Filmin anonsunu bu linkdən izləyə bilərsiniz: https://www.youtube.com/watch?v=Izk_kR_TbTY

 Antonio Banderas “Zorro” rolundakı varisini açıqladı

 

 

 

"Zorro maskası” və "Zorro əfsanəsi” filmlərinin ulduzu Antonio Banderas öz varisini açıqlayıb.

Onun fikrincə, meksikalı qəhrəman rolunun növbəti ən yaxşı ifaçısı "Marvel” kainatının üzvü Tom Holland ola bilər.

"Mən onunla "Uncharted: Off the Cards” filmində işləmişəm. O, çox enerjili və əyləncəlidir, onda bu qığılcım var. Elə isə niyə olmasın ki?”, - deyə Banderas bildirib.

Eyni zamanda, o, məşhur franşizaya özünün də qayıtmasını istisna etməyib.

Ramana qəsəbəsi görülən əsaslı abadlıq işlərindən sonra – FOTOREPORTAJ

Ramana qəsri Bakı şəhəri Sabunçu rayonu Ramana qəsəbəsi ərazisində yerləşən tarix-memarlıq abidəsidir. 

Qəsr Azərbaycan Respublikası Mədəniyyət və Turizm Nazirliyi tərəfindən dünya əhəmiyyətli abidə kimi qeydiyyata alınıb. 2001-ci ildə Nardaran qəsri digər Xəzəryanı müdafiə qurğuları ilə birlikdə UNESCO-nun Ehtiyyat siyahısına daxil edilib.

Bütün kənd 100 faiz tam işıqlıdır. Burada 300 iş yeri mövcuddur. Məşhur "Koroğlu”, "Nəsimi” və "Babək” filmlərinin müəyyən səhnələri Ramana qalasında çəkilib.

"Global Photo Stock”un əməkdaşı qəsrdən fotolar lentə alıb.

 

Tanınmış azərbaycanlı rəssam vəfat etdi

Tanınmış rəssam Rakif İsmayılov vəfat edib.

Məlumatına görə, o, 65 yaşında dünyasını dəyişib.

Məlumata görə, mərhum şəkər xəstəliyindən əziyyət çəkirdi. Bir müddət öncə onun ayağı amputasiya olunmuşdu.

Qeyd edək ki, R.İsmayılov Masallının Ağakişibəyli kəndində anadan olub. O, Əzim Əzimzadə adına rəssamlıq məktəbini bitirib. Daha sonra Moskvada təhsilini davam etdirib, Xalq rəssamı Tahir Salahovdan 4 il təhsil alıb. Ölkədə portretçi rəssam kimi tanınıb. İsmayılov son illərini Bakının Nizami küçəsində turistlərin portretini çəkməklə keçirib.

 
Tbilisi Şəhər Şurasında Əhməd Cavadın 130 illiyi qeyd olunub - FOTO



Tbilisi Şəhər Şurasında (sakrebulo) Azərbaycanın böyük şairi Əhməd Cavadın anadan olmasının 130-cu ildönümünə həsr olunan "Ölməz qələm cəngavəri” adlı tədbir keçirilib.

"Report” xəbər verir ki, xatirə gecəsi Tbilisi meriyasının dəstəyi, sakrebulo və Mirzə Fətəli Axundzadə adına Azərbaycan Mədəniyyəti Muzeyinin birgə təşkilatçılığı ilə baş tutub.

Öncə gürcü kişi xorunun ifasında Gürcüstan və Azərbaycanın dövlət himnləri təqdim olunub.

Şura üzvü Nino Ruxadze açılış nitqi ilə çıxış edərək Ə.Cavadın Gürcüstanla sıx əlaqələrinin olduğunu deyib. O, azərbaycanlı şairin Şota Rustavelinin "Pələng dərisi geymiş pəhləvan” əsərini originaldan Azərbaycan dilinə tərcümə etdiyini xatırladıb: "Əhməd Cavad tərcüməsi ilə oxucuları Gürcüstan mədəniyyəti və dəyərləri ilə tanış edib, ölkəni qədim mədəniyyətli proqressiv və Avropa sivilizasiyasının bir hissəsi kimi göstərib”.

Muzeyin direktoru Leyla Əliyeva çıxışında tədbirin təşkilinə görə Tbilisi sakrebulosuna təşəkkürünü bildirib.

Sakrebulo sədri Giorgi Tkemaladze çıxış edərək azərbaycanlı şairin xatirəsinə həsr olunan tədbirə ev sahibliyi etməkdən məmnunluğunu bildirib.

Söz alan Azərbaycanın Gürcüstandakı səfirinin müşaviri Eldar Bayramov Tbilisidə Azərbaycan mədəniyyətinin qorunması və saxlanılmasına göstərilən diqqəti yüksək qiymətləndirib. O, Tbilisi Şəhər Şurasına Ə.Cavadın yaradıcılığına verdiyi yüksək dəyərə görə təşəkkür edib.

Sakrebulonun Təhsil və Mədəniyyət Komissiyası Aparatının rəhbəri, yazıçı İrakli Şamatava Ə.Cavadın yaradıcılığı və fəaliyyəti barədə danışıb. Onun sözlərinə görə, şair Acarıstanda da yaşayıb və gürcülərin yaxşı dost olduğunu yazıb. Gənc yazıçı qeyd edib ki, Ə.Cavadın həyat yoldaşı Gürcüstandan olub və əsərlərində gürcü xalqına yaxın və xoş münasibəti aydın görünür.

İ.Şamatava, həmçinin bildirib ki, gələn il Gürcüstan və Azərbaycan ədəbiyyatlarına həsr olunacaq ikidilli antologiyanın nəşri nəzərdə tutulub.

İvane Cavaxişvili adına Tbilisi Dövlət Universitetinin (TDU) nümayəndəsi, Qafqazşünaslıq Elmi-Tədris İnstitutunun rəhbəri Merab Çuxua çıxışında Gürcüstanda Azərbaycan ədəbiyyatının tədrisindən söz açıb. O deyib ki, TDU-da Azərbaycanşünaslıq proqrama dil, folklor ilə yanaşı ədəbiyyat da daxil edilib və Ə.Cavadın əsərlərinin də proqrama daxil edilməsi nəzərdə tutulub

Tədbirin bədii hissəsində Aşıq Nargilə Mehtiyeva "Meydan” qrupu ilə birgə Əhməd Cavadın sözlərinə yazılmış "Gəncədən gəlirəm” mahnısını ifa edib, azərbaycanlı uşaqlar şairin "Gürcüstan" şeirindən bəndlər söyləyiblər.

Sonda M. F. Axundzadə adına Azərbaycan Mədəniyyəti Muzeyinin direktoru Leyla Əliyeva sakrebulonun sədri G.Tkemaladzeyə Azərbaycan dilində işıq üzü görmüş "Pələng dərisi geymiş pəhləvan" əsərinin yer aldığı nəfis kitab, Azərbaycan-Gürcüstan mədəni əlaqələrinin güclənməsinə verdiyi böyük töhfəyə görə təşəkkürnamə təqdim edib.
ABŞ-da Qarabağda erməni vandalizmini əks etdirən sərgi açılıb - FOTO



ABŞ-da Qarabağda erməni vandalizminin izlərini əks etdirən sərgi açılıb.

"Report”un yerli bürosu xəbər verir ki, Nyu-Yorkun qabaqcıl sərgi salonlarından birində baş tutan sərgidə italiyalı fotoqraf Fabrizio Kontinin lentə aldığı, uzun müddət davam edən erməni işğalı nəticəsində Qarabağın maddi-mədəni irsinə dəyən zərərin əks olunduğu fotoşəkillər nümayiş etdirilib.

Sərginin açılışında Azərbaycanın mədəniyyət naziri Anar Kərimov, Azərbaycanın BMT yanında Daimi Nümayəndəsi Yaşar Əliyev, diplomatlar, ziyalılar, ABŞ-da fəaliyyət göstərən Azərbaycan icmasının fəalları və yerli ictimaiyyətin nümayəndələri iştirak ediblər.

Təqdimat mərasimində çıxış edən fotoqraf F.Konti Qarbağda ermənilərin törətdiyi cinayəti dünyaya tanıtmaq üçün reallaşdırdığı layihədən danışıb.

F.Konti İkinci Qarabağ müharibəsindən sonra könüllü olaraq Ağdama getdiyini deyib və bir il ərzində orada lentə aldığı fotoların hekayəsindən bəhs edib. Fotoqraf "Ruhlar şəhəri” adlandırdığı Ağdamda gördüklərindən dəhşətə gəldiyini və Qarabağda ermənilərin insanlığa sığmayan tarixi cinayət törətdiyini deyib. O, viran qalmış yaşayış məntəqələrində və minalanmış torpaqlarda qarşılaşdığı çətin anlardan bəhs edib.

Müəllif bildirib ki, o, latın dilində qədim Roma imperiyasında düşmənlə sonuna qədər mübarizə aparmaq mənasına gələn məşhur "Delenda Est” ifadəsini istifadə edərək sərgini "Ağdam Delenda Est” adlandırıb.

Təqdimat mərasimində A.Kərimov və Y. Əliyev çıxış ediblər. Natiqlər Azərbaycan reallıqlarını və ermənilərin uzun illər ərzində ölkəmizin tarixi torpaqlarında törətdiyi cinayəti dünya ictimaiyyətinə tanıtdığı üçün fotoqrafa təşəkkür ediblər.

Maraqla qarşılanan sərgidə nümayiş etdirilən 25 fotoşəkil NFT platformasında satışa çıxarılıb.
Builki “Xarıbülbül” festivalının keçiriləcəyi tarix müəyyənləşdi
"Şuşa ili”nin ilk böyük tədbiri "Xarıbülbül” Beynəlxalq Folklor Festivalının keçiriləcəyi tarix dəqiqləşib.

Mədəniyyət Nazirliyindən "Report”un sorğusuna cavab olaraq bildirilib ki, festivalın 12-14 may tarixində keçirilməsi nəzərdə tutulur.

Qeyd edək ki, tədbir Mədəniyyət Nazirliyi, Heydər Əliyev Fondu və Şuşa Şəhəri Dövlət Qoruğu İdarəsinin təşkilatçılığı ilə baş tutacaq.

İyul ayında Şuşada növbəti Vaqif Poeziya Günlərinin, iyul-avqust aylarında "Muğam” Televiziya Müsabiqəsinin final mərhələsinin və qaliblərin qala-konsertinin keçirilməsi planlaşdırılır.

Həmçinin il ərzində "Şuşa – 2022” beynəlxalq incəsənət, "Şuşanın 4 fəsli” ("4 seasons of Shusha”) adlı beynəlxalq fotoqrafiya festivallarının və s. keçirilməsi nəzərdə tutulur.

Xatırladaq ki, 2021-ci il mayın 12-i və 13-də Şuşa işğalından azad olunandan sonra ilk dəfə "Xarıbülbül” festivalı keçirilib.
Axtarış
Xəbər lenti
Reklam